Mû tapande ti aprophète: Jonas
1. Apendere sarango ye wa Jonas ayeke na ni lani?
1 Nyen la aga na li ti mo tongana mo yeke pensé na prophète Jonas? Ambeni zo alingbi ti bâ lo tongana zo ti mbeto wala zo so abâ mawa ti zo pëpe. Ye oko, lo fa lani polele so lo yeke na tâ be-ti-molenge, lo sara ye na mbeto pëpe, nga lo zia fini ti lo na lê ti kuâ. Na lege wa e lingbi ti ‘mû tapande’ ti apendere sarango ye ti Jonas?—Jacq. 5:10.
2. Tongana nyen la e lingbi ti mû tapande ti tâ be-ti-molenge ti Jonas?
2 Tâ be-ti-molenge: Na tongo nda ni, Jonas amû mbeni lege so ahon nde na kodoro so a hunda na lo ti gue dä. Ye so ayeke ye ti dongo bê pëpe ngbanga ti so ahinga lani azo ti Assyrie na sarango ye ti ngangu ahon ndo ni, nga a iri lani Ninive “kodoro ti mênë”. (Na. 3:1-3). Atâa so kue, Jéhovah ase Jonas, so afa na gigi tâ be-ti-molenge na yengo dä ti fani use ni ti gue na ndo so a tokua lo dä (aProv. 24:32; Jonas 3:1-3). Atâa so lo kpe kozoni, lo sara ye so bê ti Jéhovah aye (Mat. 21:28-31). E nga kue e leke na bê ti e ti ngbâ ti fa nzoni tënë, atâa tongana e wara sengo ndo wala territoire so a mû na e akpengba?
3. Na yâ ti ambeni ye wa la na fango tënë a hunda ti sara sacrifice nga ti sara mbeto pëpe?
3 Sarango ye na mbeto pëpe nga sarango sacrifice: Tongana Jonas abâ so sioni desizion ti lo asara si angbâ kete azo ti kpengo na bateau ni akui, lo yeda ti zia fini ti lo na lê ti kuâ (Jonas 1:3, 4, 12). Na pekoni, tongana lo yeke sara kua so a mû na lo na yâ ti Ninive, lo tambela ayo na yâ ti gbata ni, peut-être ti gi mbeni ndo so alingbi ti tene lo fa tënë ti fango ngbanga ti Jéhovah. So a yeke pëpe asarango ye ti mbeni zo ti mbeto, me ti mbeni prophète ti Nzapa so ayeke na mbeto pëpe! (Jonas 3:3, 4). Ka ti e laso ayeke tongana nyen? E yeke na bezoin ti tene Nzapa amû na e ngangu si e fa nzoni tënë na mbeto pëpe na gbele kangango lege (Kus. 4:29, 31). A hunda ti sara sacrifice ti mû ngoi nga na mosoro ti e ti sara na kusala ti fango tënë.—Kus. 20:24.
4. Ngbanga ti nyen a lingbi e mû ngoi ti gbu li na ndo ti nzoni tapande ti aprophète ti Jéhovah?
4 Lakue tongana mo yeke diko mbeni mbaï na ndo ti mbeni oko ti aprophète ti Jéhovah, mo yeke wara ye ti nzoni tongana mo bâ tere ti mo wani na yâ ti aye so asi. Hunda tere ti mo: ‘Tongana fade ayeke mbi, sarango ye ti mbi ayeke duti ande so wa? Tongana nyen mbi lingbi ti mû tapande ti apendere sarango ye ti lo na yâ ti fini ti mbi?’ (aHéb. 6:11, 12). Fade a-article ti yâ ti Kusala ti Royaume ti peko ayeke sara tënë na ndo ti akpengba ye so e lingbi ti manda na ndo ti aprophète be-ta-zo ti Jéhovah.