Aita-koli so ade maseka, ala yeke gi ti sara mbeni kusala na yâ ti congrégation?
1. Na ngoi wa mbeni ita-koli so ade maseka alingbi ti sara ye a lingbi na tënë so ayeke na 1 Timothée 3:1?
1 “Tongana mbeni zo agi kusala . . . , lo sara nzara ti mbeni kusala so ayeke nzoni mingi.” (1 Tim. 3:1). Atënë ti Bible so apusu aita-koli ti gi ti duti na asarango ye so alingbi ti mû lege na ala ti sara kusala na yâ ti congrégation. A lingbi mo kono awe si mo sara kusala ni? A yeke nzoni ti to nda ni na ngoi so mo de maseka. Na sarango tongaso mo yeke wara lege ti manda ye mingi nga mo yeke mû ngangu ti mo kue ti sara kusala tongana mbeni wakua ti mungo maboko na ngoi so mo yeke ga kota (1 Tim. 3:10). Tongana mo yeke maseka-koli so wara batême ade ti ninga ape, tongana nyen la mo lingbi ti gi ti sara kusala na yâ ti congrégation?
2. Tongana nyen la mo lingbi ti fa so mo yeke sara ambeni sacrifice?
2 Sara ambeni sacrifice: Girisa pëpe so mo yeke gi ti sara mbeni nzoni kusala, me mo yeke gi pëpe yango-iri. Ni la, a yeke nzoni mo gi ti duti na nzara ti mû maboko na aita. Mbeni lege ti sara ni ayeke ti gbu li na ndo ti nzoni tapande ti Jésus (Mat. 20:28; Jean 4:6, 7; 13:4, 5). Hunda na Jéhovah ti mû maboko na mo ti bi bê na aita (1 aCor. 10:24). Mo lingbi nga ti mû maboko na aita ti congrégation so aga mbakoro awe wala so mbeni mbage ti tere ti ala abuba? Mo yeke duti lakue nduru ti fâ apere, ti zi asaleté wala ti sara ambeni kua na Da ti Royaume si ndo ni aduti lakue pendere? Mo yeke duti lakue nduru ti sara devoir na place ti mbeni ita so aga pëpe? Tongana mo yeke mû maboko na ambeni ita, mo wani mo yeke bâ so mo yeke na ngia.—Kus. 20:35.
3. Ngbanga ti nyen dutingo ti e na lege ti yingo ayeke kota ye, nga e yeke fa so e gue na li ni tongana nyen?
3 Dutingo ti mo na lege ti yingo: A yeke kota ye mingi teti mbeni ita so ayeke na kua na yâ ti congrégation ti kpengba na lege ti yingo ahon ti duti na apendere kode. Zo so akpengba na lege ti yingo ayeke tara ti duti na oko bango ndo ti Jéhovah nga na ti Jésus (1 aCor. 2:15, 16). Lo yeke fa na yâ ti asarango ye ti lo “lengo ti yingo”. (aGal. 5:22, 23). Lo yeke zo so ayapu na yâ ti kusala ti fango tënë nga lo zia na kozo ndo aye so andu Royaume ti Nzapa. Mo lingbi ti maï na lege ti yingo na dutingo na mbeni nzoni kapa ti mandango ye mo wani. Ye so andu nga dikongo Bible lâ oko oko, dikongo a-article oko oko ti Tour ti Ba Ndo nga na Réveillez-vous!, na ti leke tere kozoni si mo gue na abungbi ti congrégation (Ps. 1:1, 2; aHéb. 10:24, 25). Na ngoi so lo yeke mû wango na maseka Timothée ti gue na li ni na lege ti yingo, Paul atene: “Mo sara hange lakue na . . . fango ye ti mo.” (1 Tim. 4:15, 16). Ni la, sara kue ti leke adevoir so amû na mo ti sara na Ekole ti Kusala ti aChrétien. Leke tere ti mo ndali ti fango tënë, nga mû mbage dä lakue. Leke na bê ti mo ti sara ambeni kusala na lege ti yingo, tongana kua ti pionnier, ti sara kua na Béthel wala ti gue na Ekole ti aita-koli so ayeke kumbamba. Ti duti zo so akpengba na lege ti yingo alingbi ti mû lege na mo ti “kpe yongoro na anzara ti bê so ayeke gbu ka amaseka”.—2 Tim. 2:22.
4. Ngbanga ti nyen a yeke kota ye ti sara kua so amû na mo na lege ni, nga ti duti be-ta-zo?
4 Sara kusala ti mo na lege ni nga duti be-ta-zo: Na ngoi ti akozo Chrétien aita-koli so asoro ala lani ti kangbi kobe na aita so ayeke na bezoin ni, a yeke aita so ayeke “anzoni zo” nga ala yeke be-ta-zo na so zo alingbi ti zia bê na ndo ti ala, ye so asara si abazengele agi bê ti ala lani pëpe na ndo ti kua ti aita ni. Sarango tongaso amû lege na ala ti sara ambeni kpengba kusala nde (Kus. 6:1-4). Ni la, tongana amû na mo mbeni kusala ti sarango ni na yâ ti congrégation ayeke nzoni mo sara kue ti sara ni nzoni nga na bê ti mo kue. Mû tapande ti Noé so asara ye kue so Nzapa ahunda na lo ti sara ti leke lani arche (Gen. 6:22). Jéhovah ayeke bâ na nene ni dutingo be-ta-zo ti e nga lege so e yeke maï na lege ti yingo.—1 aCor. 4:2; bâ encadré “Mo yeke wara aye ti nzoni tongana a fa ye na mo.”
5. Ngbanga ti nyen a lingbi aita-koli so ade maseka agi ti sara kusala na yâ ti congrégation?
5 Na lege ti prophète Ésaïe Jéhovah afa so lo yeke sara si kusala ti bungbingo azo ague na li ni (És. 60:22). Ngu oko oko wungo ti azo 250 000 tongaso ayeke wara batême. So afini zo mingi ayeke ga na yâ ti tâ tënë, a yeke na bezoin ti aita-koli so ayeke biazo ti sara kusala na yâ ti congrégation. Laso, aye ti sarango ni ayeke mingi na yâ ti kusala ti Jéhovah (1 aCor. 15:58). Aita-koli so ade maseka, ala yeke gi ti sara kusala? Tongana a yeke tongaso, andâ ala sara nzara ti mbeni kusala so ayeke nzoni mingi.
[Kete tënë na lembeti 2]
So afini zo mingi ayeke ga na yâ ti tâ tënë, a yeke na bezoin ti aita-koli so ayeke biazo ti sara kusala na yâ ti congrégation
[Encadré na lembeti 3]
Mo yeke wara aye ti nzoni tongana a fa ye na mo
Aita-koli so ade maseka so alingbi, a yeke wara aye ti nzoni tongana a-ancien amû na ala akua ti sarango ni nga afa ye na ala. Mbeni surveillant aduti na ayeke mû wango na mbeni ita na ndo ti estrade na peko ti bungbi. Lo bâ mbeni maseka-koli so aduti nduru na ala, tongaso surveillant ni ahunda na maseka-koli ni wala lo yeke ku ti sara lisoro na ni. Maseka-koli ni atene so a mû na lo kua ti lekengo ndo ti estrade lakue na peko ti bungbi. Atâa so babâ na mama ti lo aye ti kiri na yanga-da, me maseka-koli ni aye ti hon pëpe sân ti sara kua so a mû na lo. Na ngia surveillant ni ahon. Lo tene: “A hunda lakue na a-ancien ti congrégation so ti fa ye na aita-koli so ade maseka so alingbi, na mungo na ala kua ti sarango ni na yâ ti congrégation. Ye ti pekoni ayeke so, na ngoi so mbi yeke sara lani vizite na congrégation ni, mbi bâ so a-ancien ni ayeke yeda lakue ti tene mbeni ita-koli so ade maseka na so alingbi aga wakua ti mungo maboko.”