Hundango ndo

◼ Nyen la a lingbi amolenge a manda ti tene ala kpengba na lege ti yingo?

Ababâ na amama so ayeke aChrétien ayeke sara ye ti nzoni mingi tongana ala bata amolenge ti ala “na lege ti sengo ndo nga na awango ti gbotongo mê so alondo na Jéhovah.” (aÉph. 6:4). Na tapande, ababâ na amama abâ so a yeke nzoni ti bâ aversê ti lâ oko oko legeoko na amolenge ti ala lakue na ndapre. Na ngoi so ala yeke voro Nzapa na yâ ti sewa wala na ambeni ngoi nde, sewa ni alingbi peut-être ti bâ mbeni vidéo na ti sara lisoro na ndo ni legeoko, ti sara tënë na ndo ti ambeni article ti Les jeunes s’interrogent, ti haka peko ti mbeni mbaï ti Bible, wala ti tara pekoni na lege ti démonstration. Me ti tene amolenge aga “abiazo,” a lingbi a fa nga na ala atâ tënë ti Bible so ndani alï mingi.—aHéb. 6:1.

Bâ, na tapande, ye so e yeke fa na azo na yâ ti territoire ti e. Na kozo tingbingo tere ti e na azo ni wala na peko ti so e sara vizite na ala fani mingi awe, mingi ni e yeke sara kue ti to nda ti étude na lege ti buku Bible afa nyen biani? Na peko ti so buku ni ahunzi, e yeke sara kua na buku “Zia ala ngbâ na yâ ti ndoye ti Nzapa.” Ndali ti nyen? Ndali ti so buku Bible afa nyen ayeke mû maboko na a-étude ni ti wara tâ hingango ye ti Bible. Buku “Ndoye ti Nzapa” ayeke fa na ala tongana nyen ti sara ye alingbi na afango ye ti Bible na yâ ti fini ti ala ti lâ oko oko. Ti manda abuku use so ayeke sara si “gunda ti ala alï sese” na yâ ti Christ nga ti tene ala “yengi pëpe na yâ ti mabe”. (aCol. 2:6, 7). A yeke nzoni amolenge ti e kue awara nzoni na lege ti buku so. Ala kue ayeke na bezoin ti hinga ye na ndo ti ngere so Jésus afuta ti zi na azo, na ndo ti Royaume ti Nzapa, nga na ndo ti dutingo ti akuâ. Amolenge nga kue ayeke na bezoin ti hinga ndani so Nzapa azia si azo ayeke bâ pasi nga ti hinga aye so afa so e yeke na alango ti nda ni ti dunia so. A lingbi ala hinga biani so aTémoin ti Jéhovah ayeke fa gi tâ tënë. Amaseka nga kue ayeke na bezoin ti gbu nda ti afango ye ti Bible nga tongana nyen ti sara kua na “ngangu ti gbungo li ti ala”. (aHéb. 5:14). Me, a lingbi ababâ na amama abâ ngu ti amolenge ni nga na gbungo nda ti ye ti ala. Ye oko, mingi ti amolenge ayeke to nda ti manda atâ tënë ti Mbeti ti Nzapa so ndani alï mingi même na ngoi so ala ngbâ kete.—Luc 2:42, 46, 47.