Abungbi ti fango tënë so asara si e fa tënë nzoni

1. Nda ti abungbi ti fango tënë ayeke nyen?

¹ Na mbeni ngoi, Jésus asara bungbi na adisciple ti lo bale-mbasambala kozoni si lo tokua ala ti fa tënë (Luc 10:1-11). Lo kpengba ala na tenengo na ala so a yeke zia ala gi tongaso ape, me so Jéhovah so ayeke “Wa ti kua ni” ayeke fa lege na ala. Lo fa na ala ye so alingbi ti mû maboko na ala ti sara kua ni nzoni, nga lo tokua ala “use use”. Laso, abungbi so e yeke sara kozo ti tene e gue na fango tënë ndani ayeke ti kpengba e, ti fa ye na e, nga ti leke e.

2. Ti fadeso, a lingbi bungbi ti fango tënë asara penze-ngbonga oke?

² E yeke sara ka bungbi ti fango tënë na yâ ti penze-ngbonga 10 ti si na 15, so na yâ ni a yeke kangbi azo ni, a yeke fa territoire ni, nga a yeke sambela. Me ti fadeso aye ni achangé awe. Ti londo na nze ti avril, a yeke sara ande bungbi ti fango tënë ahon penze-ngbonga 5 wala 7 pëpe. Me, tongana a sara bungbi ti fango tënë ni na peko ti bungbi ti congrégation, a lingbi a sara ni encore nduru mingi, ndali ti so a sara fade lisoro na ndo ti ambeni versê ti Bible mingi awe. Ti sara abungbi ti fango tënë nduru, a yeke mû lege na aita ti wara ngoi mingi ti fa tënë. Na ndo ni, tongana apionnier wala awafango tënë ato nda ti fa tënë kozoni si ala ga na bungbi ti fango tënë, ala yeke zi ande gi kete ngbonga so ala sara na ngoi ti bungbi ni na ndo ti ngbonga ti fango tënë ti ala.

3. Ti tene mbeni bungbi ti fango tënë amû maboko mingi na aita, a lingbi a leke ni tongana nyen?

³ A lingbi a leke bungbi ti fango tënë ni nzoni si amû maboko mingi na aita. Na yâ ti mingi ti acongrégation, a yeke nzoni agroupe ti fango tënë asara abungbi ti fango tënë ni nde nde ahon ti tene a sara ni kue ndo oko. Ye so ayeke sara si aita ayeke si na place ti fango tënë ni hio nga peut-être ala lingbi ti gue hio na yâ ti territoire. Nga a yeke kangbi aita ni hio, na a yeke duti ngangu pëpe na asurveillant ti groupe ni ti bâ ndo nzoni na ndo ti aita so ayeke na yâ ti agroupe ti ala. Bungbi ti a-ancien ayeke bâ aye so asi na ndo ni na ti bâ ye so ayeke nzoni ti tene a sara. Kozo ti tene a sambela si bungbi ni ahunzi, a lingbi aita kue ahinga ndo so ala yeke fa tënë dä nga na zo so ala na lo ayeke fa tënë ni.

4. Ngbanga ti nyen a lingbi e bâ abungbi ti fango tënë pëpe tongana mbeni kete ye?

⁴ Abungbi ti fango tënë ayeke tongana tanga ti abungbi kue: A leke abungbi ti fango tënë ndali ti aita so aye ti sigigi na fango tënë na lango ni so, peut-être aita kue la alingbi ti wara lege ti ga dä ape. Ye so aye ti tene pëpe so alingbi a bâ ni tongana mbeni senge ye wala ti bâ so abungbi ti congrégation ayeke kota ahon ni. Legeoko tongana tanga ti abungbi kue, abungbi ti fango tënë ayeke nga ye so Jéhovah aleke ti mû lege na e ti pusu mba ti duti na ndoye na ti sara apendere kusala (aHéb. 10:24, 25). Tongaso, a lingbi ita so amû li ni aleke tere ti lo nzoni si lisoro ni alingbi ti mû gonda na Jéhovah nga aita so aga alingbi ti wara aye ti nzoni dä. Tongana lege ayeke dä ti sara ni, a lingbi aita so aye ti gue na fango tënë asara ngangu ti ga na abungbi ti fango tënë.

5. (a) Kua wa la surveillant ti kusala ayeke sara ti leke abungbi ti fango tënë? (b) Na ngoi wa la mbeni ita-wali alingbi ti mû li ni na bungbi ti fango tënë?

⁵ A lingbi ita so amû li ni aleke tere ti lo nzoni: Ti tënë mbeni zo aleke mbeni mbage ti bungbi nzoni, a yeke nzoni a fa ni na lo kozoni si. A yeke nga legeoko tongaso ndali ti abungbi ti fango tënë. Ni la, tongana agroupe ti fango tënë ayeke sara abungbi ti ala nde nde, asurveillant ti groupe ni wala aita so ayeke mû maboko na ala la ayeke mû li ni na bungbi ti fango tënë ti groupe ni. Me, tongana agroupe ti fango tënë kue asara bungbi ti fango tënë ndo oko, surveillant ti kusala la ayeke fa zo so ayeke mû li ni. Ambeni surveillant ti kusala ayeke mû programme ti abungbi ti fango tënë ni na azo kue so ayeke mû li ni nga ala yeke zia mbeni programme ni na tableau. A lingbi surveillant ti kusala abâ yâ ti aye nzoni na ngoi so lo yeke soro azo so ayeke mû li ni, na hingango so bungbi ni ayeke tambela nzoni gi tongana zo so ayeke mû li ni aleke aye nga afa ye nzoni. Tongana mbeni ancien, mbeni wakua ti mungo maboko, wala mbeni ita-koli so awara batême na so ahinga ti fa ye nzoni ayeke dä ape na ambeni lango, surveillant ti kusala alingbi ti soro mbeni ita-wali so awara batême awe na so alingbi, ti tene lo mû li ni.—Bâ li ti tënë “Na ngoi so a hunda ti tene mbeni ita-wali la amû li ni na bungbi ti fango tënë”.

6. Ngbanga ti nyen a yeke kota ye ti tene ita so ayeke mû li ni na bungbi ti fango tënë aleke tere ti lo nzoni?

⁶ Na ngoi so a mû na e mbeni devoir na Ekole ti Kusala ti aChrétien wala mbeni mbage ti Bungbi ti Kusala, e yeke bâ ni na nene ni nga e yeke leke ni nzoni. Ambeni ita ayeke ku juska ala si na ndo ti bungbi ti fango tënë ni awe si ala to nda ti gbu li ti ala na ndo ti atënë so ala yeke tene ande. A yeke nzoni ita so ayeke mû li ni na mbeni bungbi ti fango tënë asara tongaso ape. Teti so bungbi ti fango tënë akiri nduru mingi, a yeke kota ye ti leke tere nzoni tongaso si aita awara aye ti nzoni na lege ti bungbi ni nga ahunzi na ngoi ni. Nzoni lekengo tere andu nga ti hinga territoire so aita ayeke gue ti fa tënë dä kozoni.

7. Ambeni ye wa la ita so ayeke mû li ni na bungbi ti fango tënë alingbi ti sara lisoro na ndo ni?

⁷ Atënë ti sarango na lisoro: Ndali ti so aterritoire ayeke nde nde, ngbâa “be-ta-zo” asigigi na mbeni schéma ti diskur ndali ti abungbi ti fango tënë pëpe. Me encadré ti li ti tënë “Na ngoi ti bungbi ti fango tënë, mo lingbi ti soro mbeni tënë so,” afa ambeni ye ti sarango ni. Mingi ni, a yeke sara ande bungbi ni tongana mbeni lisoro. Na ambeni ngoi, a lingbi ti sara mbeni démonstration so a leke ni nzoni, wala ti fa mbeni vidéo so andu fango tënë so ayeke na ndo ti jw.org. Na ngoi so lo yeke leke tere ti lo ndali ti fango tënë, a lingbi zo so ayeke mû li ni apensé na ndo ti aye so alingbi ti kpengba aita nga ti fa ye na ala na ngoi so ala yeke gue na fango tënë na lango ni so.

8. Na abungbi ti fango tënë ti samedi na dimanche nyen la ayeke nzoni a sara lisoro na ndo ni?

⁸ Na tapande, na asamedi, mingi ti awafango tënë ayeke kangbi Tour ti Ba Ndo nga na Réveillez-vous ! Mingi ti ala so ayeke fa tënë na samedi awara lege pëpe ti fa tënë na yâ ti yenga ni, tongaso alingbi ti duti ngangu na ala ti dabe ti ala na akode ti fango na tënë so ala manda na ngoi ti kapa ti vorongo Nzapa na yâ ti sewa. Ni la, a yeke nzoni zo so amû li ni akiri na ndo ti mbeni oko ti akode ti fango na tënë so ayeke na peko ti Kusala ti Royaume. Lo lingbi nga ti fa tongana nyen ti mû ambeni tënë so ala mä na yâ ti asango, ambeni ye so asi na ndo ni, wala tënë ti mbeni matanga ti yôro ni na yâ ti kode ti fango mbeni périodique na azo. Wala ti fa tongana nyen ti leke mbeni tënë ndali ti vizite ti peko tongana zo ni ayeda ti mû mbeti. Tongana ambeni ita asara kua na apériodique ti nze ni awe, ita so ayeke mû li ni alingbi ti hunda ala ti fa ambeni nduru kode ti fango na apériodique ni wala ti fa ambeni ye ti nzoni so ala wara na pekoni. Na dimanche, ita so ayeke mû li ni na bungbi ti fango tënë alingbi ti sara nga tongaso na ambeti so a yeke fa na tënë na nze ni. Na ngoi kue, e lingbi ti sara kua na ambeti so e yeke manda na Bible na azo, na tapande abrochure Nzoni tënë na Mä Nzapa nga na buku Bible afa nyen; tongaso ita so ayeke mû li ni alingbi ti fa na nduru tënë tongana nyen e lingbi ti zia ambeti so na azo.

9. Na nda-yenga ti kota kapa ti kangbingo mbeni mbeti, nyen la a lingbi ti sara lisoro na ndo ni?

⁹ Tongana congrégation ni ayeke na kota kapa ti kangbingo mbeni mbeti na nda-yenga ni, ita so ayeke mû li ni alingbi ti bâ tongana nyen ti kangbi apériodique legeoko na mbeti ti tisango ndo ni wala tract, wala lo lingbi ti sara lisoro na ndo ti ye so e lingbi ti sara tongana mbeni zo ayeda na tënë ni. Mbeni ye so lo lingbi ti sara ayeke ti fa ambeni ye so asi so afa nene ti kapa ni.

10, 11. Ngbanga ti nyen la a yeke kota ye ti tene awafango tënë aleke tere ti ala nzoni?

¹⁰ A lingbi awafango tënë aleke tere ti ala nzoni: Aita nga alingbi ti sara si bungbi ti fango tënë atambela nzoni. Tongana ala leke tere ti ala kozoni, peut-être na ngoi ti vorongo Nzapa na yâ ti sewa, ala lingbi ti wara mbeni nzoni ye ti fa ni na aita. Nzoni lekengo tere andu nga lekengo ambeti so e yeke fa na tënë kozoni si e si na bungbi ti fango tënë ni, tongaso si e lingbi ti gue hio na yâ ti territoire ti fa tënë.

¹¹ A yeke kota ye ti tënë e si na bungbi ti fango tënë kozoni si bungbi ni ato nda ni. Tâ tënë, e yeke sara ka ngangu ti si na l’heure na abungbi ti congrégation kue. Ye oko, tongana e si na bungbi ti fango tënë na retard alingbi ti ga na kpale. Tongana nyen? Ita so ayeke mû li ni ayeke bâ ambeni ye kozoni si lo kangbi aita. Tongana aita aga mingi ape, lo yeke tokua ala na mbeni territoire so a sara mbage ni awe. Tongana territoire ni ayo si ambeni ita ayeke gue na gere, lo lingbi ti mû ala na aita so ayeke na oto. Tongana ala yeke fa tënë na mbeni territoire so ayeke nzoni ape, ita so ayeke mû li ni alingbi ti leke ti tënë aita-koli na aita-wali afa tënë legeoko wala ala fa tënë nduru na mba. Awafango tënë so mbeni mbage ti tere ti ala abuba, a lingbi ti zia ala ti fa tënë na ando so hoto ayeke dä ape wala na ada so si a-escalier ni ayo mingi ape. Afini wafango tënë alingbi ti fa tënë na aita so ayeke na anzoni kode ti fango tënë. Me, tongana ambeni ita asi na retard, mingi ni a yeke kiri ti leke yâ ti kangbingo azo ni ti lingbi na aita so aga na peko. Na ambeni ngoi, ambeni ye alingbi ti sara si e ga na retard. Me, tongana e yeke ga lakue na retard, a lingbi e hunda tere ti e eskê ayeke ngbanga ti so e bâ bungbi ti fango tënë na nene ni ape wala ngbanga ti so e leke tere ti e kozoni ape?

12. Tongana mo yeke soro zo so mo na lo aye ti sigigi na fango tënë, nyen la a lingbi mo bâ ni?

¹² Aita so aga na bungbi ti fango tënë alingbi ti mä tere ti soro zo so ala ye ti fa tënë na lo kozoni si bungbi ni ato nda ni wala a lingbi ti fa na ala mbeni ita so ala na lo ayeke fa tënë legeoko. Ahon ti fa tënë lakue gi na aita so ayeke akamarade ti mo, eskê mo lingbi ti maï tâ ndoye so ayeke na bê ti mo so na mbage ti aita nde nde ape? (2 aCor. 6:11-13). Na ambeni ngoi, eskê mo lingbi ti mä tere na mbeni fini wafango tënë ti mû maboko na lo ti maï akode ti fango tënë ti lo ape? (1 aCor. 10:24; 1 Tim. 4:13, 15). Dengi mê nzoni na awango kue so a yeke mû, so andu nga ndo so a fa na ala ti fa tënë dä. Tongana bungbi ti fango tënë ni ahunzi awe, changé pëpe zo so a mû mo na lo ti fa tënë nga gue hio na yâ ti territoire so a fa ni.

13. Tongana azo kue asara ye alingbi na aye so afa, bungbi ti fango tënë ayeke mû maboko na e tongana nyen?

¹³ Na peko ti so ala hunzi ti fa tënë, adisciple bale-mbasambala so Jésus atokua ala “akiri na ngia na bê ti ala”. (Luc 10:17). Kite ayeke dä ape so, bungbi so Jésus asara lani na ala kozo ti tene ala gue na fango tënë amû maboko na ala ti fa tënë nzoni. Laso, abungbi ti fango tënë ayeke mû maboko na e nga ti fa tënë nzoni. Tongana zo kue abi bê ti lo ti sara ye alingbi na ye so a fa, bungbi ti fango tënë ayeke kpengba e, ayeke fa ye na e, nga ayeke leke e ti sara kua so a mû na e tongana “mbeni tënë ti témoin ndali ti amara kue.”—Mat. 24:14.