Maï akode ti fango tënë ti mo:—To nda ti étude gi na kozo gango ti mo na lege ti brochure Nzoni tënë so alondo na Nzapa!
Ndani so a yeke kota ye: Ti tene e sara si azo aga adisciple, a lingbi e duti azo so ahinga ti fa Tënë ti Nzapa nzoni (Mat. 28:19, 20). E kue e lingbi ti fa tâ tënë nzoni tongana e sara kua na agbakuru so a mû na e. A sigigi na brochure Nzoni tënë so alondo na Nzapa! ti mû maboko na e ti fa tâ tënë na azo. Tongaso, e lingbi ti sara kua na ni ti to nda ti étude na mbeni zo gi na kozo gango ti e.
Lege ti sara ni:
• Sara tënë na ndo ti kode so ayeke na yâ ti encadré so. —Bâ nga Kusala ti Royaume ti mars 2013.
• Zia ti mo brochure ni na yâ ti bozo ti fango tënë ti mo. Gi ti bâ wala mo yeke na abrochure ti kangbingo ni mingi.
• Sara gi paragraphe oko wala use, na hon penze-ngbonga bale-oko ape.
Tara ti sara ye so na nze so:
• Sambela ti duti na nzara ti manda Bible na mbeni zo. Toto na Jéhovah ti mû maboko na mo ti to nda ti mbeni étude nga ti tene lo mû maboko na mo ti ga zo so ahinga ti fa tâ tënë nzoni.—aPhil. 2:13.
• Na ngoi ti vorongo Nzapa na yâ ti sewa wala mandango ye mo wani, mû ngoi ti manda peko ti kode ni so. A yeke tongaso la mo yeke sara tënë na mbeni lege so afa so mo hinga ye ni nzoni nga mo lingbi ti to nda ti étude gi na kozo gango ti mo.
[Encadré na lembeti 1]
Na ngoi so mo yeke fa tënë da na da:
“Mbi ga ti sara lisoro na mo ndali ti so azo ayeke gi bê ti ala na ndo ti aye so ayeke si na yâ ti dunia so. Mo pensé so dutingo ti azo alingbi ti ga ande nzoni mbeni lâ? [Zia zo ni akiri tënë.] Bê ti mingi ti azo so amanda Bible adö ti hinga so nzoni tënë so ayeke na yâ ti Bible alingbi ti mû beku na e. Bâ ambeni hundango ndo so Bible akiri tënë na ni so la.” Mû brochure ni na zo ni, na hunda na lo ti soro mbeni hundango tënë oko so agbu bê ti lo so ayeke na peko ti brochure ni. Na pekoni, gue na ye ti manda so lo soro, na fa na lo tongana nyen ti manda ni. Mä tere na lo ti kiri ti bâ hundango tënë so aga na pekoni so ayeke na yâ ti ye ti manda ni.