Manda ye na mbage ti aita so ayeke na kode mingi
Na yâ ti congrégation, e ne mingi awafango tënë so ayeke na kode mingi. Ambeni asara na Jéhovah be-ta-zo a sara angu mingi awe. Ambeni awara apendere kode ti fango tënë ade ti ninga ape. Awafango tënë so abâ tongana nyen la Jésus afa lege na congrégation ti aChrétien na lango ti nda ni so na lege so lo sara si kua ti fango tënë na ti sarango si azo aga adisciple amû ndo (Mat. 28:19, 20). Na yâ ti kua ti fango tënë, ala wara “ngangu so ahon ti so zo ayeke na ni” na ngoi so ala tingbi na akpale nga ala wara atara (2 aCor. 4:7). Aye ayeke mingi so e lingbi ti manda na mbage ti aita so ayeke na kode mingi so. Tongana lege azi na ala ti fa na ambeni zo ye so ala hinga so, a yeke nzere ka na ala mingi (Ps. 71:18). Ni la, a lingbi e gi ti manda ye na mbage ti ala. E lingbi ti sara ni tongana nyen?
Na fango tënë: Ti tene afini wafango tënë wala ala so ayeke na kode mingi ape aga anzoni wafango tënë, ala yeke na bezoin ti tene a fa na ala kode ni. E yeke manda ye mingi tongana e bâ kode so aita so akpengba na lege ti yingo ayeke fa na tënë. (Bâ li ti tënë “Ngbâ ti yapu na fango tënë” na yâ ti Tour ti Ba Ndo ti 15 février 2015; gue na ota paragraphe so ayeke gbe ti kete li ti tënë “Mû maboko na afini wafango tënë.”) Eskê mo wara ye ti nzoni na fango tënë legeoko na mara ti aita tongaso awe?
Eskê mo hunda na mbeni ita so ayeke na kode mingi ti tene mo na lo asigigi na fango tënë awe? Tongana lo yeke wazin, ngoi na ngoi, mo lingbi ti sara mbeni étude ti mo na yanga-da ti lo. Na peko ti étude ni, hunda ita ni ti fa bango ndo ti lo nga ti mû na mo ambeni wango.
Mû ngoi ti duti na ala: Mû ngoi ti duti na aita ni tongaso si mo hinga ala. Tisa mbeni ti ga na kapa ti vorongo Nzapa na yâ ti sewa ti mo nga hunda tënë na lo. Tongana ita ni ayeke wazin, leke ti tene mo na sewa ti mo ague na yanga-da ti lo si ala voro Nzapa na sewa. Hunda lo, lo wara lani tâ tënë tongana nyen? Lo wara ye ti nzoni na peko ni? Aye wa la ague na li ni na yâ ti congrégation so lo yeke dä? So lo yeke sara na Jéhovah so, lo wara ngia dä?
Hinga so ala nga kue ayeke na akatikati ti ala. Tongana tanga ti azo kue, aita so aninga na kua ti fango tënë ayeke na amatabisi nde nde na yâ ti kua ni (aRom. 12:6-8). Ambeni ita ni ayeke mbakoro, na ye so alingbi ti sara si ala yeke na ngoi mingi ti tene e na ala e duti ape. Ye oko, e lingbi ti manda ye mingi na mbage ti ala ndali ti akode so ala wara na yâ ti kua so ala ngbâ lakue ti sara na Jéhovah.