A lingbi commandement so aduti na bê ti mo
Ababâ na amama ayeke tongana aberger. A lingbi ala bata amolenge ti ala nzoni, ndali ti so ala ninga ti hon ayo ape nga ye ti sioni alingbi ti si na ala hio (aProv. 27:23). Tongana nyen la ababâ na amama alingbi ti sara kua so nzoni? A lingbi ala mû ngoi lâ oko oko ti sara lisoro na amolenge ti ala tongaso si ala hinga ye so ayeke na yâ ti bê ti ala (aProv. 20:5). Nga, a lingbi ababâ na amama aleke amolenge ti ala na agbakuru so wâ agbi ni gbä si mabe ti ala akpengba (1 aCor. 3:10-15). Vidéo A lingbi commandement so aduti na bê ti mo afa so a yeke kota ye ti voro Nzapa lakue na sewa. Bâ ni legeoko na sewa, na pekoni sara lisoro na ndo ti ahundango tënë so.
(1) Nyen la asara si sewa ti Morgan azia bê ti lo na ndo ti aye ti yingo ape? (2) Ngbanga ti nyen la na tongo nda ni ye so Ita Morgan aleke ndali ti vorongo Nzapa na yâ ti sewa atambela nzoni ape? (3) Aye wa so Bible afa alingbi ti mû maboko na zo ti fa ye na amolenge nzoni? (Deut. 6:6, 7). (4) Nyen la alingbi ti sara si nzoni lisoro aduti na yâ ti sewa? (5) Asacrifice wa la amolenge aye ti tene ababâ na amama ti ala asara ni? (6) Tongana nyen la sarango ye ti Ita Martin na wali ti lo amû maboko na sewa ti Ita Morgan? (aProv. 27:17). (7) Nyen la a lingbi babâ ti sewa asara ni kozo ti tene vorongo Nzapa na yâ ti sewa ni atambela nzoni? (8) Tongana nyen la Ita Morgan ato nda ti leke yâ ti vorongo Nzapa na yâ ti sewa ti lo? (9) Ngbanga ti nyen vorongo Nzapa lakue na yâ ti sewa ayeke kota ye? (aÉph. 6:4). (10) Aye wa alingbi ti sara na ngoi ti vorongo Nzapa na yâ ti sewa? (11) Tongana nyen la Ita Morgan asara ye yeke me lo woko yâ ti tënë ni ape na ngoi so lo yeke mû maboko na Marcus ti bâ so ayeke kota ye ti sara ye na lege ni? (Jér. 17:9). (12) Tongana nyen la babâ na mama ti Rebecca amû maboko na lo ti mû nzoni desizion na ndo ti songo ti lo na Justin? (Marc 12:30; 2 Tim. 2:22). (13) Tongana nyen la Ita Morgan na wali ti lo asara ye na mabe na ngoi so ala leke ti changé aye na yâ ti fini ti ala? (Mat. 6:33). (14) Tongana nyen la vidéo so afa so a yeke kota ye ti tene ababâ ti sewa abâ lege ti azo ti sewa ti ala na lege ti yingo? (1 Tim. 5:8). (15) So mo yeke babâ ti sewa so, nyen la mo leke na bê ti mo ti sara?
TËNË SO ABÂ ABABÂ TI SEWA: A sara lani scénette so na ngoi ti kota bungbi ti lango ota ti ngu 2011. Na ngoi ni so, mo bâ lani mbeni ye so a lingbi mo leke ni na ngoi ti vorongo Nzapa na yâ ti sewa ti mo? Mo sara ni awe? Tongana mo bezoin ti sara ambeni changement, sambela Jéhovah ti mû maboko na mo ti sara ni ti tene sewa ti mo awara ye ti nzoni lakue.—aÉph. 5:15-17.