Maï akode ti fango tënë ti mo: Kode ti kangbingo buku Bible afa nyen

Ndani so a yeke kota ye: Buku Bible afa nyen ayeke kozo gbakuru so e yeke fa na ye na azo. Me, kozo ti tene e manda ni na mbeni zo, a lingbi e mû ni na zo ni si. Ni la, a yeke nzoni e kue e sara ngangu ti duti na nzoni kode ti kangbingo buku Bible afa nyen na fango tënë (aProv. 22:29). Akode ti sarango kua na buku so ayeke mingi, a yeke nzoni awafango tënë asara kua na ati so ala bâ alingbi na ala.

Lege ti sara ni:

Hunda mbeni tënë so alingbi ti mû lege na mo ti gue na zo ni na mbeni chapitre ti buku ni. Mo lingbi même ti soro mbeni oko ti ahundango tënë so ayeke na tongo nda ti achapitre ni. Na peko ti so zo ni akiri tënë awe, diko mbeni versê so ague oko na tënë ni na pekoni fa na lo paragraphe so asara tënë na ndo ni nga sara lisoro kete na ndo ni na lo.
Mbeni kode ni ayeke ti sara kua na atënë so ayeke na akozo lembeti ti buku ni ti zia nzara ti tënë ni na yâ ti zo ni na pekoni fa na zo ni na yâ ti buku ni ndo so lo lingbi ti wara kiringo tënë ti Bible dä. Na tapande, mo lingbi ti sara tënë ti mbeni ye ti ngangu so asi ade ti ninga ape nga fa so mingi ti azo aye ti wara akiringo tënë na ahundango ndo so ayeke na lembeti 3 so. Wala mo lingbi ti tene so mo yeke sara vizite na amba ti mo ti fa na ala tënë na ndo ti mbeni nzoni gigi ti kekereke. Fa na zo ni afoto so ayeke na lembeti 4-5 na hunda lo: “Na popo ti azendo so, ti so wa la mo ye ti tene Nzapa asara ni kozo?” Mo lingbi nga ti tene so, e yeke sara lisoro kete na azo ti mû maboko na ala ti wara kiringo tënë na ambeni ngangu hunda so azo ayeke hunda ka. Na pekoni, fa na zo ni ahundango tënë so ayeke na lembeti 6, nga hunda lo ti fa so wa la agbu bê ti lo.
Hunda na lo droit ti manda Bible. Mo lingbi ti tene: “E yeke sara kua na buku so ti manda Bible na amba ti e. Mo wara ni awe? [Zia zo ni akiri tënë.] Tongana mo yeke na mbeni kete ngoi, mbi yeke fa na mo tongana nyen la buku ni alingbi ti mû maboko na mo ti sara kua na Bible ti mo.”

Tara ti sara ye so na nze so:

Tara peko ti aye so na ngoi ti vorongo Nzapa na yâ ti sewa.
Tongana mo yeke na fango tënë, fa na zo so mo na lo asigigi ye so mo leke ti sara tënë na ndo ni (aProv. 27:17). Changé akozo tënë ti lisoro ti mo ni tongana ague oko na bezoin ti azo ni ape.