Mû tapande ti aprophète: Habakuk
1. Ngbanga ti nyen la e kue e lingbi ti duti na mara ti bango ndo ti prophète Habakuk?
1 Tongana e yeke bâ aye ti sioni so ayeke gue na li ni na yâ ti dunia so, e lingbi ti duti na mara ti bango ti prophète Habakuk, so lo hunda lani na Jéhovah lo tene: “Teti nyen Mo sara si mbi bâ sioye, na mbi bâ vundu tongaso?” (Hab. 1:3; 2 Tim. 3:1, 13). Ti gbu li na ndo ti tokua ti Habakuk nga na tapande ti mabe ti lo ayeke mû maboko na e ti ngbâ ti ku lango ti fango ngbanga ti Jéhovah.—2 Pi. 3:7.
2. Tongana nyen la laso e lingbi ti fa so e yeke na mabe?
2 Duti na mabe: A hon ti tene lo zia si aye ti sioni ni so ahon ndo ti lo, Habakuk alango pëpe na lege ti yingo nga lo ngbâ lakue ti sara kua ti Jéhovah (Hab. 2:1). Ti dë bê ti prophète ti lo, Jéhovah atene so atënë ti Lo ayeke si tâ gi na ngoi ni nga so “zo ti mbilimbili ayeke na fini na lege ti mabe ti lo.” (Hab. 2:2-4). Ye so aye ti fa nyen na e so e ga nduru mingi na futingo ti sioni dunia so? Kota ye ni ayeke pëpe ti hinga lango so futingo ni ayeke si ande na ni me ti hinga so nyen na nyen ayeke si ande. Mabe ayeke mû maboko na e ti tene lê ti e akpengba na ti zia kua ti fango tënë na kozo ndo.—aHéb. 10:38, 39.
3. Ngbanga ti nyen a lingbi e ngbâ ti sara na Jéhovah na ngia?
3 Dekongo na ngia ndali ti Jéhovah: Na ngoi so Gog ti Magog ayeke sara bira na awakua ti Jéhovah, mabe ti e ayeke duti ande na yâ ti tara (Ézéch. 38:2, 10-12). Bira ayeke ga na kpale, même na ala so asö benda na peko ti bira ni. Warango kobe alingbi ti ga ngangu, azo alingbi ti girisa akungba ti ala nga ala lingbi ti duti nzoni tongana ti kozo ape. E yeke sara ande ye tongana nyen na ngoi so akpale asi? Habakuk aku tere ti lo lani na aye ti ngangu, me lo leke na bê ti lo ti ngbâ ti sara na Jéhovah na ngia (Hab. 3:16-19). ‘Ngia ti Jéhovah’ ayeke mû ande maboko na e ti gbu ngangu na yâ ti atara so ayeke ga.—Néh. 8:10; aHéb. 12:2.
4. Ye ti nzoni wa la e lingbi ti wara ni laso nga na yâ ti ngoi so ayeke ga?
4 Ala so Jéhovah abata ala na lango ti fango ngbanga ti lo ayeke ngbâ ande ti wara fango lege ti lo na yâ ti fini ti ala (Hab. 2:14). Ala so a zingo ala na kuâ nga kue ayeke manda ande ye na ndo ti Jéhovah. Me ti fadeso, a lingbi e gbu alege kue so azi na e ti sara tënë na ndo ti Jéhovah nga na apendere kusala ti lo.—Ps. 34:2; 71:17.