GIGI TI E TI CHRÉTIEN
Mo yeke nduru ti sû demande ti Ekole ti awafango nzoni tënë ti Royaume?
Mo yeke na popo ti ngu 23 ti sa na ngu 65, nga mo yeke na yâ ti kua ti ngoi kue? Mo yeke na nzoni seni, nga mo lingbi ti fa tënë na ndo so bezoin ti awafango tënë ayeke dä mingi? Tongana mo tene en, eskê mo pensé awe ti sû demande ti Ekole ti awafango nzoni tënë ti Royaume? Ngbene ye na kozo klase ni ti ga na ni, acouple nga na aita-koli na aita-wali so ayeke kumbamba saki mingi asû demande ni. Ye oko, e yeke encore na bezoin mingi ti aita-koli so ayeke kumbamba ti sû demande ni. Hunda na Jéhovah ti zia na yâ ti bê ti mo nzara ti sarango kua ti lo mingi nga ti mû tapande ti Molenge ti lo (Ps 40:8; Mt 20:28; aHb 10:7). Na pekoni gi ti bâ wala mo lingbi ti zia lege ti ambeni kua so mo yeke na ni ti sû demande ni.
Ambeni kua wa la na yâ ti bungbi lege ayeke zi na aita so awara diplôme ti ekole ni ti sara? A tokua ambeni na ando so a yeke tene ambeni yanga ti kodro nde dä wala ti fa tënë na ando so azo ayeke dä mingi na yâ ti akota gbata, ambeni aga asuppléant ti asurveillant ti circonscription, asurveillant ti circonscription wala amissionnaire. Tongana mo yeke gbu li ti mo na ndö ti akua so mo lingbi ti sara na yâ ti bungbi ti Jéhovah, tënë ti bê ti mo apeut ti gue oko na ti prophète Ésaïe so lo tene: “Mbi la! Tokua mbi!”—És 6:8.
BÂ VIDÉO AMISSIONNAIRE: AWAKUA TI FANGO LÊ TI KOBE, NA PEKONI KIRI TËNË NA AHUNDA SO:
A yeke soro aita ti ga missionnaire tongana nyen?
Nzoni kua wa la amissionnaire ayeke sara?
Ambeni nzoni ye wa la amissionnaire awara na yâ ti kua ti ala?