Mû maboko na azo so mo yeke manda Bible na ala ti wara batême

1. Nyen la adisciple ti Jésus atene lani na gbâ ti azo ti sara?

GBÂ ti akoli na awali aga na Jérusalem. Ala londo na akodro nde nde, nga ala yeke tene ayanga ti kodro nde nde. Mbeni kpengba ye asi na lango ni so. Hio tongaso, ambeni Juif akomanse ti tene yanga ti kodro ti azo so aga so. Ye so asi so adö bê ti azo ni, me tënë so aJuif ayeke tene na ala nga tënë so bazengele Pierre atene na ala kue adö bê ti ala mingi. Gbâ ti azo ni amanda so a peut ti sö ala tongana ala mä na bê na Jésus Christ. Tënë so andu bê ti azo ni mingi, ni la ala hunda ndo, atene: “A lingbi e sara nyen?” Pierre atene na ala: “Zia a batize ala oko oko.”—Kus. 2:37, 38.

2. Nyen la e yeke bâ na yâ ti article so? (Bâ foto ti couverture ni.)

² Ye so asi na pekoni apika bê ti zo mingi. Na lango ni so, azo 3 000 tongaso awara batême, na ala ga adisciple ti Christ. So ayeke lani tongo nda ti kota kua ti sarango adisciple so Jésus amû yanga na adisciple ti lo ti sara. A ngbâ ti sara kua so juska laso. Laso, e lingbi pëpe ti gue na mbeni zo na batême na peko ti so e sara lisoro na lo gï teti kete ngbonga. A peut ti sara anze mingi wala même ngu oko wala ahon so ti tene mbeni zo so ayeke manda Bible awara batême. Kua ti sarango adisciple ayeke kete kua ape. Tongana mo komanse ti manda Bible na mbeni zo ade ti ninga ape, mo hinga so tënë so ayeke tâ tënë. Na yâ ti article so, e yeke bâ aye so mo peut ti sara ti mû maboko na zo so mo yeke manda Bible na lo ti ga mbeni disciple so awara batême.

AIDÉ ZO NI TI SARA YE ALINGBI NA AYE SO LO MANDA

3. Tongana ti so a fa na Matthieu 28:19, 20, nyen la a lingbi zo so e yeke manda Bible na lo asara ti wara batême?

³ Kozo ti tene mbeni zo so ayeke manda Bible awara batême, a lingbi lo sara ye alingbi na aye so Bible afa. (Diko Matthieu 28:19, 20.) Tongana zo ni ayeke sara ye alingbi na aye so lo yeke manda, lo yeke ga tongana ‘zo so asara ye na ndara’ ti yâ ti toli ti Jésus so azi dû alï na lo leke da ti lo na ndö ti kota tênë (Matt. 7:24, 25; Luc 6:47, 48). Tongana nyen la e peut ti aidé lo ti sara ye alingbi na aye so lo yeke manda? Zia e bâ aye ota so e peut ti sara.

4. Tongana nyen la e peut ti aidé zo so e yeke manda Bible na lo ti gue na li ni ti wara batême? (Bâ nga encadré “Aidé zo so mo yeke manda Bible na lo ti gi ti sara ambeni ye nga ti sara ni.”)

⁴ Aidé lo ti zia ambeni ye na gbele lo. Ngbanga ti nyen? Bâ tapande so: Tongana mo yeke gue na mbeni yongoro tambela, peut-être mo yeke luti na ambeni ndo so ayeke pendere. Tongana mo sara tongaso, ndo so mo yeke gue dä ayeke yo na lê ti mo mingi ape. Legeoko nga, tongana mbeni zo so ayeke manda Bible azia na gbele lo ambeni ye so ayeke mû ngoi ape ti si dä na lo si dä, peut-être lo yeke bâ so lo peut ti gue na li ni juska na batême. Sara kua na mbage “Gi ti sara ye so” so ayeke na yâ ti buku Ngbâ na fini lakue lakue! ti mû maboko na lo ti gue na li ni. Na hunzingo ti ye ti manda oko oko, sara lisoro na lo ti hinga tongana nyen la ye so a hunda na lo ti gi ti sara ayeke aidé lo ti sara ye alingbi na ye so lo londo ti manda. Tongana mo yeke na mbeni ye nde so mo ye ti tene zo ni agi ti sara, sû ni na mbeti na place so atene “Mbeni ye nde ti sara.” Lakue tongana ala si na place so, sara lisoro na zo ni ti bâ aye so lo zia na gbele lo ti si dä so ahunda ngoi mingi ape na ati so ahunda ngoi mingi.

5. Tongana ti so a fa na Marc 10:17-22, nyen la Jésus ahunda na mbeni koli so ayeke zo ti mosoro ti sara? Ngbanga ti nyen?

⁵ Aidé lo ti sara achangement na yâ ti fini ti lo. (Diko Marc 10:17-22.) Jésus ahinga lani so a yeke duti ngangu na mbeni zo ti mosoro ti kä aye ti lo kue (Marc 10:23). Me Jésus atene na koli so ti sara kota changement so na yâ ti fini ti lo. Ngbanga ti nyen? Ngbanga ti so Jésus aye lo. Na ambeni ngoi, peut-être e wa pëpe zo so e yeke manda Bible na lo ti sara ye alingbi na ye so lo manda ndali ti so e bâ so lo yeke nduru ape ti sara changement so lo bezoin ti sara. Peut-être a yeke hunda ngoi na azo ti sara achangement na ti yü fini zo (aCol. 3:9, 10). Me tongana hio mo sara lisoro na lo polele na ndö ti changement so lo bezoin ti sara, hio lo peut ti komanse ti sara ni. Tongana mo sara tongaso, mo fa so mo pensé na lo.—Ps. 141:5; aProv. 27:17.

6. Ngbanga ti nyen la e doit ti hunda atënë so apusu zo ti fa atënë ti bê ti lo?

⁶ A yeke kota ye ti hunda zo so e yeke manda Bible na lo ti hinga bango ndo ti lo na ndö ti mbeni tënë. Ye so ayeke aidé mo ti hinga aye so lo comprendre nga lo mä na bê na ni. Tongana mo sara tongaso lakue, a yeke duti ngangu na mo ape ti sara lisoro na lo na ndö ti atënë so peut-être a yeke duti ngangu na lo ti yeda na ni. Na yâ ti buku Ngbâ na fini lakue lakue!, mo yeke wara gbâ ti ahunda so apusu zo ti fa bango ndo ti lo. Na tapande, na ye ti manda 04, mo yeke wara hunda so: “Mo pensé tongana mo di iri ti Jéhovah, a yeke sara lo tongana nyen?” Na ye ti manda 09, mo yeke wara hunda so: “Ambeni ye wa la mo ye ti sambela ndali ni?” Na tongo nda ni, a peut ti duti ngangu na zo so mo yeke manda Bible na lo ti kiri tënë na ahunda so. Mo peut ti aidé lo ti gbu li na ndö ti aversê nga na afoto so ayeke na yâ ti buku ni.

7. Tongana nyen la e peut ti sara kua nzoni na aye so asi na aita?

⁷ Tongana zo so mo yeke manda Bible na lo ahinga awe ye so lo doit ti sara, sara kua na aye so asi na aita ti wa lo ti sara ni. Na tapande, tongana a yeke ngangu na lo ti ga na abungbi, mo peut ti fa na lo vidéo Jéhovah abâ lege ti mbi na mbage “Gi nda ti ye” so ayeke na yâ ti ye ti manda 14. Na yâ ti gbâ ti aye ti manda so ayeke na yâ ti buku Ngbâ na fini lakue lakue!, mo yeke wara aye so asi na aita na mbage “Gi ti hinga aye mingi” wala “Gi nda ti ye”.b Hange, haka pëpe zo so mo yeke manda ye na lo na mbeni zo nde na lege so mo tene: “So lo sara ni, mo kue mo peut ti sara ni.” Zia si zo ni wani la atene tongaso. Sara lisoro na ndö ti akota ye so amû maboko na zo ti yâ ti vidéo ni ti sara ye alingbi na afango ye ti Bible. Peut-être mo peut ti fa mbeni kpengba versê wala mbeni nzoni ye so zo ni asara. Lakue tongana lege ayeke dä, fa tongana nyen la Jéhovah a-aidé zo ni.

8. Tongana nyen la e peut ti aidé zo so e yeke manda Bible na lo ti ye Jéhovah?

⁸ Aidé lo ti ye Jéhovah. Mo peut ti sara ni tongana nyen? Gi alege ti gboto lê ti lo na ndö ti asarango ye ti Jéhovah. Aidé lo ti bâ Jéhovah tongana Nzapa so ayeke na ngia so ayeke mû maboko na azo so aye lo (1 Tim. 1:11; aHéb. 11:6). Fa na lo so tongana lo sara ye alingbi na aye so lo yeke manda, lo yeke bâ nzoni dä nga so aye ti nzoni ni so afa so Jéhovah aye lo (És. 48:17, 18). Tongana lo ye Jéhovah mingi ayeke pusu lo ti sara achangement so lo bezoin ti sara.—1 Jean 5:3.

FA LO NA AITA

9. Ti gue oko na Marc 10:29, 30, nyen la apeut ti aidé mbeni zo ti sara asacrifice ti wara batême?

⁹ Ti tene mbeni zo so ayeke manda Bible ague na li ni juska na batême, a lingbi lo sara asacrifice. Tongana ti zo ti mosoro so e sara tënë ti lo fade, ambeni zo so ayeke manda Bible abezoin peut-être ti dö ambeni ye ti ala ti zia. Tongana kua so ala yeke sara ague nde na amama-ndia ti Bible, ala doit même ti changé ni. Ala mingi adoit ti zia ti sara kamarade na azo so aye Jéhovah ape. Ti ambeni, afami ti ala so aye aTémoin ti Jéhovah ape apeut ti ke ala. Jésus atene lani so a lingbi ti duti ngangu na ambeni zo ti sara asacrifice tongaso. Me lo mû zendo so vundu ayeke sara pëpe azo so amû peko ti lo. Jéhovah ayeke futa ala na lege so lo mû na ala sewa ti aita so aye ala. (Diko Marc 10:29, 30.) Tongana nyen la mo peut ti aidé zo so mo yeke manda Bible na lo ti bâ nzoni na lege ti pendere cadeau so?

10. Nyen la mo manda na lege ti ye so asi na Manuel?

¹⁰ Ga kamarade ti zo so mo yeke manda Bible na lo. A yeke kota ye ti fa na zo so mo yeke manda Bible na lo so mo pensé na lo. Ngbanga ti nyen? Bâ tënë so Manuel, so ayeke na Mexique, atene. Lo fa tongana nyen la zo so ayeke manda Bible na lo lani a-aidé lo, lo tene: “Lakue kozo na étude ni, lo yeke hunda mbi wala mbi yeke nzoni. Lo aidé mbi ti gi bê ti mbi ape nga lo mû lege na mbi ti sara tënë na lo na ndö ti aye kue. Mbi bâ so lo pensé na mbi biani.”

11. Tongana e na azo so e yeke manda Bible na ala e mû ngoi ti sara ambeni ye, nzoni ti nyen la ala yeke wara dä?

¹¹ Mû ngoi ti tene mo na zo so mo yeke manda Bible na lo asara ambeni ye tongana ti so Jésus na adisciple ti lo asara lani (Jean 3:22). Tongana lo sara achangement na yâ ti fini ti lo, mo peut ti tisa lo na ndo ti mo ti nyon mbeni ye wala ti te mbeni ye wala ti bâ mbeni kapa ti Télé JW so ayeke sigi nze oko oko. A yeke nzere na lo mingi tongana mo tisa lo na ngoi so akamarade ti lo nga na afami ti lo ayeke sara mbeni matanga ti dunia so na lo bâ so lo yeke gï lo oko. Kazibwe, so ayeke na Ouganda, atene: “Mbi pensé so aye so mbi manda lani na ndö ti Jéhovah na ngoi so mbi na zo so ayeke manda Bible na mbi e sara ambeni ye nde ayeke mingi tongana ti ngoi so e yeke manda Bible. Mbi bâ so Jéhovah ayeke pensé na azo ti lo mingi nga ala yeke na ngia mingi. Mbi kue mbi ye ti duti na popo ti ala.”

12. Ngbanga ti nyen la a yeke nzoni e gue na aita nde nde ti manda ye na zo ni?

¹² Tisa aita nde nde ti tene mo na ala ague amanda Bible na zo ni. Na ambeni ngoi, e peut ti bâ so a yeke ngangu ape ti tene e oko e gue wala e na même ita e gue. Atâa so a yeke ngangu ape ti sara tongaso, tongana na ambeni ngoi e na aita nde nde la e gue ayeke aidé zo ni mingi. Dimitrii, so ayeke na Moldavie, atene: “Ita oko oko kue so aga na étude ti mbi afa nda ti aye na mbeni lege so ayeke nde. Ye so a-aidé lani mbi ti bâ mbage so e yeke manda ni na mbeni fason nde. A mû nga lani maboko na mbi ti sara kamene mingi ape na kozo guengo ti mbi na bungbi ndali ti so mbi hinga aita mingi awe.”

13. Ngbanga ti nyen la a lingbi e aidé zo so e yeke manda Bible na lo ti gue na bungbi?

¹³ Aidé lo ti gue na abungbi. Ngbanga ti nyen? Ngbanga ti so Jéhovah ahunda na awakua ti lo ti bungbi ndo oko; a yeke mbeni ye so e yeke sara ti voro lo (aHéb. 10:24, 25). Na ndö ni, aita ti congrégation aga tongana afami ti e. Na ngoi so e na ala e yeke sara bungbi, a yeke mo bâ mo tene e na ala e yeke te mbeni pendere kobe. Tongana mo aidé zo so mo yeke manda Bible na lo ti gue na bungbi, mo yeke aidé lo ti sara mbeni kpengba ye so ayeke gue na lo na batême. Me a peut ti duti ngangu na lo ti komanse ti ga na bungbi. Tongana nyen la buku Ngbâ na fini lakue lakue! apeut ti aidé lo ti hon ndö ti ye so akanga lege na lo ti ga na bungbi?

14. Tongana nyen la e peut ti zia nzara ti gango na abungbi na yâ ti zo so e yeke manda Bible na lo?

¹⁴ Sara kua na ye ti manda 10 ti buku Ngbâ na fini lakue lakue! ti zia nzara ti gango na abungbi na yâ ti lo. Kozo ti tene a sigi na buku so, a hunda lani na ambeni ita ti sara kua na ye ti manda so ti zia nzara ti gango na bungbi na yâ ti azo so ala yeke manda Bible na ala. Aita ni atene so a mû maboko na azo ni nzoni mingi. Me, ku pëpe juska ala si na ye ti manda 10 awe si mo tisa zo ni ti ga na bungbi. Tongana lege ayeke dä, tisa lo hio nga ngbâ ti sara ni. Akpale ti azo so ayeke manda Bible ayeke nde nde. Gi ti hinga abezoin ti zo so mo yeke manda Bible na lo nga bâ tongana nyen la mo peut ti aidé lo. Tongana ade lo komanse ti ga na bungbi ape, découragé ape. Kanga bê nga ngbâ ti tisa lo.

AIDÉ LO TI SARA MBETO APE

15. Nyen la zo so e yeke manda Bible na lo apeut ti sara mbeto ni?

¹⁵ Mo dabe ti mo so ti ga Témoin ti Jéhovah asara lani mo mbeto kete? Peut-être mo bâ lani so mo peut lâ oko ti fa tënë ape. Wala peut-être mo sara lani mbeto ti tene afami wala akamarade ti mo akanga lege na mo. Tongana a yeke tongaso, mo peut ti comprendre zo so mo yeke manda Bible na lo. Jésus atene lani so mara ti mbeto tongaso ayeke sara ambeni zo. Me, lo tene na adisciple ti lo ti zia pëpe si mbeto akanga lege na ala ti sara na Jéhovah (Mat. 10:16, 17, 27, 28). Tongana nyen la Jésus a-aidé lani adisciple ti lo ti hon ndö ti mbeto ti ala? Tongana nyen la e peut ti mû tapande ti lo?

16. Tongana nyen la e peut ti fa na zo so e yeke manda Bible na lo ti fa na azo aye so lo yeke manda?

¹⁶ Fa na lo yeke yeke ti fa na azo aye so lo mä na bê na ni. Na ngoi so Jésus atokua lani adisciple ti lo ti fa tënë, peut-être mbeto asara ala. Me Jésus amû lani maboko na ala na lege so lo fa na ala azo so ala yeke fa tënë na ala nga na tënë so ala yeke fa (Mat. 10:5-7). Mo peut ti mû tapande ti Jésus tongana nyen? Aidé zo so mo yeke manda Bible na lo ti hinga azo so lo peut ti fa tënë na ala. Na tapande, hunda lo wala lo hinga mbeni zo so mbeni tâ tënë ti Bible so lo manda apeut ti aidé lo. Na pekoni, aidé lo ti leke tënë so lo peut ti tene ni na mbeni lege so akpengba ape. Tongana mo bâ so a yeke nzoni ti sara ni, mo peut ti sara kua na mbage “Ambeni zo atene” nga na “Ambeni zo apeut ti hunda mo atene” so ayeke na yâ ti buku Ngbâ na fini lakue lakue! ti fa na lo tongana nyen la lo peut ti fa tënë. Na ngoi so mo yeke sara ni, fa na lo ti sara kua na Bible ti mû akiringo tënë so akpengba ape nga ti sara ni na ndara.

17. Tongana nyen la e peut ti sara kua na Matthieu 10:19, 20, 29-31 ti aidé zo so e yeke manda Bible na lo ti sara confiance na Jéhovah?

¹⁷ Aidé lo ti sara confiance na Jéhovah. Jésus atene na adisciple ti lo so Jéhovah ayeke aidé ala ndali ti so Lo ye ala. (Diko Matthieu 10:19, 20, 29-31.) Tene na lo so Jéhovah ayeke aidé nga lo. Mo peut ti aidé lo ti zia bê ti lo na Jéhovah na lege so mo sambela legeoko na lo na ndö ti aye so lo leke ti sara. Franciszek, so ayeke na Pologne, atene: “Zo so ayeke manda ye na mbi ayeke fa lani lakue na yâ ti sambela aye so mbi leke ti sara. So mbi bâ so Jéhovah akiri tënë na asambela ti lo, hio mbi komanse ti sambela. Mbi bâ lani mungo maboko ti Jéhovah na ngoi so mbi bezoin ti mû congé na fini place ti kua ti mbi ti gue na abungbi nga na kota bungbi.”

18. Jéhovah apensé nyen na ndö ti kua ti fango ye so aChrétien ayeke sara?

¹⁸ Jéhovah apensé mingi na azo so e yeke manda Bible na ala. Lo hinga tongana nyen la aChrétien ayeke sara ngangu ti fa ye na azo ti mû maboko na ala ti ga nduru mingi na lo, na lo ye ala ndali ni (És. 52:7). Tongana ti ndembe so mo yeke manda Bible na mbeni zo ape, mo peut ti ngbâ ti aidé azo so ayeke manda Bible ti gue na li ni juska na batême na lege so mo na aita ayeke gue ti sara étude ti ala.