Eskê mbeni lâ bibe ti kengo zo ayeke hunzi ande biani biani?

NZAPA AYEKE ZI ANDE AYE SO AYEKE NA GUNDA TI BIBE TI KENGO ZO

1. 1. SATAN ZABOLO. Satan, mbeni ange so asara kpengbango-li, la asara si azo ayeke na bibe ti kengo zo so e yeke bâ laso. Nzapa ayeke futi ande Satan nga na azo kue so ake amba ti ala tongana lo.​—Psaume 37:38; aRomain 16:20.

2. 2. DUNIA TI SATAN. Nzapa ayeke zi ande aye ti sioni kue so ayeke maï bibe ti kengo zo, so na popo ni ayeke wara azo ti poroso so aye goro, akota zo ti bungbi ti nzapa nga na abungbi ti dengo buze so ayeke sara bê ti ye, ayeke pete goro na ayeke wara go na ndö ti azo.​—2 Pierre 3:13.

3. 3. SIOKPARI SO AYEKE NA TERÊ TI E AZO. Bible afa so a dü e dungo na siokpari na terê ti e, mingi ni a yeke sara ngangu na ndö ti pensé ti e na e yeke sara ye ti sioni (aRomain 5:12). Mbeni oko ti aye ni ayeke bibe ti kengo ambeni zo. Nzapa ayeke aidé ande e ti zi asioni bibe ti kengo zo kue so e yeke na ni, na pekoni bibe ti kengo zo ayeke hunzi ande biani biani.​—Ésaïe 54:13.

BIBLE AMÛ ZENDO TI MBENI DUNIA SO BIBE TI KENGO ZO AYEKE ANDE DÄ APE

1. 1. INJUSTICE AYEKE DUTI ANDE DÄ APE. Royaume ti Nzapa so ayeke na yayu ayeke komande ande dunia kue, na gï gouvernement so la ayeke ngbâ lakue lakue (Daniel 2:44). Kengo zo senge senge nga kangango bê na zo ape ayeke hunzi ande. Nzapa ayeke leke ande akpale ti injustice kue so azo ayeke tingbi na ni laso.​—Luc 18:7.

2. 2. AZO KUE AYEKE DUTI ANDE NA SIRIRI. Zo oko ayeke bâ ande pasi ape ndali ti sarango ye ti ngangu wala bira (Psaume 46:9). Azo na ndö ti sese kue ayeke duti ande na siriri nga na sécurité.​—Psaume 72:7.

3. 3. AZO KUE AYEKE VIVRE ANDE NZONI. Azo kue so ayeke na ndö ti sese ayeke ye ande amba ti ala (Matthieu 22:39). Zo oko ayeke bâ ande pasi ape, na même ti pensé na aye ti sioni wala ti rappelé na ni (Ésaïe 65:17). Na ngoi ni so, bibe ti kengo zo ayeke duti ande dä ape, azo ayeke “duti na ngia mingi na yâ ti siriri so amû ndo.”​—Psaume 37:11.

Eskê mo ye ti vivre na yâ ti mara ti dunia tongaso? Même laso, mingi ti azo ayeke manda ti zia lege ti bibe ti kengo zo grâce na sarango ye alingbi na amama-ndia ti Bible (Psaume 37:8). A yeke ye so aTémoin ti Jéhovah na yâ ti dunia kue ayeke sara la. Atâa so ala londo na ando nde nde nga ngobo ti ala ayeke nde nde, ala yeke beoko nga ala ndoye terê na popo ti ala.​—Ésaïe 2:2-4.

A yeke nzere na aTémoin ti Jéhovah ti fa na azo aye so ala manda so a-aidé ala ti hon ndö ti tënë ti injustice nga na tënë ti mara. Ye so mo manda apeut ti aidé mo yeke yeke ti zia lege ti kengo zo nga ti tene mo komanse ti ye azo. Mo peut ti manda ti sara ye na nzoni bê na azo kue, même ala so na bango ni ala yeke kiri singila ape wala so aye amba ti ala ape. Ye ti peko ni ayeke so, mo yeke duti na ngia laso nga songo ti mo na amba ti mo ayeke ga nzoni ahon ti kozo. Me ye so ayeke kota mingi ayeke so, aye so mo manda ayeke aidé mo ti hinga ye so mo peut ti sara ti vivre ande na gbe ti Royaume ti Nzapa so na ngoi ni ande bibe ti kengo zo ayeke hunzi biani biani.​—Psaume 37:29.