Aye so e peut ti sara ti ngbâ ti ye terê mingi

1-2. (a) Ngbanga ti nyen la bazengele Paul atene so ndoye ayeke “kota mingi”? (b) Ahunda wa la e yeke kiri tënë na ni?

NA NGOI so bazengele Paul ayeke sara lani tënë na ndö ti mabe, beku nga na ndoye, lo tene so ‘ndoye ayeke kota mingi.’ (1 aCor. 13:13). Paul atene tongaso ngbanga ti nyen? Na yâ ti angoi so ayeke ga, e yeke duti ande na bezoin ape ti duti na mabe na azendo ti Nzapa na ndö ti fini dunia wala ti duti na beku so azendo so ayeke ga ande tâ tënë ndali ti so a ga tâ tënë awe. Me e yeke duti lakue na bezoin ti ye Jéhovah nga na azo. Ti vrai ni, e yeke gi ti ngbâ ti ye ala lakue.

² So e yeke duti ande lakue na bezoin ti ye terê, e yeke bâ ahunda ota. Kozo ni, ngbanga ti nyen la a yeke nzoni e ye terê? Use ni, tongana nyen la e yeke fa so e ye terê? Ota ni, tongana nyen la e peut ti ngbâ ti ye mba ngangu?

NGBANGA TI NYEN LA A YEKE NZONI E YE TERÊ?

3. Araison wa la ndali ni e doit ti ye terê?

³ Ngbanga ti nyen la a yeke kota ye ti tene e ye terê? Tongana e ye aita ti e, e fa so e yeke atâ Chrétien. Jésus atene na abazengele ti lo, atene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:35). Nga, tongana e ye terê, a yeke aidé e ti ngbâ ti duti beoko. Paul atene so ndoye ayeke “kamba so abungbi ye mbilimbili.” (aCol. 3:14). Me mbeni kota raison ayeke dä so ndali ni a yeke nzoni e ye terê. Bazengele Jean atene na aita, atene: “Zo so andoye Nzapa, a lingbi lo ndoye ita ti lo nga.” (1 Jean 4:21). Tongana e ye aita ti e, e fa nga so e ye Nzapa.

4-5. Mû mbeni tapande ti fa tongana nyen la ti ye Nzapa nga ti ye aita ague oko.

⁴ Tongana nyen la ti ye Nzapa ague oko na yengo aita? Na tapande, bâ kamba so ayeke na popo ti bê ti e nga na tanga ti terê ti e. Tongana mbeni docteur ayeke pete veine ti maboko ti e, a peut ti aidé lo ti hinga ye na ndö ti bê ti e. Nyen la e peut ti manda na lege ti tapande so?

⁵ Tongana mbeni docteur apete veine ti maboko ti e, lo peut ti hinga wala bê ti e ayeke na kpale wala pëpe. Legeoko nga, e peut ti hinga wala e ye Nzapa mingi tongana e bâ so e ye aita mingi. Tongana e bâ so e ye aita ti e tongana ti kozo ape, ye so apeut ti fa so ndoye ti e na mbage ti Nzapa akiri nga na peko. Tongana e fa lakue na aita so e ye ala, e yeke hinga so e ngbâ ti ye Nzapa mingi.

6. Tongana e ye aita tongana ti kozo ape, ngbanga ti nyen la a yeke mbeni kota kpale? (1 Jean 4:​7-9, 11).

⁶ Tongana e ye aita tongana ti kozo ape, a yeke mbeni kota kpale. Ngbanga ti nyen? Ngbanga ti so songo ti e na Jéhovah ayeke tongana ti kozo encore ape. Bazengele Jean afa ni polele na ngoi so lo dabe ti e, lo tene: “Zo so andoye ita ti lo pëpe, ita ti lo so lo bâ lo, lo lingbi pëpe ti ndoye Nzapa so lo bâ lo pëpe.” (1 Jean 4:20). Nyen la e peut ti manda dä? E yeke zia ngia na bê ti Jéhovah gï tongana e “ndoye terê na popo ti e.”—Diko 1 Jean 4:​7-9, 11.

TONGANA NYEN LA E YEKE FA SO E YE TERÊ?

7-8. Na ambeni lege wa la e peut ti fa so e ye terê?

⁷ E wara na yâ ti Bible fani mingi commandement so atene na e ti “ndoye terê na popo ti [e].” (Jean 15:​12, 17; aRom. 13:8; 1 aThes. 4:9; 1 Pi. 1:22; 1 Jean 4:11). Me, ndoye ayeke mbeni ye so ayeke na yâ ti bê ti e, zo apeut ti bâ ni ape. Tongaso, tongana nyen la e peut ti fa na amba ti e so e ye ala? E peut ti fa ni na lege ti atënë ti e nga na sarango ye ti e.

⁸ Alege ayeke mingi so na yâ ni e peut ti fa na aita ti e so e ye ala. Bâ ambeni tapande ni: “Ala tene tâ tënë na mba.” (Zach. 8:16). “Ala duti lakue na siriri na popo ti ala.” (Marc 9:50). ‘Ala duti azo so amû li ni kozo ti ne mba na popo ti ala.’ (aRom. 12:10). “Ala yamba terê na popo ti ala.” (aRom. 15:7). “Ala ngbâ ti . . . pardonné mba.” (aCol. 3:13). “Ala ngbâ ti yô aye so ane amba ti ala na popo ti ala.” (aGal. 6:2). “Ala ngbâ ti dë bê ti mba.” (1 aThes. 4:18). “Ala ngbâ ti . . . kpengba mba.” (1 aThes. 5:11). “Ala sambela ndali ti amba ti ala.”—Jacq. 5:16.

9. Ngbanga ti nyen la ti dë bê ti azo ayeke mbeni kota ye so afa so e ye ala? (Bâ nga foto.)

⁹ Zia e gbu li na ndö ti mbeni fason so e peut ti fa so e ye azo, so a sara tënë ni na yâ ti paragraphe so ahon. E yeke bâ wango ti Paul so lo tene: “Ala ngbâ ti dë bê ti mba.” Ngbanga ti nyen la ti dë bê ti azo ayeke mbeni kota ye so afa so e ye ala? Mbeni mbeti so asara commentaire na ndö ti Bible atene so tënë “dë bê” so Paul asara kua na ni aye ti tene “ti luti na terê ti mbeni zo ti kpengba lo na ngoi so lo wara ngangu tara.” Tongaso, na ngoi so e dë bê ti mbeni ita so ayeke bâ pasi, e yeke aidé lo ti ngbâ ti sara na Jéhovah be-ta-zo. Lakue tongana e dë bê ti mbeni ita, e fa so e ye lo.—2 aCor. 7:​6, 7, 13.

10. Kamba wa la ayeke na popo ti bango mawa ti zo nga na dengo bê?

¹⁰ Ti bâ mawa ti zo nga ti dë bê ti lo ayeke aye so ague tâ oko. Na lege wa? Zo so ayeke bâ mawa ti azo, bê ti lo ayeke pusu lo ti dë bê ti ala nga ti gi ti yapu pasi ti ala. Tongaso, kozoni, e yeke bâ mawa ti zo, na pekoni e yeke dë bê ti lo. Paul afa so, so Jéhovah abâ mawa ti azo ti lo apusu lo ti dë bê ti ala. Paul atene so Jéhovah ayeke “Babâ so ayeke sara nzoni bê mingi na zo nga Nzapa ti dengo bê kue”. (2 aCor. 1:3). Ge, Paul asara kua na tënë “sara nzoni bê mingi” ti fa bibe ti bango mawa ti zo. Tongaso, a iri Nzapa Babâ, wala Lo so sarango nzoni bê mingi alondo na lo, ndali ti so lo bâ mawa ti zo mingi. Bango mawa so apusu lo ti dë bê ti e “na yâ ti atara kue so e wara”. (2 aCor. 1:4). Legeoko tongana ti so nzoni ngu so asigi na mbeni li ti ngu ayeke dë bê ti azo so go ti ala ahule, Jéhovah ayeke dë bê ti azo so ayeke na yâ ti vundu. Tongana nyen la e peut ti mû tapande ti Jéhovah ti bâ mawa ti azo nga ti dë bê ti ala? Mbeni lege so e peut ti sara ni ayeke ti gi ti duti na asarango ye so ayeke aidé e ti bâ mawa ti azo nga ti dë bê ti ala. Ambeni sarango ye ni ayeke so wa?

11. Ti gue oko na aColossien 3:12 na 1 Pierre 3:​8, ambeni sarango ye wa la ayeke aidé e ti ye azo nga ti dë bê ti ala?

¹¹ Nyen la ayeke aidé e ti ngbâ ti ye terê nga ti “ngbâ ti dë bê ti mba” lâ na lâ? E bezoin ti hinga ti zia terê ti e na place ti mba, ti ye terê na popo ti e na yengo terê ti aita nga ti sara nzoni na zo. (Diko aColossien 3:12; 1 Pierre 3:8.) Asarango ye so ayeke aidé e tongana nyen? Tongana e bâ mawa ti aita ti e nga e pensé na ala biani, e yeke ye mingi ti dë bê ti ala na ngoi so ala yeke bâ pasi. Jésus atene: “Yanga ayeke sara tënë ti ye so asi singo na bê ti zo. Zo ti nzoni asigi na aye ti nzoni so ayeke na yâ ti nzoni mosoro ti lo.” (Mat. 12:​34, 35). Ti dë bê ti aita so abezoin dengo bê ayeke biani mbeni kpengba fason ti fa so e ye ala.

TONGANA NYEN LA E PEUT TI NGBÂ TI YE MBA NGANGU?

12. (a) Ngbanga ti nyen la e bezoin ti sara hange si e perdre ape ndoye ti e na mbage ti aita ti e? (b) Hunda wa la e yeke kiri tënë na ni fadeso?

¹² E kue e ye ti “ngbâ ti ndoye terê na popo ti e”. (1 Jean 4:7). Me, a yeke kota ye ti tene e girisa ape so Jésus atene lani so “ndoye ti mingi ti azo ni ayeke dë dengo.” (Mat. 24:12). Jésus aye lani ti tene ape so gbâ ti adisciple ti lo ayeke ye terê encore ape. Me, e bezoin ti sara hange si e komanse ti sara ye na ndoye ape na amba ti e, tongana ti azo ti dunia so. Zia e girisa tënë so ape; fadeso zia e kiri tënë na kpengba hunda so: Nyen la ayeke aidé e ti hinga so e ngbâ ti ye aita mingi?

13. Nyen la ayeke aidé e ti hinga so e ngbâ ti ye aita mingi?

¹³ Mbeni lege ti hinga wala ndoye ti e angbâ ngangu ayeke ti hinga tongana nyen la e yeke sara ye na yâ ti ambeni ye so asi (2 aCor. 8:8). Bazengele Pierre afa mbeni ye so apeut ti si, lo tene: “Kota ye ni kue ayeke ti tene ala ndoye terê ngangu na popo ti ala, ngbanga ti so ndoye akanga ndö ti asiokpari mingi.” (1 Pi. 4:8). Tongaso, sarango ye ti e na ngoi so aita ti e asara afaute wala ala sara aye so ason bê ti e ayeke aidé e ti hinga wala ndoye ti e na mbage ti ala angbâ ngangu.

14. Ti gue oko na 1 Pierre 4:​8, mara ti ndoye wa la e bezoin ni? Fa mbeni tapande ni.

¹⁴ Zia e gbu li nzoni na ndö ti atënë ti Pierre so. Kozo mbage ti versê 8 atene ti “ndoye terê ngangu” ayeke mara ti ndoye so e bezoin ni. Tënë “ngangu” so Pierre asara kua na ni ayeke mbeni tënë ti Grec so aye ti tene “ti gboto yâ ti mbeni ye.” Use mbage ti versê ni asara tënë ti ye so e yeke sara tongana e ndoye terê ngangu. Tongana e ndoye terê ngangu ayeke aidé e ti kanga ndö ti asiokpari ti aita ti e. Zia e mû mbeni tapande ti fa ni: Imaginé mbeni table so adû ayeke na ndö ni. Mo peut ti bi mbeni bongo na ndö ni ti kanga ndö ni kue, me pëpe gï mbeni mbage ni. Legeoko nga, tongana e ndoye aita ti e ngangu, e peut ti kanga ndö ti, wala ti pardonné, gï siokpari ti ala oko wala use ape, me “asiokpari mingi” so ala sara.

15. Tongana e ye aita ti e mingi, e yeke wara lege ti sara nyen? (aColossien 3:13).

¹⁵ Ndoye ti e ndali ti azo adoit ti duti ngangu mingi tongaso si e peut ti pardonné awokongo ti amba ti e aChrétien, même tongana a yeke ngangu mingi na e ti sara ni. (Diko aColossien 3:13.) Tongana e pardonné amba ti e, e yeke fa so e ye ala ngangu nga e ye ti zia ngia na bê ti Jéhovah. Mbeni ye nde wa la apeut ti aidé e ti pardonné afaute ti amba ti e nga ti tene bê ti e ason hio ape na terê ti ala?

16-17. Mbeni ye nde wa la ayeke aidé e ti hon na ndö ti akete faute ti amba ti e? Fa mbeni tapande ni. (Bâ nga foto.)

¹⁶ Bâ gï anzoni sarango ye ti aita, me asioni ni ape. Gbu li na ndö ti hakango ye so. Imaginé so mo na ambeni ita awara terê ti sara mbeni ngia. Ala sara ngia nzoni; na hunzingo ni ala sara mbeni foto. Mo kiri mo sara foto use ndali ti so kozo ni apeut ti sigi pendere ape. Fadeso mo yeke na afoto ota. Me na yâ ti mbeni foto ni, mo bâ so mbeni ita-koli ahe ngia ape. Nyen la mo yeke sara na foto so? Mo yeke zi ni ndali ti so mo yeke na afoto use so na yâ ni aita kue, même ita-koli ni, ayeke he ngia.

¹⁷ E peut ti haka afoto so e bata ni na aye so e bata na li ti e. Mingi ni, e bata na li anzoni ngoi so e na aita e passé ndo oko. Me bâ so na mbeni ngoi ni, mbeni ita atene mbeni tënë wala asara mbeni ye na nzoni bê ape. Nyen la a yeke nzoni e sara? A yeke nzoni e gi ti zi ni na yâ ti li ti e, tongana ti so e zi foto so (aProv. 19:11; aÉph. 4:32). E peut ti zi na yâ ti li ti e kete faute ti ita ti e ni ndali ti so e dabe ti e na gbâ ti anzoni ngoi so e na lo e passé. Mara ti anzoni ngoi ni so la e ye ti bata na li ti e.

NDANI SO LASO E BEZOIN MINGI TI YE TERÊ

18. Akota tënë wa la e bâ na yâ ti article so na ndö ti yengo terê?

¹⁸ Ngbanga ti nyen la e ye ti ngbâ ti ye terê mingi? Tongana ti so e bâ fade, tongana e ye aita ti e, e fa nga so e ye Jéhovah. Tongana nyen la e yeke fa so e ye aita ti e? Mbeni lege ni ayeke ti dë bê ti ala. E yeke wara lege ti “ngbâ ti dë bê ti mba” tongana e bâ mawa ti mba. Tongana nyen la e peut ti ngbâ ti ye terê ngangu? Tongana e pardonné afaute ti aita ti e même tongana a yeke ngangu na e ti sara ni.

19. Ngbanga ti nyen la a yeke mbilimbili kota ye laso ti fa so e ye aita ti e?

¹⁹ Ngbanga ti nyen la a yeke mbilimbili kota ye laso ti fa so e ye aita ti e? Bâ raison so Pierre afa, lo tene: “Nda ti aye kue aga nduru awe. Tongaso, . . . ala ndoye terê ngangu na popo ti ala.” (1 Pi. 4:​7, 8). Na ngoi so hunzingo ti sioni dunia so ayeke pusu nduru nduru, nyen la e peut ti ku ti tene a si? Jésus atene na ndö ti adisciple ti lo, lo tene: “Amara kue ayeke ke ala ndali ti iri ti mbi.” (Mat. 24:9). Ti ngbâ be-ta-zo na Jéhovah atâa so azo ake e, e bezoin ti ngbâ ti duti beoko. Tongana e ye aita ti e, Satan ayeke wara lege lâ oko ape ti kangbi popo ti e ndali ti so ndoye ayeke “kamba so abungbi ye mbilimbili.”—aCol. 3:14; aPhil. 2:​1, 2.