Aye so e peut ti sara ti duti tâ kamarade

ESKÊ a si na mo awe so mbeni zo ti mû maboko na mo na ngoi ti kpale ayeke dä ape? E yeke vivre na “angoi ti akpale so ayeke ngangu na zo ti kanga bê na yâ ni” so apeut ti sara si e découragé na e bâ so e yeke gï e oko (2 Tim. 3:1). Ye oko, tongana e yeke na akpale, azo ayeke dä so apeut ti aidé e. Bible afa so a yeke kota ye ti duti na atâ kamarade na “angoi ti vundu.”—aProv. 17:17.

AYE SO ATÂ KAMARADE APEUT TI SARA TI AIDÉ AMBA TI ALA

Bazengele Paul abâ nzoni lani na lege ti akamarade ti lo so lo na ala asara avoyage (aCol. 4:​7-11). Na ngoi so Paul ayeke lani na kanga na Rome, akamarade ti lo asara aye so lo peut ti sara ni lani ape. Na tapande, Épaphrodite amû na Paul aye so lo bezoin ni so aita ti Philippes atokua na lo (aPhil. 4:18). Tychique amû lani na acongrégation nde nde alettre so Paul atokua na ala (aCol. 4:7). Ndali ti so akamarade ti Paul amû maboko na lo, lo wara lege ti kpengba acongrégation même na ngoi so lo yeke sara kanga na da ti lo nga na ngoi so lo yeke na da ti kanga. Tongana nyen la mo peut ti duti mbeni nzoni kamarade laso?

Laso, aita ayeke dä so ayeke sara ye so akamarade apeut ti sara ti aidé amba ti ala. Bâ tapande ti mbeni ita-wali so afa so lo yeke tâ kamarade ndali ti Elisabet so ayeke pionnier permanent na Espagne. Na ngoi so a wara na terê ti mama ti Elisabet cancer so a peut ti soigné ni ape, ita-wali ni atokua gbâ ti amessage so lo zia aversê dä na Elisabet ti kpengba lo. Elisabet atene: “Amessage so amû na mbi ngangu na mbi bâ so mbi yeke gï mbi oko ape.”—aProv. 18:24.

E peut ti kpengba songo ti kamarade so ayeke na popo ti e na aita tongana e aidé ala ti fa tënë wala ti gue na abungbi. Na tapande, mo peut ti hunda na mbeni ita so ayeke mbakoro ti gue na lo na bungbi wala na fango tënë. Tongana mo sara tongaso, ala yeke kpengba mba (aRom. 1:12). Me ambeni ita ayeke gï na yanga-da. Tongana nyen la e peut ti duti tâ kamarade ndali ti ala?

AIDÉ AITA SO AYEKE GÏ NA YANGA-DA

Ambeni ita ayeke na akpale ti seni wala ambeni kpale nde so akanga lege na ala ti gue na abungbi. Bâ tapande ti David so ayeke na kobela ti cancer. A sara chimiothérapie na lo ahon nze omene. Na yâ ti anze ni so, David na wali ti lo Lidia asara bungbi na lege ti Internet.

Aita ti congrégation a-aidé ala tongana nyen? Na peko ti bungbi oko oko, ambeni ita so asara bungbi na Da ti Royaume ayeke sara effort ti sara lisoro na David na Lidia. Na ndö ni, tongana David na Lidia amû acommentaire, aita ayeke tokua amessage na ala ti kpengba ala. Ye ti peko ni ayeke nyen? David na Lidia abâ lani so ala yeke gï ala oko ape.

E peut ti fa tënë legeoko na mbeni ita so ayeke gï na yanga-da. E peut ti sara ambeni kete changement na yâ ti kapa ti e tongaso si e na lo e peut ti fa tënë legeoko. Tongana e sara tongaso, e yeke fa so e girisa ape aita so ayeke gï na yanga-da (aProv. 3:27). Peut-être mo peut ti leke ti tene mo na ala afa tënë na lege ti alettre wala téléphone. Peut-être aita so ayeke gï na yanga-da apeut ti sara abungbi ti fango tënë na lege ti vidéoconférence. David na Lidia akiri singila na aita ti congrégation ndali ti ye ni so. David atene: “Ti duti na groupe ti e ti fango tënë ti sara lisoro gï teti kete ngoi nga ti mä mbeni sambela akpengba e mingi.” Na ndö ni, peut-être mo peut ti sara étude ti mbeni zo so mo yeke manda Bible na lo na ndo ti mbeni ita so ayeke gï na yanga-da. Me hunda ita ni wala mo peut ti gue na zo ni kâ.

Tongana e mû ngoi ti duti na terê ti aita so ayeke gï na yanga-da, e yeke hinga ala nzoni, e yeke hinga apendere sarango ye ti ala nga songo ti e na ala ayeke kpengba mingi. Na tapande, tongana mo mä tongana nyen la ala yeke fa ye na mbeni zo na ala aidé zo ni ti ga nduru na Jéhovah, a yeke sara si mo ne ala mingi. Tongana mo aidé aita ti fa tënë nga ti gue na abungbi ayeke sara si mo wara afini kamarade.—2 aCor. 6:13.

Tite so ayeke kamarade ti Paul aduti lani na terê ti lo na lo dë bê ti lo (2 aCor. 7:​5-7). Tapande ti Tite afa na e so a yeke nzoni e tene atënë so adë bê ti aita ti e, me a yeke nga nzoni ti tene e mû ngoi ti duti na terê ti ala nga e aidé ala.—1 Jean 3:18.

AIDÉ AITA SO A YEKE SARA AYE TI NGANGU NA ALA

Aita ti Russie azia na e nzoni tapande na lege so ala yeke mû maboko na mba. Bâ ye so asi na Sergey na wali ti lo Tatyana. Na peko ti so azo ti lapolice afouillé da ti ala, ala hon na ti hunda atënë na ala. A zi Tatyana kozo, na lo kiri na yanga-da. Sergey atene: “Kete na peko ti so [Tatyana] asi na yanga-da, mbeni ita-wali so asara ye na mbeto ape aga ti bâ lo. Na pekoni, gbâ ti aita aga ti mû maboko na e ti leke yâ ti da ti e.”

Sergey akiri atene: “Mbeni versê so mbi ye ni mingi ayeke aProverbe 17:17 so atene: ‘Tâ kamarade aye mba ti lo na ngoi kue nga lo yeke mbeni ita so a dü lo ndali ti angoi ti vundu.’ Mbi ga ti bâ so atënë so ayeke biani tâ tënë na ngoi ti ye ti ngangu so, mbeni ngoi so a yeke ngangu na mbi ti gbu lê ni. Jéhovah amû na mbi akamarade so sân mbeto angbâ na terê ti mbi.”a

Laso, e yeke na bezoin ti mungo maboko ti akamarade ti e mingi na ngoi ti akpale. E yeke duti ande na bezoin ti ala mingi encore na ngoi ti kota ye ti vundu. Tongaso, zia e sara kue ti duti tâ kamarade ndali ti aita ti e laso.—1 Pi. 4:​7, 8.