Kiri na lango ti batême ti mo na peko ape

1. Ambeni nzoni raison ti wara batême ayeke so wa?

ESKÊ mo ye Jéhovah Nzapa so amû na mo anzoni matabisi kue, même fini ti mo? Eskê mo ye ti fa na lo so mo ye lo? Nzoni lege ti sara ni ayeke ti mû terê ti mo na lo nga ti wara batême. Tongana mo sara ni, mo yeke ga na yâ ti sewa ti Jéhovah. Tongaso, Jéhovah so ayeke Babâ ti mo nga Kamarade ti mo ayeke fa lege na mo nga lo yeke bâ lege ti mo ndali ti so mo yeke ti lo (Ps. 73:24; És. 43:​1, 2). Tongana mo mû terê ti mo na Jéhovah nga mo wara batême ayeke sara nga si mo duti na beku ti ngbâ na fini ti lakue lakue.—1 Pi. 3:21.

2. Nyen la e yeke bâ na yâ ti article so?

² Eskê mbeni ye asara si mo ye ti wara batême fafadeso ape? Tongana a yeke tongaso, mo yeke mo oko ape. Azo kutu mingi so aga kozo na mo adoit lani ti changé sarango ye ti ala nga na fason so ala yeke pensé na ni tongaso si ala lingbi ti wara batême. Fadeso, ala yeke sara na Jéhovah na ngia nga na yapungo terê. Nyen la mo peut ti manda na lege ti tapande ti ambeni zo so awara batême lani na ngoi ti akozo Chrétien? Zia e bâ akpale so ala wara lani nga na aye so e peut ti manda na lege ti tapande ti ala.

AZO TI SAMARIE AWARA LANI BÂTEME

3. Aye wa la apeut lani ti kanga lege na ambeni zo ti Samarie ti wara batême?

³ Azo ti Samarie ayeke lani na yâ ti mbeni bungbi ti vorongo nzapa na ngoi ti Jésus. Mingi ti azo ti Samarie ayeke lango lani na nord ti Judée. Kozo ti tene ala wara batême, ala doit lani ti hinga ye mingi na ndö ti mbeti ti Nzapa. Azo ti Samarie amä na bê lani so gï abuku oku ti Bible, Genèse ti si na Deutéronome nga peut-être na mbeti ti Josué la alondo na Nzapa. Me ti gue oko na zendo ti Nzapa so ayeke na Deutéronome 18:​18, 19, ala yeke ku lani gango ti Messie (Jean 4:25). Kozo ti wara batême, ala doit ti yeda so Jésus ayeke Messie so a mû zendo ti lo. “Azo ti Samarie mingi” asara lani tongaso. (Jean 4:39). Nga, ndali ti so mingi ti akozo Chrétien ayeke lani aJuif, peut-être ambeni zo ti Samarie adoit lani ti changé bango ndo ti ala na ndö ti ala.—Luc 9:​52-54.

4. Tongana ti so Kusala 8:​5, 6, 14 afa, ambeni zo ti Samarie asara ye lani tongana nyen na ngoi so Philippe afa tënë na ala?

⁴ Nyen la a-aidé lani azo ti Samarie ti wara batême? Na ngoi so Philippe, wafango nzoni tënë, “afa lani tënë na ndö ti Christ” na azo ti Samarie, ambeni “ayeda na tënë ti Nzapa”. (Diko Kusala 8:​5, 6, 14.) Ala ke lani ape ti mä Philippe atâa so lo yeke Juif. Peut-être ala dabe ti ala na aversê so afa so Nzapa asara kangbi na popo ti azo ape (Deut. 10:​17-19). Ala dengi mê lani na “aye so Philippe ayeke fa” na ndö ti Christ nga ala yeda so Nzapa la atokua lo. Philippe asara lani gbâ ti amiracle, na tapande, lo zi kobela na terê ti azo nga lo tomba asioni yingo.—Kus. 8:7.

5. Aye wa la mo peut ti manda na lege ti tapande ti azo ti Samarie?

⁵ Azo ti Samarie so apeut lani ti ke ti mä atënë so Philippe afa na ala ndali ti so lo yeke Juif wala ndali ti so ala mä atënë ni so kozo ape. Me ala sara tongaso ape. Na peko ti so azo ti Samarie ahinga biani so Philippe afa na ala tâ tënë, ala kiri na lango ti batême ti ala na peko ape. Bible atene: “Me tongana ala mä na bê na Philippe so ayeke fa nzoni tënë ti Royaume ti Nzapa na ti iri ti Jésus Christ, akoli nga na awali ayeke wara batême.” (Kus. 8:12). Eskê mo hinga biani so atënë ti Bible ayeke tâ tënë nga so aTémoin ti Jéhovah ayeke sara ngangu ti fa so ala ye biani amba ti ala atâa so ambeni zo ake ala nga ala yeke fa tâ ndoye so a hinga na atâa Chrétien? (Jean 13:35). Tongaso, sara mbeto ape ti wara batême na duti sûr so Jéhovah ayeke sara tufa na ndö ti mo.

6. Tapande ti Ruben a-aidé mo tongana nyen?

⁶ Ruben, so ayeke na Allemagne, akono na yâ ti sewa ti aTémoin ti Jéhovah. Me na ngoi so lo yeke maseka, lo hinga ape wala Nzapa ayeke dä biani. Bâ ye so a-aidé lani lo. So lo ga ti bâ so lo hinga ye mingi na ndö ti tënë ni ape, lo mû desizion ti gi ti hinga ye mingi na ndö ni. Lo tene: “Na ngoi ti mandango ye mbi wani, mbi bezoin lani ti gi ti hinga ye so ayeke tâ tënë nga na ye so ayeke mvene. Mbi doit lani ti manda ye na ndö ti tënë ti évolution fani mingi.” Lo diko lani buku Y a-t-il un Créateur qui se soucie de vous? Mbeti so a-aidé lani Ruben mingi. Lo gbu li ti lo, lo tene: ‘Jéhovah ayeke dä biani.’ Na ngoi ti mbeni vizite so Ruben asara na kota ndokua ti e, a nzere na lo mingi ti bâ beoko so ayeke na popo ti e so ayeke mbeni miracle. Na ngoi so Ruben akiri na Allemagne, lo wara batême na ngu 17. Tongana mo yeke na kite na ndö ti aye so mo manda, sara recherche na yâ ti ambeti ti e. Tongana mo wara “tâ hingango ye”, mo yeke zi kite so ayeke na yâ ti li ti mo (aÉph. 4:​13, 14). Tongana mo mä tënë ti ndoye nga na beoko so ayeke na popo ti awakua ti Jéhovah na yâ ti dunia nga mo bâ ni na yâ ti congrégation ti mo, mo yeke ye mingi sewa ti e ti aita so ayeke na yâ ti dunia.

SAUL TI TARSE AWARA BATÊME

7. Bango ndo wa la Saul adoit lani ti changé ni?

⁷ Bâ tapande ti Saul ti Tarse. A fa lani na lo Ndia ti aJuif nzoni mingi nga lo yeke gue lani ti ga kota zo na popo ti aJuif (aGal. 1:​13, 14; aPhil. 3:5). Na mbeni ngoi, na ngoi so aJuif mingi abâ aChrétien tongana a-apostat, ngonzo asara Saul, lo sara ye ti ngangu na ala. Lo pensé ti lo lo tene lo sara ye so bê ti Nzapa aye la (Kus. 8:3; 9:​1, 2; 26:​9-11). Tongana Saul amä na bê na Jésus nga lo wara batême lo ga Chrétien, a yeke sara aye ti ngangu na lo.

8. (a) Nyen la a-aidé lani Saul ti wara batême? (b) Tongana ti so Kusala 22:​12-16 afa, Ananias a-aidé lani Saul tongana nyen? (Bâ nga foto.)

⁸ Nyen la a-aidé lani Saul ti wara batême? Na ngoi so Seigneur Jésus so awara gloire asi na Saul, lê ti lo akanga (Kus. 9:​3-9). Na yâ ti lango ota, lo mû jeûne nga kite ayeke dä ape so lo gbu li na ndö ti ye so alondo ti si na lo. Biani, Saul aga ti hinga so Jésus ayeke Messie nga adisciple ti lo ayeke na yâ ti tâ bungbi ti vorongo Nzapa. Vundu adoit lani ti sara Saul mingi ndali ti so lo yeda na fango Étienne (Kus. 22:20). Na hunzingo ti lango ota ni, mbeni disciple so iri ti lo ayeke Ananias aga na terê ti Saul, lo zi lê ti lo nga lo wa lo ti wara batême sân ti ku. (Diko Kusala 22:​12-16.) Saul asara terê ti lo kete, lo mä Ananias nga lo wara batême.—Kus. 9:​17, 18.

9. Aye wa la mo manda na lege ti tapande ti Saul?

⁹ Aye ayeke dä so e peut ti manda na lege ti tapande ti Saul. Lo peut lani ti zia si baba wala mbeto ti zo akanga lege na lo ti wara batême. Me lo zia si akanga lege na lo ape. Na ngoi so Saul amä tâ tënë na ndö ti Christ, lo sara terê ti lo kete nga lo yeda ti changé asarango ye ti lo (Kus. 26:​14, 19). Saul ayeke lani nduru ti ga Chrétien atâa so lo hinga so a yeke sara ye ti ngangu na lo (Kus. 9:​15, 16; 20:​22, 23). Na peko ti batême ti lo, lo ngbâ lani ti zia bê ti lo na Jéhovah ti aidé lo ti gbu ngangu na yâ ti akpale nde nde (2 aCor. 4:​7-10). Tongana mo wara batême mo ga Témoin ti Jéhovah, peut-être aye ayeke tara mabe ti mo wala mo yeke wara akpale. Me hinga biani so Nzapa nga na Christ ayeke aidé mo lakue ti gbu ngangu nga ti ngbâ be-ta-zo.—aPhil. 4:13.

10. Tapande ti Anna apeut ti aidé mo tongana nyen?

¹⁰ Anna akono na yâ ti mbeni sewa ti aKurdish na Europe de l’est. Na peko ti so mama ti Anna awara batême, babâ ti lo ayeda ti tene a manda Bible na lo na ngoi so lo yeke na ngu 9. Me a nzere lani ape na afami ti lo. Afami ni abâ so tongana mbeni membre ti sewa adö bungbi ti vorongo nzapa ti akotara ti lo azia ayeke ye ti kamene. Na ngoi so Anna ayeke na ngu 12, lo hunda babâ ti lo ti wara batême. Babâ ni aye lani ti hinga eskê a yeke desizion ti lo wani wala mbeni zo la ayeke pusu lo. Lo tene: “Mbi ye Jéhovah.” Babâ ti lo ayeda ti tene lo wara batême. Na peko ti so lo wara batême, afami ti lo angbâ ti sara ye na lo na lege ni ape. Mbeni fami ti lo ni atene na lo, atene: “Tongana mo yeke sara lango-sioni nga mo yeke nyon manga, mo yeke duti nzoni ahon ti duti Témoin ti Jéhovah.” Nyen la a-aidé lani Anna ti gbu ngangu? Lo tene: “Jéhovah a-aidé mbi ti kpengba nga babâ na mama ti mbi a-aidé mbi mingi.” Anna asara liste ti angoi kue so Jéhovah a-aidé lo na yâ ti gigi ti lo. Ngoi na ngoi lo yeke bâ liste ni so tongaso si lo girisa ape tongana nyen la Nzapa a-aidé lo. Tongana mbeto ti tene a sara ye ti ngangu na mo asara mo, girisa ape so mo nga kue Jéhovah ayeke aidé mo.—aHéb. 13:6.

CORNEILLE AWARA BATÊME

11. Nyen la apeut lani ti sara si Corneille asara mbeto ti wara batême?

¹¹ Bible asara nga tënë ti tapande ti Corneille. Lo yeke lani mbeni turugu ti kota kamba so akomande na ndö ti bungbi ti aturugu ti Rome 100 tongaso (Kus. 10:​1, kete tënë na gbe ni). Tongaso, peut-être lo yeke lani kota zo na ndo so lo yeke dä nga na popo ti aturugu. Lo ‘mû lani amatabisi mingi na azo’. (Kus. 10:2). Jéhovah atokua lani bazengele Pierre ti fa nzoni tënë na lo. Eskê Corneille asara lani mbeto ti wara batême ndali ti so lo yeke kota zo?

12. Nyen la a-aidé lani Corneille ti wara batême?

¹² Nyen la a-aidé lani Corneille ti wara batême? Bible atene so lo ‘kpe mbeto ti Nzapa, lo na azo ti da ti lo kue.’ Corneille avoro nga lani terê ti lo na Nzapa lakue (Kus. 10:2). Na ngoi so Pierre afa lani nzoni tënë na Corneille, lo na azo ti da ti lo amä na bê na Christ nga ala wara batême na lê na ni lê ni (Kus. 10:​47, 48). Kite ayeke dä ape so Corneille ayeke lani nduru ti sara achangement so lo doit ti sara tongaso si lo na azo ti sewa ti lo apeut ti voro Jéhovah.—Jos. 24:15; Kus. 10:​24, 33.

13. Aye wa la mo peut ti manda na lege ti tapande ti Corneille?

¹³ Tongana ti Saul, so Corneille ayeke lani kota zo, lo peut ti zia si akanga lege na lo ti ga Chrétien. Me lo sara tongaso ape. Eskê mo doit ti sara akota changement na yâ ti fini ti mo si mo wara batême? Tongana a yeke tongaso, Jéhovah ayeke aidé mo. Lo yeke sara tufa na ndö ti mo tongana mo leke na bê ti mo ti sara ye alingbi na amama-ndia ti Bible si mo sara na lo.

14. Tapande ti Tsuyoshi apeut ti aidé mo tongana nyen?

¹⁴ Tsuyoshi, so ayeke na Japon, adoit lani ti sara mbeni changement na yâ ti kapa ti kua ti lo tongaso si lo lingbi ti wara batême. Lo la lo yeke mû lani maboko na kota zo ti mbeni ekole so ayeke fa na a-élève tongana nyen ti leke afleur. Na ngoi so kota zo ni awara lege ape ti gue na amatanga ti lungo kuâ, mingi ni, Tsuyoshi la ayeke gue na iri ti lo ti sara aye so aBouddiste ayeke sara ka. Ye oko, lo hinga so lo peut ti wara batême ape tongana lo ngbâ ti sara aye ni so. Lo mû desizion ti sara aye ni so encore ape (2 aCor. 6:​15, 16). Tsuyoshi asara lisoro na kota zo ni na ndö ti tënë ni. Ye ti peko ni ayeke nyen? Tsuyoshi angbâ ti sara kua ti lo sân ti sara aye ni so. Lo wara batême ngu oko tongaso na peko ti so lo komanse ti manda Bible.a Tongana mo bezoin ti sara changement na yâ ti kapa ti kua ti mo ti zia ngia na bê ti Nzapa, hinga biani so lo yeke mû na mo ye so mo na sewa ti mo abezoin ni.

AZO TI CORINTHE AWARA BATÊME

15. Akpale wa la apeut lani ti kanga lege na azo ti Corinthe ti wara batême?

¹⁵ Azo ti ngbene gbata ti Corinthe aye lani aye ti sese mingi nga ala yeke azo ti sarango lango-sioni. Ala mingi ayeke sara lani aye so anzere na Nzapa ape. Tongaso, ti komanse ti sara na Jéhovah ayeke lani ngangu mingi na azo so alango na yâ ti mara ti gbata tongaso. Me na ngoi so bazengele Paul asi na yâ ti gbata ni nga lo fa nzoni tënë na ndö ti Christ, “azo ti Corinthe mingi so amä tënë ni akomanse ti mä na bê nga a batize ala.” (Kus. 18:​7-11). Na pekoni, Seigneur Jésus Christ asi na Paul na yâ ti mbeni vision, na lo tene: “Mbi yeke na azo mingi na yâ ti gbata so.” Tongaso, Paul angbâ ti fa tënë kâ ngu oko na ndambo.

16. Nyen la a-aidé lani ambeni zo ti Corinthe ti hon ndö ti akpale so akanga lege na ala ti wara batême? (2 aCorinthien 10:​4, 5).

¹⁶ Nyen la a-aidé lani azo ti Corinthe ti wara batême? (Diko 2 aCorinthien 10:​4, 5.) Mbeti ti Nzapa nga na ngangu yingo vulu ti lo a-aidé lani ala ti sara akota changement na yâ ti fini ti ala (aHéb. 4:12). Azo ti Corinthe so ayeda na nzoni tënë na ndö ti Christ awara lege ti zia lege ti asioni sarango ye tongana nyongo sämba ahon ndö ni, nzi nga na bungbingo koli na koli wala wali na wali.—1 aCor. 6:​9-11.b

17. Nyen la mo peut ti manda na lege ti tapande ti azo ti Corinthe?

¹⁷ Bâ so atâa so azo ti Corinthe ayeke lani na akota changement ti sara, ala pensé ape so a yeke duti tâ ngangu mingi na ala ti sara ni ti ga aChrétien. Ala sara effort ti tambela na ndö ti kete lege so ague na fini (Mat. 7:​13, 14). Eskê mo yeke tiri ti hon ndö ti mbeni sioni sarango ye ti mû lege na mo ti wara batême? Découragé ape. Voro yanga na Jéhovah ti mû na mo yingo vulu ti lo ti aidé mo ti dö sese na nzara ti sara sioni ye.

18. Tapande ti Monika apeut ti aidé mo tongana nyen?

¹⁸ Monika, so ayeke na kodro ti Georgie, asara lani ngangu ti zia lege ti sioni yanga nga na asioni ngia ti mû lege na lo ti wara batême. Lo tene: “Kozo ti tene mbi wara batême, ye so amû na mbi ngangu ayeke sambela. Jéhovah ahinga lani so mbi ye ti sara ye so ayeke na lege ni, ni la lo aidé mbi nga lo fa lege na mbi lakue.” Monika awara batême na ngu 16. Eskê ambeni sarango ye ayeke dä so mo doit ti zia lege ni si mo sara na Jéhovah nzoni? Ngbâ ti hunda lo ti mû na mo ngangu ti sara achangement so mo doit ti sara. Jéhovah ayeke mû ka yingo vulu ti lo mingi na azo.—Jean 3:34.

MABE TI MO APEUT TI PUSU AHOTO

19. Nyen la apeut ti aidé mo ti hon ndö ti akpale so ayeke tongana ahoto? (Bâ nga foto.)

¹⁹ Hinga so Jéhovah aye mo nga lo ye ti tene mo duti na yâ ti sewa ti lo. Tënë so ayeke tâ tënë atâa akpale wa la mo wara so ndali ni na bango ni a yeke ngangu na mo ti wara batême. Jésus atene na mbeni groupe ti adisciple ti lo, lo tene: “Tongana ala yeke na mabe so akono tongana lê ti keke ti moutarde, ka ala yeke tene na hoto so: ‘Londo ge, mo gue mo duti kâ,’ na lo yeke londo ti gue. Nga, ye oko ti kara ala ayeke duti ande dä pëpe.” (Mat. 17:20). Azo so ayeke dä, so amä tënë so, ayeke na terê ti Jésus asara ngu mingi ape, tongaso ala bezoin lani ti gi ti duti na kpengba mabe. Me Jésus atene na ala so tongana ala yeke na kpengba mabe, Jéhovah ayeke aidé ala ti hon ndö ti akpale so ayeke tongana ahoto. Jéhovah ayeke aidé nga mo ti sara tongaso.

20. Tapande ti akozo Chrétien nga na ti aChrétien ti ngoi ti e so e sara tënë ni na yâ ti article so aidé mo tongana nyen?

²⁰ Tongana mo bâ so ambeni ye ayeke dä so akanga lege na mo ti wara batême, sara hio ti zi ni. Zia si tapande ti akozo Chrétien nga na ti aChrétien ti ngoi ti e adë bê ti mo nga akpengba mo. Zia si tapande ti ala amû na mo ngangu nga apusu mo ti mû terê ti mo na Jéhovah nga ti wara batême. A yeke nzoni desizion mingi so mo peut ti mû.