Lettre ti Wabatango Bungbi

“GRÂCE na siriri ti Nzapa Babâ ti e na ti Seigneur Jésus Christ aduti na i!” So ayeke bara so Paul ayeke zia ka na yâ ti alettre so lo yeke tokua na akongregation. Atënë so afa nzoni mingi bibe so e yeke na ni na mbage ti ala kue.​—aEph. 1:2.

E kiri singila mingi ndali ti grâce wala nzobe ti Jéhovah so e lingbi na ni pëpe, so lo fa ni na lege ti sandaga ti Christ Jésus! Na lege ti sandaga so, e yeke na nzoni songo na Nzapa. Atâa ngangu wa e yeke sara ti manda Bible, ti fa nzo tënë wala ti sara ambeni nzoni kusala, e lingbi lâ oko pëpe ti wara grâce so na lege ti ngangu ti e mveni. A yeda ti pardone asiokpari ti e na ti mû na e fini ti lakue lakue pëpe tongana futa teti akusala ti e, me a yeke ndali ti nzobe ti Nzapa so e lingbi na ni pëpe, so lo fa ni na lege ti Jésus Christ.​—aRom. 11:6

Paul asû lani mbeti na amba ti lo awamabe, lo tene: “E voro i nga, i kamata grâce ti Nzapa senge pëpe. Teti Lo tene, Na lâ ni so alingbi, Mbi mä mo awe, na lâ ti salut, Mbi sara na mo. Bâ, laso ayeke lâ ni so alingbi; bâ, laso ayeke lâ ti salut.” Mbeni “lâ ni so alingbi” asi lani kozoni ti tene a futi Jérusalem na ngoi ti akozo Chrétien. Ti azo ti nzoni bê so andoye Jéhovah, a sö ala na lege ti yingo. Ye so ague na abe-ta-zo so ti sö fini ti ala ndali ti so ala kpe Jérusalem kozo ti tene a futi ni na ngu 70.​—2 aCor. 6:1, 2.

Laso nga e yeke na yâ ti mbeni “lâ ni so alingbi” nga mbeni “lâ ti salut.” Ti ala so Jéhovah ayeke yeda na ala tongana awakua ti lo, a yeke sö ala na lege ti yingo. Nga, ala yeke na beku ti sö tâ fini ti ala na ngoi ti “kota lâ ti L’Eternel” so aga nduru.​—Soph. 1:14.

Gango ti kota lâ ti Jéhovah so azia na ndo ti e mbeni kota kungba. A lingbi e gboto mê ti azo na e mû maboko na azo ti nzoni bê ti wara nzoni na lege ti nzobe ti Jéhovah so e lingbi na ni pëpe si ala kue alingbi ti sö fini ti ala. Paul abâ lani nene ti kungba so. Lo sû na mbeti: “Vundu aga na mbi tongana mbi fa Tene-nzoni pëpe!” Lo fa nga atënë ti bê ti lo na lege ti atënë so: “Mbi yeke wakuda . . . ti awandara na ti azo so ahinga ye pëpe. Tongaso mbi yeke na nzara ti fa Tene-nzoni.”​—1 aCor. 9:16; aRom. 1:14, 15.

Jéhovah ayeke hunda na e ande ti kiri tënë na lo tongana e bâ na nene ni pëpe kusala so a mû na e ti gboto mê ti azo. E hinga ye so Jéhovah atene lani na prophète Ezéchiel: “Molenge ti zo, Mbi sara si mo ga sinziri ti azo ti da ti Israël; tongaso, mo mä tënë na yanga ti Mbi, na mo mû wango ti Mbi na ala. Tongana Mbi tene na zo ti sioni, Fade mo kui biani; na mo mû wango so na lo pëpe, wala mo sara tënë pëpe ti wa zo ti sioni ti ke sio lege ti lo, na ti sö fini ti lo; fade zo ti sioni so akui na yâ sioye ti lo; me fade Mbi hunda mênë ti lo na tïtî mo.”​—Ezéch. 3:17, 18.

A yeke ngangu ti kanga bê na gbele akpale ti lâ ti nda ni so. A yeke kete ye pëpe ti bâ lege ti aye tongana kungba ti sewa, akusala ti mitele, ti kongregation nga ti fango tënë nzoni. Na ndo ni, mingi ti ala ayeke luti na gbele akpale ti kobela, ti gango mbakoro, bê so anze nga na kangango lege. Mingi ti ala ayeke yô “kungba so ane”. E ye ti fa na ala so e yeke bâ mawa ti ala, ye so ague oko na ye so Jésus atene: “I ga na Mbi, i kue so i sara kusala na i yeke na kungba so ane, na fade Mbi mû na i lege ti wu tere.” (Mat. 11:28). E ye ti gonda mingi ala kue so asara ngangu ti ngbâ lakue ti sara na Jéhovah atâa akpale wa ala yeke wara.

Grâce na fango tënë nga fango ye so ala yeke sara na wâ, nga na deba nzoni ti Jéhovah, na ndo sese kue azo 4 762 ayeke wara batême yenga oko oko. Na yâ ngu ti kusala so ahon, afini kongregation 1 375 abâ gigi. E sigigi na fini buku Bible afa nyen biani? ti mû maboko na azo ti wara siriri na nzobe ti Jéhovah so e lingbi na ni pëpe na “lâ ti salut” so e yeke dä. E yeke na beku nga e sambela ti tene na lege ti fini buku so, so a wara ni na yanga ti kodoro 120, azo awara mungo maboko so.

Zia ala hinga so Wabatango Bungbi andoye ala na e sambela mingi ngbanga ti ala. E kiri singila nga na ala ndali ti asambela ti ala teti e.

Aita ti ala,

Wabatango Bungbi ti aTémoin ti Jéhovah