Lettre ti Wabatango Bungbi

NA TAPANDE ti Jésus, e sambela Nzapa na bê kue tongaso: “E ye iri ti Mo aga nzoni-kue.” A yeke bâ kota nzara so e yeke na ni ti sara ye alingbi na sambela ti e na lege so e yeke sara ye so afa biani so e yeke aTémoin ti Jéhovah. Biani, a hunda na e gi ti hinga iri ti Nzapa pëpe, me a hunda nga ti gbu alege kue so azi ti mû gonda na iri so. Ti tâ tënë ni, e yeke na ngia mingi ti duti aTémoin ti Jéhovah.​—Mat. 6:9; Es. 43:10.

Ti gue oko na tënë ti Psaume 110:3, azo ti Jéhovah ayeda na bê ti ala ti sara kusala so Jéhovah amû yanga ti sara. Ngbanga ti nyen azo so ngu ti ala nga so dutingo ti ala ayeke nde nde abi tere ti ala na yâ ti kusala ti fango tënë? Kozoni, a yeke ngbanga ti so ala ndoye Nzapa nga ala mû tere ti ala na lo. Deutéronome 6:5, 6 ahunda na e ti ndoye Jéhovah na ‘bê ti e kue, na âme ti e kue nga na ngangu ti e kue.’ Ndoye so apusu e ti mû ngoi ti e, ngangu ti e nga na mosoro ti e ti maï kusala ti Royaume ti Nzapa, so mbeni lege ti sara ni ayeke ti fa tënë mingi alingbi na dutingo ti e.

Ndali ti so Jéhovah andoye azo, lo mû yanga ti tene a fa nzo tënë ti Royaume ti lo na ndo lê sese kue. Lo ye si zo oko akui pëpe, me lo ye si azo kue achangé lege ti ala na ala kiri na mbage ti Wasarango ala ti wara fini (2 Pi. 3:9). Jéhovah atene: “Mbi wara ngia pëpe na lege ti kui ti zo ti sioni; me Mbi ye zo ti sioni ti zia lege ti lo si lo wara fini.” (Ezéch. 33:11). Na ngoi so e yeke fa tënë, azo abâ polele so Jéhovah andoye ala. Biani, tënë so apusu e ti duti na ngia na ngoi so e yeke sara kota kusala so.

E yeke fa kota ndoye ti e na mbage ti Jéhovah na lege so e yeke bâ na atënë ti lo so ayeke na yâ ti Bible. Tongana fade Bible ayeke dä pëpe, ka e yeke hinga Nzapa pëpe na e yeke ga nduru na lo pëpe, tongana ti so Jacques 4:8 ahunda na e ti sara. E yeke hinga nga pëpe ngbanga ti nyen e yeke na fini nga ye so ayeke ku e kekereke. Ka e yeke hinga pëpe so a yeke Adam, kotara ti e, si ayeke na gunda ti akpale ti e (aRom. 5:12). Wala e yeke hinga fade pëpe kota ndoye ti Nzapa na mungo Molenge ti lo ngengele oko tongana ye ti zi e. Na alege mingi, Jéhovah amû na e mbage ti hingango ye ti lo nga na ndara ti lo. So pendere matabisi si lo mû na e, so a yeke Mbeti ti lo, Bible! Ti kiri singila teti pendere matabisi so ayeke pusu e ti ‘zia l’heure ti e ahon senge pëpe,’ me ti mû ni ti diko na atënë ti lo, ti manda ni na ti gbu li na ndo ni (aEph. 5:15, 16; Ps. 1:1-3). Zia tere ti e ane lâ oko pëpe ti mû ngoi ti diko Mbeti ti Nzapa lâ oko oko. Me, a yeke nzoni ndoye so e yeke na ni na mbage ti Nzapa apusu e ti diko Mbeti ti lo si e hinga lo nzoni na e ndoye lo mingi.

Bible afa na e so tongana Adam ake yanga ti Jéhovah, lo bi ahale ti lo kue, so e kue e yeke dä, na yâ ti mbeni sioni dutingo so beku ayeke dä pëpe. Ye oko, Nzapa alingbi lani ti zi azo na yâ ti dutingo so, na lo sara ni. Lo sara kue ti tene ye so lo leke awe ti sara teti sese aga tâ tënë.​—Gen. 3:15.

Biani, e kue e ye mingi ti tene kota iri ti Nzapa ti e aga nzoni-kue. Tongana e yeke gi ti bâ tongana nyen Jéhovah Nzapa ayeke nzoni mingi, a yeke pusu e ti sara kusala maboko na maboko na lo nga na bungbi ti lo ti sara si azo ahinga kota iri ti lo nga na ye so lo leke awe ti sara. E hinga so lo yeda na e nga lo yeke duti na e fadeso nga teti lakue lakue na yâ fini sese.

E so e yeke ti Wabatango Bungbi, e ye si ala hinga so e ndoye ala mingi, aita ti e. E ye nga ti kiri singila mingi na ala ndali ti ngangu so ala yeke sara ti mû tanga ti ngoi so kozoni si “kota ye ti vundu” aga ti fa na nzo tënë na azo mingi (Apoc. 7:14). Na sarango tongaso, ala yeke mû lege na azo ni ti wara oko ye so ala wara awe, so ayeke ti hinga Nzapa na Christ, na hingango ye so ague na fini ti lakue lakue.​—Jean 17:3.

Aita ti ala,

Wabatango Bungbi