Na ngoi wa la a sû ambaï ti Bible na ndö ti Jésus?

Kiringo tënë ti Bible

Bazengele Jean atene tënë so na ndö ti mbaï so lo sû na ndö ti gigi ti Jésus, lo tene: “Lo so lo bâ ye ni na lê asara tënë ni, na tënë ti lo ayeke tâ tënë, nga lo hinga so atënë so lo tene ayeke tâ tënë, si ala nga ala lingbi ti mä na bê.”—Jean 19:35.

Mbeni raison so apusu e ti yeda na ambaï ti Évangile so ayeke na Matthieu, Marc, Luc na Jean ayeke so a sû aÉvangile ni na ngoi so gbâ ti azo so ayeke témoin ti aye ni ade lani na fini. Ti gue oko na tënë so ambeni mbeti atene, a sû Évangile ti Matthieu ngu miombe tongaso na peko ti kuâ ti Jésus, so ti tene na ngu 41 N.E tongaso. Ambeni wandara atene so a sû ti lo ni na peko ti ngu so a fa ni ge so, me mingi ti awandara ayeda so a sû ambeti kue so ayeke na yâ ti Fini Testament na ngoi ti akozo Chrétien.

Azo kue so abâ lani Jésus na ngoi so lo yeke na sese, na ngoi ti kuâ ti lo nga na ngoi so a zingo lo na kuâ, alingbi lani ti hinga wala ambaï ti aÉvangile ayeke tâ tënë. Tongana fade ambeni tënë ayeke dä so a yeke tâ tënë ape, ka azo ni so alingbi ti fa ni. Pakara Frederick Bruce atene: “Mbeni ye so a mû ngangu na tënë so abazengele ayeke fa lani ayeke so ala yeke fa aye so azo ahinga ni; ala yeke tene gï na azo ni atene ape: ‘E bâ lani aye ni so na lê ti e,’ me ala yeke tene nga atene: ‘Gï tongana ti so ala wani ahinga so’ (Kusala 2:22).