A gbi kuâ ti mbeni zo, a zia fuku ni na yâ ti mbeni boîte na a zia foto ti zo ni na terê ni

Bible ayeda ti tene a gbi kuâ ti mbeni zo so akui?

Kiringo tënë ti Bible

Bible afa pëpe mbeni ndia polele tongaso na ndö ti gbingo kuâ ti mbeni zo so akui. A yeke wara pëpe na yâ ti Bible mbeni commandement so ahunda ti lu kuâ ti mbeni zo wala ti gbi ni gbingo.

Bible asara tënë ti ambeni wakua be-ta-zo ti Nzapa so alu kuâ ti azo ti ala so akui. Na tapande, Abraham asara kue ti wara mbeni ndo ti tene lo lu lani kuâ ti wali ti lo Sara dä.—Genèse 23:2-20; 49:29-32.

Bible asara nga tënë ti ambeni wakua be-ta-zo so agbi kuâ ti azo ti ala lani. Na tapande, na ngoi so a fâ Gbia Saül na amolenge ti lo ota na yâ ti mbeni bira, kuâ ti ala angbâ lani na kodro ti awato ti ala, na awato ni asara ye na lege ni ape na akuâ ni. Tongana aturugu ti Israël so ayeke be-ta-zo amä tënë ni, ala gue amû akuâ ni, ala gbi ni na ala mû abio ni alu ni (1 Samuel 31:8-13). Bible afa so ye so aturugu ti Israël asara na kuâ ti Saül na amolenge ti lo so ayeke sioni ape.—2 Samuel 2:4-6.

Ye so azo mingi atene na ndö ti tënë ti gbingo kuâ

Ye so azo atene: Ti gbi kuâ ti mbeni zo afa so a ne kuâ ti zo ni ape.

Tâ tënë ni: Bible afa so azo so akui akiri na pupu sese, na a yeke ye so ayeke si na kuâ ti mbeni zo na peko ti so kuâ ni abuba (Genèse 3:19). Tongana a gbi kuâ ti mbeni zo, ye so ayeke sara si kuâ ni aga fuku hio, wala a ga fuku ti sese.

Ye so azo atene: Ândö, a yeke gbi ka gï kuâ ti azo so Nzapa ake ala.

Tâ tënë ni: A gbi lani kuâ ti ambeni zo so ayeke be-ta-zo pëpe na Nzapa, na tapande Acan nga na afami ti lo (Josué 7:25). Me ye so asi lani so ayeke ye so ayeke sara ka ni lakue ape, a yeke nga mbeni ndia ape (Deutéronome 21:22, 23). Tongana ti so e bâ fade, a zö même kuâ ti ambeni wakua ti Nzapa so ayeke be-ta-zo, na tapande ti Jonathan so ayeke molenge ti gbia Saül.

Ye so azo atene: Tongana a gbi kuâ ti mbeni zo, Nzapa apeut ti zingo zo ni ape.

Tâ tënë ni: Nzapa apeut ti zingo mbeni zo so akui, même tongana a lu kuâ ti zo ni lungo, a gbi kuâ ti lo, zo ni akui na yâ ti la mer wala nyama ti ngonda la ate lo (Apocalypse 20:13). Nzapa so ngangu ti lo ahon angangu kue apeut ti kiri ti créé zo ni senge.—1 aCorinthien 15:35, 38.

Nyen la apeut ti mû lege na mo ti bâ wala eskê a doit ti gbi kuâ ti mbeni zo ti mo wala a doit ti lu ni lungo?

Na ngoi so a ye ti mû desizion ndali ti ye so a lingbi ti sara na kuâ ti mbeni zo, a yeke nzoni ti gbu li na ndö ti aye so.

Ye so wakuâ ni ahunda ti tene a sara. Bible afa atapande ti ambeni zo ti sewa so asara ye alingbi na ye so mbeni zo ti sewa ti ala ahunda ti tene a sara na kuâ ti ala tongana ala kui.—Genèse 50:4, 5; Exode 13:19.
Acoutume ti kodro. Azo ayeke sara lakue ye alingbi na coutume ti kodro ti ala tongana mbeni zo akui (Jean 19:40). Na tapande, ândö, azo ayeke lu ka gï kuâ ti azo so akui lungo (Genèse 49:31; 1 Samuel 28:3). Laso nga, mbeni zo apeut ti mû desizion ti sara ye alingbi na coutume ti kodro ti lo na ndö ti tënë ye so ayeke sara na kuâ ti mbeni zo, tongana coutume ni ague nde pëpe na amama-ndia ti Bible.
Ye so ndia ti kodro ahunda ti sara. Bible ahunda na e ti mä yanga ti akota zo ti komande (aRomain 13:1). Na ambeni ndö, akota zo ti komande alu ndia na ndö ti lege so a doit ti sara ye na kuâ ti mbeni zo. Na tapande, na ndö ti tënë ti gbingo kuâ, ndia ti ambeni kodro afa so a doit ti tuku fuku ti kuâ ti zo ni kirikiri ape.
Pensé ti azo na ndö ni. Bible ahunda na e ti pensé na amba ti e (aPhilippien 2:4). Tongana a hunda ti mû desizion na ndö ti lege so a doit ti sara ye na kuâ ti mbeni zo, a yeke peut-être kota ye ti gbu li na ndö ti ahunda so: Ambeni zo ti sewa ni apensé ti ala nyen na ndö ti gbingo kuâ ni wala ti lungo ni? Azo ti ndö so e yeke dä abâ ni tongana nyen?