Eskê anyama ayeke gue na yayu?

Kiringo tënë ti Bible

Bible afa so na milieu ti acréature kue so ayeke na ndö ti sese, gï mbeni kete wungo ti azo la ayeke gue na yayu (Apocalypse 14:1, 3). Ala yeke gue na yayu ti komande na terê ti Jésus tongana agbia nga ala yeke sara kua ti prêtre (Luc 22:28-30; Apocalypse 5:9, 10). A yeke zingo ande gbâ ti azo na kuâ ti tene ala duti na fini na yâ paradis na ndö ti sese.​—Psaume 37:11, 29.

Na yâ ti Bible, a sara pëpe tënë ti mbeni ndo na yayu so ambo, anyau wala ambeni nyama nde ayeke gue dä; na a yeke na lege ni so Bible asara pëpe tënë ni. Anyama apeut pëpe ti sara aye so a hunda ti sara ti tene “a iri ala nga ti gue na yayu.” (aHébreu 3:1). Na popo ti aye so a hunda a yeke wara hingango ye, mabe nga sarango ye alingbi na acommandement ti Nzapa (Matthieu 19:17; Jean 3:16; 17:3). A yeke gï azo la Nzapa acréé ala ti duti na beku ti wara fini ti lakue lakue.​—Genèse 2:16, 17; 3:22, 23.

Ti tene ambeni créature na sese ge ague na yayu, a lingbi a zingo ala na kuâ si (1 aCorinthien 15:42). Bible asara tënë ti acréature so a zingo ala na kuâ (1 aGbia 17:17-24; 2 aGbia 4:32-37; 13:20, 21; Luc 7:11-15; 8:41, 42, 49-56; Jean 11:38-44; Kusala 9:36-42; 20:7-12). Me, ala kue so a zingo ala ayeke gï azo; anyama ayeke nga na milieu ni ape.

• Eskê anyama ayeke na âme?

• Âme apeut ti kui?

• Eskê anyama ayeke sara siokpari?

• Eskê a yeke na lege ni ti sara pasi na anyama?

Eskê anyama ayeke na âme?

Ên-ën. Bible afa so anyama na azo kue ayeke a-âme (Nombre 31:28). Na temps so a créé lani Adam, a mû na lo mbeni âme ape me lo ‘ga âme so ayeke na fini.” (Genèse 2:7, kete tënë na gbe ni). Aye use la abungbi si aga âme: “fuku ti sese” nga na ‘pupu so ayeke sara si lo duti na fini.’

Âme apeut ti kui?

En, Bible atene so âme apeut ti kui (Lévitique 21:11, kete tënë na gbe ni; Ézéchiel 18:20). Tongana azo na anyama akui, ala use kue ayeke kiri na fuku ti sese (Zo-ti-fa-tene 3:19, 20). Tënë so aye ti fa so ala yeke na fini encore ape.a

Eskê anyama ayeke sara siokpari?

Ên-ën. Ti sara siokpari aye ti tene ti pensé, ti sara nzara ti mbeni ye wala ti sara mbeni ye so ague nde na ndia ti Nzapa. Tongana a tene mbeni créature asara siokpari, a ye ti fa so lo yeke na ngangu ti soro ti sara ye ti nzoni wala ye ti sioni; anyama ayeke na ngangu ni so ape. Mingi ni, anyama ayeke sara ye alingbi gï na ye so a zia na yâ ti li ti ala awe, nga na ndani ala yeke kui (2 Pierre 2:12). Ala yeke kui, atâa so ala sara siokpari ape.

Eskê a yeke na lege ni ti sara pasi na anyama?

Ên-ën. Nzapa amû yanga na azo ti komande anyama, me lo mû na ala droit ti sara pasi na ala ape (Genèse 1:28; Psaume 8:6-8). Lo pensé na nzoni ti anyama oko oko kue, même akete kete ndeke kue (Jonas 4:11; Matthieu 10:29). Lo mû yanga na awakua ti lo ti sara ye na lege ni na mbage ti anyama.​—Exode 23:12; Deutéronome 25:4; aProverbe 12:10.