Mercredi 16 juillet
Jéhovah ahinga so atënë ti bê ti azo ti ndara ayeke senge ye.—1 aCor. 3:20.
E doit ti ke bango ndo ti azo so ake andia ti Jéhovah. Tongana e pensé tongana azo so ake andia ti Jéhovah, e peut ti komanse ti sara sanka ti Jéhovah nga na andia ti lo (1 aCor. 3:19). Mingi ni, “ndara ti dunia so” ayeke pusu azo ti ke yanga ti Nzapa. Ambeni Chrétien na Pergame nga na Thyatire ayeda lani na bango ndo so mingi ti azo ti yâ ti agbata so ayeke na ni na ndö ti vorongo ayanda nga na lango-sioni. Jésus amû lani ngangu wango na acongrégation use so ndali ti so ala kanga lê na ndö ti lango-sioni (Apoc. 2:14, 20). Laso, azo so angoro e ayeke gi ti pusu e ti yeda na abango ndo so ayeke na lege ni ape. Afami ti e nga na azo so e hinga ala apeut ti gi ti pusu e ti yeda so andia ti Jéhovah ayeke ngangu mingi nga e peut ti doro ni senge. Na tapande, ala peut ti tene so ti sara ye alingbi na anzara ti bê ti e ayeke sioni ape, nga andia ti Bible na ndö ti nzoni sarango ye aga ngbene ye awe. Na ambeni ngoi, e peut ti tene so aye so Jéhovah afa na e ti sara ayeke polele ape. Bê ti e apeut ti pusu même e ti “sara ye ahon ti so a sû na mbeti”.—1 aCor. 4:6. w23.07 16 par. 10-11
Jeudi 17 juillet
Tâ kamarade aye mba ti lo na ngoi kue nga lo yeke mbeni ita so a dü lo ndali ti angoi ti vundu.—aProv. 17:17.
Marie, mama ti Jésus, abezoin lani ti tene a kpengba lo. Imaginé tongana nyen la Marie agi bê ti lo lani mingi na ngoi so ange Gabriel atene na lo so lo yeke mû ngo atâa so ade lo sara mariage ape. Ade lo bata molenge lâ oko ape, me lo doit ti bâ lege ti molenge-koli so ayeke ga Messie. So ade Marie abungbi na koli lâ oko ape, tënë ti nyen la lo yeke tene na Joseph, so aye ti mû lo? (Luc 1:26-33). Tongana nyen la Marie awara lani ngangu? Lo gi lani mungo maboko. Na tapande, lo hunda lani Gabriel ti fa na lo ambeni ye na ndö ti ye so a hunda na lo ti sara (Luc 1:34). Kete na pekoni, lo voyagé lo gue juska na mbage ti Judée so ayeke na “ando so ayeke na yâ ti ahoto” ti bâ fami ti lo, Élisabeth. Élisabeth agonda lani Marie nga yingo ti Jéhovah apusu lo ti fa mbeni prophétie so akpengba zo na ndö ti molenge-koli so ayeke na yâ ti Marie (Luc 1:39-45). Marie atene so Jéhovah ‘asara aye ti ngangu na maboko ti lo.’ (Luc 1:46-51). Jéhovah akpengba lani Marie na lege ti Gabriel na Élisabeth. w23.10 14-15 par. 10-12
Vendredi 18 juillet
Lo sara si e ga mbeni royaume, na aprêtre ndali ti Nzapa ti lo nga Babâ ti lo.—Apoc. 1:6.
A soro ambeni disciple ti Christ na lege ti yingo vulu ti gue na yayu, na songo so ala yeke na ni na Jéhovah ayeke nde. Jésus na azo 144000 so ayeke sara kua ti prêtre na yayu (Apoc. 14:1). Ndo so ayeke nzoni-kue aye ti fa so, na ngoi so ala ngbâ na sese, a mû ala ti ga amolenge ti Nzapa na lege ti yingo (aRom. 8:15-17). Ndo so ayeke nzoni kue kue kue aye ti sara tënë ti yayu, ndo so Jéhovah ayeke dä. “Rideau” so akangbi popo ti Ndo so ayeke nzoni-kue nga na Ndo so ayeke nzoni kue kue kue aye ti sara tënë ti terê ti Jésus so akanga lege na lo ti gue na yayu ti sara kua ti Kota prêtre so ahon atanga ni kue na yâ ti temple ti yingo. So Jésus amû terê ti lo na sandaga ndali ti azo, lo zi lege na aChrétien kue so a soro ala na lege ti yingo vulu ti gue na yayu. Ti wara futa ti ala na yayu ala doit ti gue na terê ti ala ti zo ape.—aHéb. 10:19, 20; 1 aCor. 15:50. w23.10 28 par. 13