Manda ye na lege ti fason so Jésus aluti na lê ti atara

Na peko ti so Jean abatize Jésus, droit yingo ti Nzapa ague na Jésus na benyama ti Judée. Lo gue ti gbu li na ndo ti gbâ ti aye. Bible atene so, na ngoi ti batême ti lo, “yayu azi”. (Matthieu 3:16). Ni la, lo peut ti dabe ti lo na aye so lo manda na so lo sara lani na ngoi so lo de na yayu. Tongaso, lo yeke na gbâ ti aye so lo doit ti gbu li na ndo ni.

Jésus asara lâ 40 na bï 40 na yâ ti benyama ni. Na ngoi ni so kue, lo te ye oko ape. Ni la, tongana lo bâ so nzara agbu Jésus sioni, Satan Zabolo aga ti tara lo, lo tene: “Tongana mo yeke mbeni molenge ti Nzapa, tene na atênë so ti ga mapa.” (Matthieu 4:3). Teti so lo hinga so a yeke duti ande na lege ni ape, tongana lo sara kua na ngangu so Nzapa amû na lo ti kaï na anzara ti lo wani, Jésus ake ti sara ye so Satan ahunda na lo so.

Zabolo angbâ gi ge ape. Lo ga na mbeni tara ni nde. Ti so ni so, lo hunda na Jésus ti londo na li ti temple kâ ti tï na sese. Me Jésus ake. Na sarango kua na Mbeti ti Nzapa, Jésus afa na lo so a yeke na lege ni ape ti tara Nzapa na mara ti fason ni so.

Na pekoni, na yâ ti ota tara ni, Satan afa na Jésus, na mbeni lege so e hinga ape, “aroyaume kue ti dunia so nga na gloire ti ala” nga lo tene na lo, lo tene: “Mbi yeke mû na mo aye so kue tongana mo kuku na sese mo voro mbi.” Jésus akiri ake na lo vîi, na lo tene: “Hon kâ, Satan!” (Matthieu 4:8-10). Jésus azia pëpe si tara ni apusu lo ti sara mbeni ye so ayeke sioni, ndali ti so lo hinga so a yeke gi na Jéhovah lo oko la azo adoit ti sara na lo kusala so ayeke nzoni-kue. Jésus asoro ti ngbâ be-ta-zo na Nzapa.

E peut ti manda ye na lege ti atara so nga na fason so Jésus aluti na lê ni. Atara ni so asi lani biani, na a fa na e so Zabolo ayeke pëpe mbeni sioni pensé so ayeke na yâ ti bê ti zo, tongana ti so ambeni zo ayeke tene ka. Lo yeke biani mbeni zo so ayeke yingo, me e peut ti bâ lo ape. Mbaï so aye ti fa nga na e so, agouvernement kue ti laso ayeke biani aye ti Zabolo; ala yeke na yâ ti maboko ti lo. Tongana fade a yeke ti lo ape, ka a peut ti tene so a yeke mbeni tara ngbanga ti Jésus?

Na ndo ni, Zabolo atene so, tongana Jésus avoro gi lo kete, lo yeke mû na lo aroyaume kue ti dunia so. Zabolo apeut ti handa e laso na mara ti kode ni so, peut-être na ziango na devant ti e kota pasa ti wara gbâ ti nginza, ngangu ti komande, wala nzoni ndo. A yeke duti ande na lege ti ndara ti mû tapande ti Jésus na dutingo be-ta-zo na Nzapa, atâa e tingbi na atara wa. Girisa nga ape so, Zabolo azia Jésus “juska ti ku na mbeni ngoi so alingbi.” (Luc 4:13). Lo peut ti sara mara ti ye ni so na e. Ni la, a lingbi lê ti e akpengba nganganga.