“Zia Royaume ti mo aga”

Jéhovah amû lani zendo, atene: ‘Toto, pasi, kobela nga na kuâ ayeke duti ande dä mbeni pëpe. Mbi yeke mbô ande ngu ti lê kue na lê ti ala. A yeke girisa ande na ndö ti asioni ye kue so ahon awe.’

Jéhovah azia lani Adam na Ève na yâ ti yaka ti Éden ti duti na siriri nga na ngia. A lingbi ala voro lani Babâ ti ala ti yayu nga ala dü amolenge amû lê ti sese kue. Adam na Ève ake yanga ti Jéhovah, me ye so Nzapa aleke lani na bê ti lo ti sara achangé ape. Na yâ ti mbeti so, e bâ tongana nyen la azendo kue so Nzapa amû aga tâ tënë. Royaume ti lo ayeke ga ande na aye ti nzoni na ndö ti sese, tongana ti so lo mû zendo ni lani na Abraham.

Na yâ ti kete ngoi, Satan na asioni yingo ti lo, nga na azo ti sioni kue ayeke duti ande dä ape. Azo kue so ayeke ngbâ ande na fini ayeke voro Jéhovah. Terê ti e ayeke son ande ape nga e yeke kui ape. Tongana e zingo ande lâ oko oko na ndapre, e yeke na ngangu nga e yeke na ngia ti duti na fini. Sese ayeke ga ande mbeni paradis. E kue e yeke wara ande nzoni kobe ti tengo ni nga na anzoni da. Azo ayeke duti ande gï anzoni zo, sioni zo wala zo ti sarango ngangu na zo ayeke dä ape. E yeke sara mbeto ti anyama ti ngonda ape, ala nga ayeke sara mbeto ti e ape.

Terê ti e ayeke nzere ande mingi tongana Jéhovah akomanse ti zingo azo na kuâ. E yeke yamba ande azo ti ândö, tongana Abel, Noé, Abraham, Sara, Moïse, Ruth, Esther nga na David. E na ala e yeke sara si sese aga mbeni paradis. E yeke duti ande lakue na gbâ ti apendere kua ti sara.

Jéhovah aye si mo duti dä. Mo yeke manda ande ti hinga lo na ambeni lege so mo pensé na ni lâ oko ape. Zia e gï ti ga nduru na Jéhovah lâ na lâ, fadeso nga teti lakue lakue!