Ngonzo asara si lo fâ zo

Na peko ti so Adam na Ève asigi na yâ ti yaka ti Éden, ala dü gbâ ti amolenge. Kozo molenge ti ala, Caïn, aga zo ti fango yaka, na use molenge ti ala, Abel, aga zo ti batango nyama.

Mbeni lâ, Caïn na Abel amû sandaga na Jéhovah. Sandaga ayeke nyen? A yeke mbeni matabisi so ayeke nde mingi. Sandaga ti Abel anzere na Jéhovah, me ti Caïn anzere na lo ape. Caïn asara ngonzo sioni. Jéhovah agboto mê ti Caïn so ngonzo ti lo so alingbi ti sara si lo sara mbeni ye ti sioni. Me Caïn ake ti mä lo.

Nde na so, Caïn atene na Abel: ‘Ga, e gue na ngonda.’ Na ngoi so ala yeke gï ala use na yâ ti ngonda ni, Caïn apika ita ti lo na lo fâ lo. Jéhovah asara nyen na ndö ti ye so? Jéhovah apunir Caïn na lege so lo tomba lo ayo na sewa ti lo. Caïn alingbi lâ oko ape ti wara lege ti kiri.

E lingbi ti manda mbeni ye na lege ti ye so asi so? En, e lingbi ti komanse ti sara ngonzo tongana aye atambela pëpe tongana ti so bê ti e aye. Tongana e sara ngonzo ahon ndö ni wala tongana ambeni zo agboto mê ti e ndali ti so ala bâ so e sara ngonzo mingi, a lingbi e changé hio nga e zia lege ti ngonzo ni kozo si e sara mbeni ye ti sioni.

Teti so Abel aye Jéhovah nga lo sara ye lani na lege ni, Jéhovah angbâ ti dabe ti lo na lo. Nzapa ayeke zingo ande Abel na fini na ngoi so lo yeke sara si sese kue aga paradis.