Eskê gunda ti asioni ye kue alondo gï na nginza?

Kiringo tënë ti Bible

Ên-ën. Bible atene ape so nginza ayeke sioni, na lo tene nga ape so nginza la ayeke tâ na gunda ti asioni ye kue. Tënë “gunda ti asioni ye kue alondo gï na nginza” ayeke mbeni mbage ti mbeni versê na yâ ti Bible, so azo azi mbeni tënë na yâ ni na a sara si tënë ni ayeke na lege ni ape. Vrai tënë so Bible atene ayeke so: ‘Gunda ti asioni ye kue alondo gi na yengo nginza ahon ndo ni.’a—1 Timothée 6:10, Tene ti Nzapa, Fini Mbuki, 2006.

• Tënë wa la Bible atene na ndö ti nginza?

• Ngbanga ti nyen la Bible atene na e ti sara hange na ndoye ti nginza?

• Aye ti nzoni wa la e yeke wara tongana e sara ye alingbi na wango so Bible amû na ndö ti nginza?

• Aversê ti Bible so asara tënë na ndö ti nginza

Tënë wa la Bible atene na ndö ti nginza?

Bible atene so tongana zo asara kua na nginza na lege ti ndara, a peut ti mû maboko na lo, na a peut même ti “bata [lo]”. (Zo-ti-fa-tene 7:12). Na ndö ni, Bible agonda azo so ayeke mû ye na amba ti ala, na tapande na mungo na ala nginza.—aProverbe 11:25.

Me na mbage, Bible amû ambeni wango ti tene e sara hange si e zia li ti e kue gï na ndö ti nginza ape. A tene: “Ala zia si ndoye ti nginza aduti na yâ ti sarango ye ti ala pëpe, me ala zia bê ti ala gï na ndö ti aye so ala yeke na ni.” (aHébreu 13:5). Ye so Bible aye ti fa ayeke so, a lingbi e zia nginza angbâ na place ti lo nga a lingbi e tomba peko ti mosoro ape. Tongana e wara aye so e yeke tâ vraiment na bezoin ni, na tapande kobe, bongo nga na ndo ti lango, so a lingbi na e awe.—1 Timothée 6:8.

Ngbanga ti nyen la Bible atene na e ti sara hange na ndoye ti nginza?

Azo ti sarango bê ti ye ayeke wara ande fini ti lakue lakue ape (aÉphésien 5:5). Raison ni ayeke so, sarango bê ti ye ayeke mbeni lege ti vorongo yanda, so ti tene ti voro nzapa ti wataka (aColossien 3:5). Mbeni raison ni nga nde ayeke so, mingi ni azo ti sarango bê ti ye ayeke sara ye na lege ni ape na ngoi so ala gï ti wara aye so ala ye. A-Proverbe 28:20 atene so “[Azo] so adö terê ti wara gbâ ti mosoro, tënë ayeke duti ande na li ti [ala].” Bê ti ala apeut ti pusu même ala ti sara aye ti sioni, na tapande ti handa azo, ti nzi, ti sara aye ti likisi, ti gbu mbeni zo na ngangu na ti hunda ti tene a futa mbeni ye si a zi zo ni wala ti fâ zo.

Même si ndoye ti nginza ague na zo pëpe ti sara asioni ye, ambeni sioni ye ti pekoni nde apeut ti duti dä. Bible atene so “ala so aye gï ti ga azo ti mosoro ayeke tï na yâ ti tara, na yâ ti kûkû nga na yâ ti abuba nzara nde nde so asara sioni na ala.”—1 Timothée 6:9.

Aye ti nzoni wa la e yeke wara tongana e sara ye alingbi na wango so Bible amû na ndö ti nginza?

Tongana ndali ti nginza e gue nde pëpe na aye so e hinga so ayeke na lege ni nga anzere na lê ti Nzapa, e yeke bâ so e ne nga e hinga so e zia ngia na bê ti Nzapa nga maboko ti lo ayeke na ndö ti e. Nzapa amû zendo so na azo so ayeke sara effort ti zia ngia na bê ti lo, lo tene: “Mbi yeke zia ande mo lâ oko pëpe nga mbi yeke girisa mo lâ oko pëpe.” (aHébreu 13:5, 6). Lo dë bê ti e nga so “zo so ayeke be-ta-zo ayeke wara gbâ ti aye ti nzoni.”—aProverbe 28:20.