A Lingbi Mabe Aluti na ndo Nyen?

Wayinda ti mbeni séminaire na États-Unis atene: “Azo mingi aga ‘awamabe’ gi ngbanga ti so ala ye pëpe ti sala ngangu ti gbu nda ti tënë.” Lo kiri lo tene: “Ala ye ti yeda na ye kue ‘gi tongaso’ na ti hunda nda ti atënë ti mabe ti ala pëpe.”

LO YE ti fa so azo mingi so atene ala yeke ti mbeni lege ti vorongo agbu li ti ala pëpe na ndo anda ti tënë so ala yeke mä na bê dä wala ala yeke gi ti bâ pëpe wala biani gunda ti mabe ti ala ayeke biani dä. A yeke senge pëpe si lege ti vorongo aga mbeni ye so azo mingi aye pëpe ti sala tënë na ndo ni.

Mawa ni ayeke so, asalango ye tongana salango kusala na ayanda nga tenengo fani mingi asambela na li akanga nga lege na azo ti gbu li nzoni. Ti azo mingi, ala bi bê gi na ndo mbeni kota da ti vorongo so ayeke pendere mingi nga na amozoko so agbu bê. Atâa so ambeni église atene so mabe ti ala aluti na ndo ti Bible, tokua ti ala ti ‘mä na bê na Jésus na fade a sö mo’ asala si azo abâ mandango Bible nzoni na nene ni oko pëpe. Ambeni ato nda ti fa nzo tënë na ndo nzoni duti ti azo wala na ndo tënë ti poroso. Me ye wa aga na peko ti aye so kue?

Na ndo ye so ayeke tambela na Amerika ti Banga, mbeni wasungo ye na ndo lege ti vorongo atene: “Fango ye ti alege ti vorongo so atene ala mä na bê na Christ . . . alï mingi pëpe, [na] azo so amû pekoni ahinga ye mingi pëpe na ndo atënë ti mabe ti ala.” Mbeni wahundango yâ ti aye ague même ti fa États-Unis tongana “mbeni kodoro so ahinga ye mingi pëpe na ndo ti Bible.” Ti tâ tënë ni, atënë so andu nga ambeni kodoro so lege ti vorongo so atene ayeke ti Chrétien awu dä. Alege ti vorongo mingi so ayeke ti Chrétien pëpe abâ nga na nene ni pëpe gbungo nda ti tënë. Nde na so ala luti mingi na ndo abia, asambela so a tene pekoni gi tongaso, na mara ti gbungo li nde nde so andu aye ti ndima ahon ti gboto lê na ndo bango yâ ti tënë na lege ni nga nzoni.

Ye oko, na yâ fini ti ala ti lâ oko oko, azo agi ti hinga pëpe wala atënë so ala mä na bê dä ayeke biani tâ tënë. Me a-oko zo so agi fani mingi ti hinga mbilimbili nda ti ambeni ye nde. Bê ti mo adö pëpe tongana mbeni zo so amû ngoi ti lo mingi ti bâ nzoni mara ti bongo wa lo yeke vo na gala, ayeke tene tënë so na ndo lege ti vorongo ti lo, ‘Tongana a lingbi lani na babâ na mama ti mbi, a lingbi nga na mbi’?

Tongana e ye biani ti nzere na Nzapa, a lingbi e gi ti bâ mbilimbili wala ye so e mä na bê dä na ndo lo ayeke tâ tënë. A yeke tongaso pëpe? Bazengele Paul asala tënë ti ambeni wamabe ti ngoi ti lo so aduti na “nzala teti Nzapa, me na lege ti [“tâ,” NW] hingango ye pëpe.” (aRomain 10:2) A lingbi ti haka mara ti azo tongaso na mbeni kete molenge so mama ti lo atokua lo ti vo huile, me ahon so molenge ni avo bengba mafuta teti so lo mä nzoni pëpe afango lege ti mama ti lo. Peut-être ye so molenge ni avo anzere na lo, me a yeke nzere na mama ni?

Ye wa Nzapa ayeda na ni na ndo tënë ti tâ vorongo? Bible akiri tënë: “Ye so ayeke nzoni, na alingbi na lê ti Nzapa Sauveur ti e; Lo so aye azo kue awara salut, na ahinga tene-biani mbilimbili.” (1 Timothée 2:3, 4) Ambeni zo alingbi ti tene so lege ayeke dä pëpe ti wara mara ti hingango ye tongaso na popo ti gbâ ti alege ti vorongo ti laso. Me bâ kete si, tongana Nzapa aye si azo awara tâ hingango ye na ndo tâ tënë, fade lo yeke honde ni na ala na mbana? A yeke bibe ti Bible pëpe, so atene: “Tongana mo gi [Nzapa], fade mo wara lo.”​—1 Chronique 28:9.

Tongana nyen Nzapa azi lege na azo so agi lo na bê kue ti wara lo? Fade article ti peko ayeke mû kiringo tënë ni.