Adû so abata ngu na yâ ni pëpe
NA NGOI so a sû na Bible, azo ayeke ge dû na gbe ti sese ti bata ngu dä. Na yâ ambeni ngoi, na Sese ti Zendo, a yeke gi oko lege so a lingbi ti bata na ngu so ayeke tâ kota ye teti fini.
Na fango peko ti nengo tënë ti Nzapa, prophète Jérémie asala tënë ti adû ti batango na ngu na lege ti fä tongana lo tene: “Azo ti Mbi asala sioye use: ala zia Mbi, Mbi so Mbi yeke Lingu ti ngu so amû fini, na ala ge dungu teti ala mveni, dungu so afâ, na a lingbi bata ngu na yâ ni pëpe.”—Jérémie 2:13.
Amolenge ti Israël azia lani Jéhovah Nzapa ti ala, “Lingu ti ngu so amû fini”, ti gue ti te mbele ti wara mungo maboko ti aturugu so zo alingbi zia bê ti lo kue dä pëpe na amara so ayeke apaïen, na ti voro anzapa ti wataka so ayeke na ngangu oko pëpe. Legeoko na hakango ndo ti Jérémie, ando ti batango tele ti ala tongaso ayeke lani gi tongana mbeni dû ti batango na ngu so akoro, so mbeni ye ti bata na tele wala ngangu ti songo zo ayeke na yâ ni pëpe.—Deutéronome 28:20.
Mbeni ye ti manda ayeke dä teti e laso na yâ tapande ti mbaï so? Legeoko tongana ti so a si lani na ngoi ti Jérémie, Nzapa ti lakue lakue Jéhovah angbâ lakue ti duti gi oko Lingu ti ngu so amû fini (Psaume 36:10; Apocalypse 4:11). Azo alingbi ti wara fini ti lakue lakue gi na maboko ti lo na lege ti Molenge ti lo Jésus Christ (Jean 4:14; 17:3). Ye oko, legeoko tongana azo ti ngoi ti Jérémie, gbâ ti azo laso asoro ti ke na même ti buba ngangu ti tënë ti Nzapa so ayeke na yâ Bible. Nde na so, ala zia bê ti ala kue na ndo lege so azo ti poroso ayeke kaï hio na akpale, asenge tënë kirikiri ti azo, na asenge bango ndo nga asenda-ndara so abi zonga na ndo Nzapa (1 aCorinthien 3:18-20; aColossien 2:8). Nzoni ye ti soro ayeke polele. Fade mo yeke zia bê ti mo kue na zo wa? Mo yeke zia ande bê ti mo kue na Jéhovah, “Lingu ti ngu so amû fini” wala na ‘dungu so afâ, so alingbi ti bata ngu na yâ ni pëpe’?
[Foto na lembeti 32]
Image ti mbeni nzapa-wali so a wara na yâ dukua ti mbeni zo ti Israël
[Lingu ti foto ni]
A mû foto so ndali ti nzobe ti British Museum