Mbeni ndeke afa ye na zo

“BIANI, marabout [“cigogne”, NW] so ahulu na nduzu ahinga ngoi ti lo; . . . me azo ti Mbi, ala hinga kpengba-tene ti L’Eternel pëpe.” (Jérémie 8:7). Na lege ti atënë so, prophète Jérémie afa na gigi fango ngbanga ti Jéhovah na ndo azo ti Juda so abele mabe ti ala. Ala zia Jéhovah Nzapa ti ala, na ala gue ti voro anzapa ti awande (Jérémie 7:18, 31). Ngbanga ti nyen Jérémie asoro cigogne ti fa ye na aJuif so aduti be-ta-zo pëpe?

Teti so cigogne, mbilimbili avulu ni, ayeke hon na yâ ambeni kodoro, so Bible asala tënë ni, ti gue na ambeni nde, azo ti Israël ahinga ndeke so nzoni mingi. Na yanga ti Hebreu, iri ti kota ndeke ti yongoro gere, so ayeke tambela na yâ ngu, aye ti tene “lo ti be-biani; lo ti nzobe.” Iri so alingbi na lo biani. Nde na mingi ti ambeni ndeke, avulu cigogne ti koli na ti wali ayeke ngbâ koli na wali juska na kuâ. Ngu na ngu, na pekoni so ala duti na yâ akodoro ti ndowa ti kpe ngoi ti dê, mingi ni acigogne ayeke kiri gi na yâ oko da so ala duti dä kozo.

Salango ye ti cigogne, so ayeke na yâ mênë ti lo, afa na gigi be-biani na yâ ambeni pendere lege nde nga. Koli ni na wali ni use kue ayeke lango na ndo apara ti ala. Ala use kue ayeke mû kobe na amolenge ti ala. Buku Our Magnificent Wildlife (Pendere fini ti anyama ti ngonda) afa nda ni: “Na yâ kusala ti babâ na mama, acigogne aduti be-biani na mba na mbeni lege so ayeke nde mingi. Na Zamani, mbeni cigogne ti koli ahon na yâ akota kamba ti wâ na kuran afâ lo. Wali ti lo angbâ alango na ndo apara ni gi lo oko teti alango ota. Na ngoi ni kue, lo zia da ti ala lo hon gi fani oko, ti gi kobe teti mbeni kete ngoi. . . . Mbeni tapande ni ayeke so, tongana a fâ wali ni na ngombe, babâ ni abata amolenge ni.”

Tâ tënë, teti so lo duti be-biani na koli wala na wali ti lo juska na kuâ, nga lo bata amolenge ti lo nzoni na mbeni lege so alondo na yâ mênë, cigogne asala ye alingbi na iri ti lo: “lo ti be-biani”. Na lege so, acigogne aduti mbeni pendere tapande teti azo ti kpengba-li ti Israël, so aduti lani be-ta-zo pëpe.

Laso, ti azo mingi, be-biani ayeke ngbele ye. A yeke nzoni, me a lingbi ti mû maboko na zo pëpe. Kengo tele, ziango mba, nzingo nginza na kode, nga na ambeni mara ti handa nde nde awu mingi. Ye so afa so azo abâ be-biani na nene ni mbeni pëpe. Nde na so, Bible abâ na nene ni mingi be-biani so ndoye na nzobe ayeke na gbe ni. Bible awa aChrétien ngangu mingi ti “yü zo-ti-fini, lo so A créé lo na lege ti Nzapa na yâ mbilimbili na nzoni-kue ti tene-biani [“be-biani”, NW].” (aEphésien 4:24). Biani, zo-ti-fini amû maboko na e ti duti be-biani, me e lingbi nga ti manda mbeni ye na ndo ni na lege ti acigogne.