Salango si atënë atoto tâ na lege ni

A YEKE aChrétien kue pëpe si amanda mbeti teti ngu mingi. Même abazengele Pierre na Jean kue a fa ala tongana asenge zo so “amanda mbeti pëpe” na gbele amaître ti ndia (Kus. 4:13). Ye oko, a yeke kota ye ti kpe ti sala si azo ake ti mä fango tâ tënë ti Bible ti e na dikongo na lege ni pëpe peko ti atënë.

Aye so a lingbi a bâ. A yeke wara pëpe teti ayanga ti kodoro kue mbeni bungbi oko ti andia so afa totongo ti atënë so alingbi. A yeke sû ambeni yanga ti kodoro na lege ti agere-mbeti. Nde na agere-mbeti ti sû na Sango, a yeke wara agere-mbeti teti Arabu, Cyrillique, Grec na Hébreu. Ti Chinois, a yeke sû ni na lege ti adessin so aye mingi ayeke na yâ ni. Mingi ni, adessin so ayeke tongana lê ti tënë oko wala mbeni mbage ni. Atâa so Japonais na Coréen amû peko ti Chinois, a lingbi ti sala kusala na adessin ni ti fa ambeni tënë so atoto nde, nga nda ni alingbi ti duti nde.

Na yâ ayanga ti kodoro so ayeke na agere-mbeti, a hunda ti sala si mbage oko oko ti lê ti tënë oko oko atoto tâ na lege ni. Tongana mara ti ayanga tongaso, na tapande Grec, Espagnole na Zulu, amû peko ti andia so ayeke gbian pëpe, kusala ni ayeke ngangu mingi pëpe. Ye oko, ngangu so ambeni yanga ti kodoro nde asala na ndo ti mbeni yanga ti kodoro alingbi ti sala si atënë ni ayeke toto gi tongana ti so a yeke na ayanga ti kodoro so a londo dä. Ye ti pekoni ayeke so mbeni gere-mbeti wala bungbi ti agere-mbeti alingbi ti toto nde nde wala, na ambeni ngoi, ti toto oko pëpe. Peut-être a lingbi ti hunda na mo ti bata na li totongo ti atënë so ayeke nde, na mo sala kusala na ni fani mingi na yâ ti salango tënë ti mo. Na Chinois, tâ fango peko ti totongo ti atënë ahunda ti bata na li adessin saki mingi. Na yâ ti ambeni yanga ti kodoro, nda ti mbeni tënë alingbi ti duti nde tongana a gbian totongo ni. Tongana zo abi bê mbilimbili pëpe na ye so, lo lingbi ti fa atënë so ayeke na lege ni pëpe.

Tongana atënë ti mbeni yanga ti kodoro ayeke na ambage nde nde, na tapande “pe-nde-re”, a yeke kota ye ti fa mbage wa atoto mingi ahon amba ti lo. Mingi ti mara ti ayanga ti kodoro tongaso ayeke na mbeni tapande ti totongo ti ambage ti tënë so ayeke gbian kirikiri pëpe. Na ando so tapande ni ayeke nde, a yeke sû tënë ni na mbeni fä na ndo ni. Ye so asala si fango peko ti totongo ti atënë ni akpengba mingi pëpe. Ye oko, tongana tapande ni ayeke gbian mingi, kpale ni akiri aga ngangu. Ti sala ye nzoni na ye tongaso, a hunda ti bata ye mingi na li.

Na yâ ti ambeni yanga ti kodoro, akpoto so ayeke na li ti atënë ayeke mbeni kota ye so a lingbi a bi bê dä. Ye so andu afä so a zia na ndo wala na gbe ti agere-mbeti tongana: è, é, ô, ñ, ō, ŭ, č, ö, ç. A lingbi ti sû akpoto so wala a lingbi ti hunda na zo so adiko ni ti hinga ni na lege ti ye so angoro tënë ni. Tongana a hunda na zo ti hinga ni lo mveni, a yeke hunda ande na mo ti leke tele nzoni tongana mo yeke na devoir ti diko ye na gbele azo.

Na ndo salango si atënë atoto na lege ni, a lingbi a kpe ambeni gbanda. Ti sala ni tâ na lege ni ahon ndo ni alingbi ti sala si azo abâ so a yeke tâ salango ye ti mo pëpe, na même ti tene so mo yeke sala baba. A lingbi ti tene tongaso nga teti atotongo ti atënë so aga ngbele ye awe. Ye so ayeke gboto ande gi lê ti azo na ndo zo so ayeke sala tënë ni. Na mbeni mbage nde, a yeke nzoni ti sala hange na lege so e yeke sala na tënë. A sala tënë awe na ndo ambeni ti aye so na yâ ye ti manda “Atënë so lê ni avulu”.

Totongo ti atënë so mingi ti azo ayeda na ni na mbeni yanga ti kodoro alingbi ti duti nde nde na yâ ti akodoro nde nde, na même na ambage nde nde ti kodoro oko. Salango tënë ti mbeni wande na yâ yanga ti kodoro ni alingbi ti duti nde kete. Na yâ ti ambeni yanga ti kodoro, abakari alingbi ti fa so totongo ti mbeni tënë so azo ayeda na ni alingbi ti duti gi oko pëpe. Tongana mbeni zo amanda mbeti ague yongoro pëpe, wala yanga ti kodoro so lo yeke tene fadeso ayeke pëpe yanga ti kodoro so a dü lo dä, lo yeke wara ande nzoni mbilimbili na mango nzoni azo so ayeke tene yanga ti kodoro ni pendere mingi, nga na gingo ti tene atënë ni tongana ti ala. Teti so e yeke aTémoin ti Jéhovah, e ye ti sala tënë na mbeni lege so ane tokua so e yeke gue na ni na zo, na so azo alingbi ti gbu nda ni hio.

Na yâ salango tënë ti lâ oko oko, a yeke lakue nzoni mingi ti sala kusala na atënë so mo hinga ni nzoni. Mingi ni, salango si atënë atoto na lege ni na yâ ti lisoro ayeke mbeni kpale pëpe. Ye oko, tongana mo yeke diko mbeni ye na kota go, mo lingbi ti tï na ndo ambeni tënë so mo yeke sala kusala na ni lâ na lâ pëpe. A-Témoin ti Jéhovah ayeke diko aye mingi na kota go. E yeke diko Bible na azo tongana e yeke fa tënë na ala. A yeke hunda na ambeni ita-koli ti diko aparagraphe na Mandango Tour ti Ba Ndo wala na Mandango Buku ti Kongregation. A yeke kota ye ti diko mbeti ni tâ na lege ni nga ti sala pëpe si azo abi bê pëpe na tokua so e ga na ni na ala. Ye alingbi ti si tongaso tongana e diko atënë ni na lege ni pëpe.

Mo bâ so a yeke ngangu na mo ti diko iri ti ambeni zo na yâ ti Bible? Hunda ni na zo so ahinga ti tene yanga ti kodoro ni nzoni. Tongana mo hinga tâ lege ti diko a-iri ni nzoni awe, tara pekoni na kota go.

Alege ti maï dä. Mingi ti azo so ayeke na kpale ti dikongo atënë na lege ni ahinga ni pëpe. Tongana surveillant ti ekole atene na mo ti sala si totongo ti ambeni tënë asigigi nzoni, yeda na nzoni bê ti lo. Tongana mo hinga kpale ni awe, mo yeke leke ni nzoni tongana nyen?

Mbeni lege ti sala si totongo ti atënë asigigi nzoni ahon ti kozo ayeke ti diko ye na mbeni zo nde so ahinga ti fa totongo ti atënë nzoni mingi, na hunda na lo ti fa na mo agirisango lege ti mo.

Mbeni lege ni nde ayeke ti mä azo so ayeke tene tënë nzoni. Tongana kasete ti Traduction du monde nouveau wala ti Tour ti Ba Ndo na ti Réveillez-vous! ayeke na yanga ti kodoro ti mo, sala kusala na ni nzoni. Na ngoi so mo yeke mä ni, bâ atënë so a tene pekoni nde na ti so mo lingbi fade ti tene. Sû ni na mbeti, na tara pekoni.

Na yâ ti ayanga ti kodoro mingi, lege ayeke dä ti bâ mbeni bakari so ayeke fa nda ti atënë, tongana nyen a yeke sû ni nga tongana nyen a yeke toto. Tongana a yeke tongaso, gi na yâ ni atënë so mo hinga ni pëpe. Tongana mo hinga ti sala kusala na bakari pëpe, bâ akozo lembeti ni so afa nda ti afä so ayeke dä wala, tongana lege ayeke dä, hunda na mbeni zo ti fa nda ni na mo. Bakari ni ayeke fa ande na mo mbage wa ti atënë ni ayeke toto ngangu ahon ambeni. Na yâ ti ambeni ye, mara ti totongo ti mbeni tënë alingbi ti duti nde nde, a lingbi na ye so angoro tënë ni. Tene na kota go fani mingi peko ti atënë kue so mo yeke gi na yâ ti bakari ni kozoni si mo kanga ni. Tongana ngoi ayeke hon, mo yeke fa ande peko ti totongo ti atënë tâ na lege ni, na salango tënë ti mo ayeke ga ande nzoni mingi.