Lekengo tele pendere

LEGE so mo yeke leke na tele ti mo ayeke fa ye mingi na ndo mo. Atâa so Jéhovah ayeke bâ ye so ayeke na yâ ti bê ti zo, mingi ni azo ayeke hinga tënë na ndo ti amba ti ala na lege ti ye so lê abâ, teti “zo abâ lê ti zo”. (1 Sam. 16:7). Tongana mo yü bongo nzoni na mo leke tele ti mo nzoni, azo ayeke tene ande so mo hinga ti ne tele ti mo, na ala yeke duti ande ndulu ti mä mo. Ye so alingbi nga ande ti sala ye nzoni na ndo bungbi so mo ga na iri ni nga na ndo bango ndo ti azo ni na mbage ti Nzapa so mo yeke voro.

Aye so a lingbi a mû pekoni. Bible azia na sese pëpe gbâ ti andia na ndo lege so zo ayeke leke na tele ti lo. Me lo fa biani akpengba-ndia so ayeke na lege ni, so alingbi ti mû maboko na e ti mû anzoni desizion. Kpengba-ndia so ayeke kota ahon atanga ni ayeke so e “sala ye kue teti gloire ti Nzapa.” (1 aCor. 10:31). Akpengba-ndia wa andu lege so e yeke leke na tele ti e?

Kozoni kue, Bible awa e ti tene tele ti e nga na bongo ti e aduti na saleté pëpe. Na yâ Ndia ti lo so lo mû na Israël ti giriri, Jéhovah afa aye so lo hunda na ndo dutingo na sioni oko pëpe. Na tapande, tongana a yeke ngoi ti salango kua ti aprêtre, a lingbi ala sukula tele ti ala nga na abongo ti ala na ambeni mbilimbili ngoi so a fa (Lév. 16:4, 24, 26, 28). A-Chrétien ayeke na gbe ti Ndia ti Moïse pëpe, me akpengba-ndia so ayeke na yâ ni angbâ lakue ngangu (Jean 13:10; Apoc. 19:8). Mbilimbili tongana e yeke gue na mbeni ndo ti vorongo wala e yeke fa tënë, a lingbi tele ti e, fion ti yanga ti e nga na bongo ti e aduti nzoni si aso bê ti azo pëpe. A lingbi azo so ayeke mû diskur, ayeke na devoir wala ayeke sala démonstration na gbele kongregation azia nzoni tapande na ndo ye so. Bingo lê nzoni na ndo lege so e yeke leke na tele ti e afa so e yekia Jéhovah na e yekia bungbi ti lo.

Use ni, Bible awa e ti gi ti sala tele ti e kete na ti sala ye na ndara. Bazengele Paul awa awali Chrétien ti “yü bongo . . . na kota bê pëpe [“na lege ti salango tele ti ala kete,” NW ], na ndara ti bata tele ti ala; ala bua kuali ti ala pëpe, ala yü lor pëpe, wala perle pëpe, wala bongo ti nginza mingi nga pëpe; me ala yü kusala nzoni so alingbi na awali so atene ala yeke bata tënë ti Nzapa.” (1 Tim. 2:9, 10). Salango tele kete na salango ye na ndara ayeke nga kota ye mingi na yâ yungo bongo ti akoli nga na lekengo tele ti ala pendere.

Zo so asala tele ti lo kete ayeke gi kue pëpe ti so bê ti azo nga ti gboto lê ti azo senge senge na ndo lo mveni. Salango ye na ndara ayeke nzoni bango yâ ti tënë. Zo so ayeke sala ye tongaso ayeke sala ye na lege ni ndali ti so lo yekia andia ti Nzapa. Salango ye tongaso akanga lege pëpe na yungo bongo pendere. Me a mû maboko na e ti gi ti leke tele pendere na ti kpe akode ti yungo bongo na ti lekengo tele so ahon ndo ni (1 Jean 2:16). E yeke sala ye alingbi na akpengba-ndia so atâa e yeke na mbeni ndo ti vorongo, e yeke fa tënë wala e yeke sala ambeni ye nde. A lingbi même abongo ti e ti lâ oko oko afa so e sala tele ti e kete na e sala ye na ndara. Na ekole wala na place ti kua ti e, alege alingbi ti zi ande na e ti fa tënë. Atâa so e lingbi ti yü bongo pëpe tongana ti so e yeke sala teti abungbi nga na akota bungbi, a lingbi e leke bongo ti e nzoni, na saleté pëpe nga a fa so e sala tele ti e kete.

Biani, e kue e yeke yü bongo tongana mba pëpe. A ku nga pëpe ti tene e sala tongaso. Ye so anzere na azo ayeke nde nde, na so ayeke tâ na lege ni. Me a lingbi a sala ye lakue alingbi na afango lege ti Bible.

Bazengele Pierre afa so ye so ayeke même kota ahon lekengo kuä ti li nga na abongo ayeke pendere so ague oko na “zo-ti-ya-ni”. (1 Pi. 3:3, 4). Tongana bê ti e asi na ndoye, ngia, siriri, nzobe nga na mabe so gere ni aluti nzoni, aye so ayeke ga ande na lê ti e abongo ti yingo so agonda biani Nzapa.

Ota ni, Bible awa e ti gi ti bâ wala lege so e yeke leke na tele ti e ayeke nzoni. Na 1 Timothée 2:9, a sala tënë ti “bongo so alingbi” wala so a leke ni nzoni. Atâa so bazengele Paul ayeke sala tënë ti bongo ti awali, oko kpengba-ndia ni andu akoli nga. Mbeni ye so a leke ni nzoni ayeke ye so ayeke tâ na lege ni. Atâa e yeke na ye mingi wala pëpe, e lingbi ti leke tele ti e pendere.

Mbeni oko ti akozo ye ti tele ti e so azo ayeke bâ ayeke kuä ti li ti e. A lingbi e leke ni nzoni nga na lege ni. Salango ye ti azo ti kodoro ni nga na ye so a dü zo na ni ayeke sala ngangu na ndo lege so azo ayeke leke na kuä ti li ti ala. Na 1 aCorinthien 11:14, 15, e wara wango ti Paul na ndo lekengo kuä ti li, so andu biani aye use so. Ye oko, tongana lekengo kuä ti li ti mbeni zo afa so lo yeke gi ti kpa koli wala wali, ye so ague nde na akpengba-ndia ti Bible.​—Deut. 22:5.

Ti akoli, lekengo tele pendere alingbi ti ndu fango kuä ti yanga ti ala nzoni. Na ando so azo kue abâ kuä ti yanga ti nduzu tongana ye so ane zo, a lingbi zo kue so ayeke na ni aleke ni lakue pendere.

Osio ni, a lingbi lege so e yeke leke na tele ti e afa na gigi pëpe so e ndoye sese so na asalango ye ti lo. Bazengele Jean agboto mê ti e, lo tene: “I ndoye sese so pëpe, wala ye so ayeke na sese so.” (1 Jean 2:15-17). A hinga sese so na anzara mingi ti sioni. Na popo ni, Jean asala tënë ti nzara ti mitele so ayeke na siokpari nga salango baba ti mosoro. Mbeti ti Nzapa agboto lê nga na ndo yingo ti kengo yanga ti akota zo ti kodoro (aProv. 17:11; aEph. 2:2). Mingi ni, anzara nga na abango ndo tongaso ayeke sigigi polele na lege ti yungo bongo nga na lekengo tele ti azo. Ye so asala si yungo bongo ti ala ayeke na lege ni pëpe, ayeke zingo nzara ti tele ti koli wala ti wali, aye gi ti pika bê ti azo, ala leke ni nzoni pëpe wala ala yü ni gi tongaso. Teti so e yeke awakua ti Jéhovah, e yeke kpe mara ti akode tongaso ti yungo bongo so ayeke ti aChrétien pëpe.

A hon ti mû peko ti sese so, a yeke duti tâ nzoni ye mingi ti tene mo mû peko ti tapande ti akoli na awali so akpengba na lege ti yingo na yâ ti kongregation na yâ yungo bongo nga na lekengo tele ti mo pendere! Amaseka-koli so aye ti duti mbeni lâ awamungo diskur na gbele azo alingbi ti bâ yungo bongo ti aita so ayeke mû adiskur fadeso. Azo kue alingbi ti manda ye na lege ti tapande ti azo so, na be-biani, amû mbage na fango tënë teti ngu mingi.​—1 Tim. 4:12; 1 Pi. 5:2, 3.

Oku ni, na mungo desizion na ndo ye so alingbi, a yeke nzoni e dabe ti e so “Christ amû ngia na Lo mveni pëpe”. (aRom. 15:3). Ye so agbu lani bê ti Jésus ahon atanga ni kue ayeke salango ye so bê ti Nzapa aye. Jésus azia nga mungo maboko na azo kozo na aye ti lo mveni. Na ndo akode ti yungo bongo nga na lege so e yeke leke na tele ti e, tongana mbeni ye ayeke kanga ande lege na popo ti e na azo ti ndo so e yeke dä fadeso, a lingbi e sala nyen? Mungo tapande ti tâ be-ti-molenge ti Christ alingbi ti mû maboko na e ti mû adesizion ti ndara. Bazengele Paul afa kpengba-ndia ni, lo tene: “E sala ye oko pëpe so alingbi ga ye so azo apika gere ti ala dä.” (2 aCor. 6:3). Ndali ni, e yeke ke alekengo kuä ti li wala abongo so alingbi ti kanga lege na azo so e ye ti fa tënë na ala.

Lutingo ti e na nduzu. Lekengo tele pendere andu nga lutingo nzoni. Biani, e kue e yeke luti tongana mba pëpe, na e yeke gi pëpe ti mû peko ti mbeni ye so a leke ni kozoni. Me, a yeke nzoni ti bâ so, na lege ti salango ye ti azo na yâ ti Bible, tongana zo aluti na lo ba pëpe, lo fa so lo yeke ne tele na lo yeke na beku (Lév. 26:13; Luc 21:28). Ye oko, teti so lo sala kua teti ngu mingi na bango peko ti lo wala teti so lo yeke mbakoro wala ngangu ayeke pëpe, mbeni ita-koli wala ita-wali alingbi ti luti na bango ni. Peut-être a lingbi lo gbu mbeni ye si lo luti. Me ti ala so ye ni ayeke tongaso pëpe, a hunda ti luti na bango ni pëpe na ngoi so ala yeke sala tene na azo, si ala fa pëpe so ala sala nzara ti ye oko pëpe wala ala ye ti hunda pardon na azo ni. Legeoko nga, atâa so a yeke sioni pëpe ti tene mbeni wamungo diskur azia maboko ti lo ngoi na ngoi na ndo pupitre, mingi ni, tongana lo ba na ndo ni pëpe, ye so ayeke sala si azo so ayeke mä lo abâ ye ni na nzoni lê.

Agbakuru ti kua so ayeke na lege ni. A yeke pëpe gi tele ti e si a lingbi e leke ni pendere na saleté pëpe, me a lingbi agbakuru so e yeke sala na kua na fango tënë aduti na saleté pëpe nga na lege ni.

Na tapande, Bible ti mo. Lege ayeke dä pëpe teti e kue ti wara mbeni fini Bible tongana ti e awoko kue. Ye oko, atâa a sala ngu oke si e yeke na Bible ti e, a lingbi a fa so e yeke sala kusala na ni na hange.

Biani, alege nde nde ayeke dä ti leke yâ ti mbeni bozo ti fango tënë, me a lingbi a duti na lege ni. A si na mo awe ti bâ so akugbe alondo na yâ ti Bible ti mbeni wafango tënë atï na ngoi so lo ye ti diko mbeni versê na mbeni zo, wala na ngoi so mbeni ita ayeke mû diskur na kongregation? Ye so agboto lê ti mo na ndo ti mbeni ye nde, ni la pëpe? Tongana ambeti na yâ ti Bible asala si lê ti azo ague na ndo ti mbeni ye nde, mo yeke leke agbakuru ti mo nzoni tongana mo zia ni na mbeni ndo nde. Bâ nga so na yâ ti ambeni kodoro, azo alingbi ti bâ ziango Bible wala ambeti ti Nzapa na sese tongana bango ye na nene ni pëpe.

A lingbi lekengo tele pendere aduti kota ye na lê ti e. A yeke sala nga ye na ndo lege so azo ayeke bâ na e. Me ahon ye kue, ye so agbu bê ti e ngbanga ti so e ye ti “sepela nzo tënë ti Nzapa Sauveur ti e na yâ ye kue.”​—Tite 2:10.