Mbeni tapande teti amaseka na akangba
Lo lë lani mbeni kpengba songo na Nzapa. Lo mû fini ti lo kue ti sara ye so bê ti Jéhovah aye. Lo ‘tambela na tâ Nzapa’ na tongaso Nzapa airi deba nzoni na ndo lo. Iri ti zo so ayeke Noé, na lo yeke nzoni tapande so azo kue alingbi ti mû pekoni, atâa ala yeke amaseka wala akangba (Gen. 6:9). Kasete vidéo Noé: il marchait avec Dieu ayeke mû ande maboko na e ti hinga dutingo ti Noé lani, ngbanga ti nyen lo lingbi na deba nzoni ti Jéhovah nga lege so e lingbi ti fa na gigi anzoni sarango ye ti lo.
Na yâ ti limon ti Noé so a zia ni na ndo DVD, a yeke wara mbeni mbage ni so a iri ni “quiz” so amû lege na mo ti tara hingango ye ti mo. Bâ vidéo so, na pekoni, kiri tënë na ahundango tënë so: (1) Sioni ye wa ambeni ange asara ni lani? A-Néphilim ayeke lani azo wa? (Gen. 6:1, 2, 4). (2) Nyen la asara si azo aga lani sioni mingi? Bibe ti Nzapa na ndo ye ni so ayeke tongana nyen? (Gen. 6:4-6). (3) Na lege wa Noé ayeke ti lo lani nde na tanga ti azo ni? (Gen. 6:22). (4) A futi lani azo ti sioni na lege ti nyen? (Gen. 6:17). (5) Konongo ti arche ni ayeke lani tongana nyen? (Gen. 6:15). (6) Nde na lekengo arche, mbeni ye wa Noé asara ni? Sarango ye ti azo na gbele ni ayeke tongana nyen? (Mat. 24:38, 39; 2 Pi. 2:5). (7) A mû anyama nde nde oke oke ti lï na yâ arche ni? (Gen. 7:2, 3, 8, 9). (8) Ngu apika lani teti lango oke? Ngu amû ndo ti sese kue teti lango oke? (Gen. 7:11, 12; 8:3, 4). (9) Ngbanga ti nyen Noé na sewa ti lo asö kuâ lani? (Gen. 6:18, 22; 7:5). (10) Na nda ni, arche ni aduti na ndo wa? (Gen. 8:4). (11) Noé ahinga lani tongana nyen so lo lingbi ti sigigi na yâ ti arche ni? (Gen. 8:6-12). (12) Ye wa Noé asara na ngoi so lo sigigi na yâ ti arche ni? (Gen. 8:20-22). (13) Kongö ni aduti fä ti nyen? (Gen. 9:8-16). (14) Ti ‘tambela na Nzapa’ aye ti tene nyen? (Gen. 6:9, 22; 7:5). (15) A hunda na e ti sara nyen tongana e ye ti wara tere ande na Noé na yâ ti Paradis? (Mat. 28:19, 20; 1 Pi. 2:21).
Noé ayeke be-ta-zo na lo mä yanga ti Nzapa. Ye wa tondo ti Bible na ndo lo afa na mo na ndo lege so mo nga kue mo lingbi ti ‘tambela na Nzapa’ na ti zia bê ti mo na ngangu ti lo ti zi azo ti lo laso?—Gen. 7:1; aProv. 10:16; aHéb. 11:7; 2 Pi. 2:9.