Salango tënë na wâ

SALANGO tënë na wâ asala si mbeni diskur wala devoir anzere. Atâa so a yeke kota ye ti duti na mbeni ye so alingbi ti fa ye na zo, a yeke salango tënë na wâ si ayeke mû maboko ti gboto lê ti azo so ayeke mä ni. Atâa ndo so mo londo dä wala salango ye ti mo ayeke tongana nyen, mo lingbi ti gi ti sala tënë na wâ.

Zia bê ti mo asala tënë. Tongana lo yeke sala tënë lani na mbeni wali ti Samarie, Jésus atene so a lingbi azo so ayeke voro Jéhovah avoro lo “na yingo na tene-biani.” (Jean 4:24). A lingbi bê so asi singo na singila si ayeke na gunda ti vorongo ti ala, na a lingbi a gue oko na tâ tënë so ayeke na yâ Tënë ti Nzapa. Tongana mbeni zo ayeke na kota singila tongaso, ye so ayeke sigigi ande na yâ lege so lo yeke sala na tënë. Lo yeke duti ande ndulu ti sala tënë na azo na ndo aye so Jéhovah aleke na ndoye. Lê ti lo, salango amaboko ti lo nga na go ti lo ayeke fa ande tongana nyen atënë so agbu bê ti lo.

Tongaso, ngbanga ti nyen mbeni wamungo diskur so andoye Jéhovah, na ahinga na bê kue ye so lo yeke tene, alingbi ti duti na wâ pëpe na yâ tënë ti lo? Gi ti leke ye so lo yeke tene ande alingbi kue pëpe. Me a lingbi lo lï na yâ ti devoir ti lo ni, ye ni andu bê ti lo ngangu. Na tapande, a lingbi ti mû na lo mbeni devoir na ndo sandaga ti Jésus Christ so azi zo. Na ngoi so lo yeke sala devoir ti lo, a yeke nzoni gi anzene nzene tënë si ayeke na yâ ti li ti lo pëpe, me singila teti ye so sandaga ti Jésus aye ti tene teti lo mveni nga teti azo so ayeke mä lo. A lingbi lo kiri lo bâ bê ti kiri singila so lo yeke na ni na mbage ti Jéhovah Nzapa nga na mbage ti Christ Jésus teti pendere ye so ala mû. A lingbi lo bi bê na ndo pendere beku ti mbeni fini so ayeke na gbele azo kue. Beku ti duti na ngia teti lakue lakue na yâ tele ti mbilimbili-kue na yâ ti paradis na ndo sese! Ni la, a lingbi lo zia bê ti lo na yâ ni.

Na ndo Esdras, mbeni wafango ye na Israël, Bible atene so lo ‘zia bê ti lo ti gi Ndia ti L’Eternel, ti bata Ndia ni, na ti fa [ni] na azo ti Israël’. Tâ nda ti tënë na yanga ti Hébreu so a kiri pekoni na “azia bê ti lo” aye ti tene “aleke bê ti lo”. (Esdras 7:10). Tongana e sala legeoko tongaso, ti leke gi pëpe atënë me nga bê ti e, fade tënë ti e ayeke londo na bê. Tenengo tâ tënë tongaso na bê kue alingbi ti sala ye mingi ti mû maboko na azo so e yeke sala tënë na ala ti kono tâ ndoye teti tâ tënë.

Bi bê na azo so ayeke mä mo. Mbeni kota ye nde so ayeke sala si mo sala tënë na wâ ayeke ti hinga na bê kue so a lingbi azo so ayeke mä mo amä ye so mo yeke na ni ti tene. So aye ti tene, tongana mo yeke leke devoir ti mo, a lingbi mo bungbi gi pëpe anzoni tënë ti tene, me mo sambela nga Jéhovah ti fa lege na mo na yâ salango kusala na ni teti nzoni ti azo so mo yeke sala tënë na ala ande (Ps. 32:8; Mat. 7:7, 8). Gi ti hinga ngbanga ti nyen a lingbi azo ni amä tënë ni, tongana nyen a yeke ga na ala ye ti nzoni nga tongana nyen mo lingbi ti fa ni na mbeni lege so asala si ala bâ nene ni.

Leke devoir ti mo juska mo wara kota nzara ti fa ni. A hunda pëpe ti duti fini ye, me lege so mo yeke fa ni alingbi ti duti fini ni. Leke mbeni ye so ayeke mû ande biani maboko na azo ni ti kpengba songo ti ala na Jéhovah, ti yekia aye so lo leke, ti luti nzoni na gbele ngangu so sese ti laso ayeke sala na ndo azo wala ti lë lengo na yâ fango tënë ti ala. Tongana mo sala tongaso, andâ mo wara nda ti tënë kue ti sala tënë na wâ na yâ devoir ti mo.

Ka tongana devoir ti mo ayeke ti diko ye na gbele azo? Ti sala ni na wâ, a hunda ye mingi ahon gi ti lingbi ti tene peko ti atënë tâ na lege ni nga ti bungbi ala oko nzoni. Manda ye ni. Tongana mo yeke diko ande mbeni mbage ti Bible, gi ambeni ye na ndo ni. Hinga biani so mo gbu tâ nda ni nzoni. Bâ tongana nyen a yeke ga na mo ye ti nzoni nga na azo ni, na diko ni na nzara ti fa ye so na ala.

Mo yeke leke tele ti gue na fango tënë? Kiri mo bâ tënë so mo ye ti sala na lisoro nga na aversê so mo yeke sala na kusala ande. Bâ nga ye wa ayeke na yâ ti li ti azo ni. Atënë wa asigigi na yâ ti asango? Akpale wa azo ni ayeke na ni? Tongana mo wara aye kue ti fa na azo so Tënë ti Nzapa ayeke na atâ yorö teti akpale ti ala mveni, mo yeke ndulu ti fa ni, na salango tënë na wâ ayeke ga gi na bê ti lo.

Fa wâ ti mo na yâ salango tënë so apusu zo ti sala ye. Mingi ni salango tënë na wâ ayeke sigigi polele na lege ti salango tënë ti mo so apusu zo ti sala ye. A lingbi zo abâ ye so na lê ti mo. A lingbi azo abâ mo tongana zo so ahinga na bê kue tënë so lo yeke tene, pëpe tongana zo so aluti gi ngangu na ndo atënë ti lo.

A lingbi mo sala ye ahon ndo ni pëpe. Ambeni zo ayeke ti ala peut-être ndulu ti tene tele ti ala anzere teti aye oko oko kue. A lingbi a mû maboko na ala ti hinga so tongana mbeni zo asala ye na baba wala lo fa atënë ti bê ti lo na gigi ahon ndo ni, azo so ayeke mä lo ayeke bi bê ande mingi na ndo lo ahon ti bi bê na tënë ti lo. Na mbeni mbage nde, a yeke nzoni a wa azo ti kamene ti fa atënë ti bê ti ala na gigi.

Tongana mo yeke sala tënë na wâ, azo so ayeke na tele ti mo ayeke duti na wâ nga. Tongana mo yeke bâ lê ti azo so ayeke mä mo na mo yeke na wâ na yâ ti devoir ti mo, azo ni ayeke hinga ni. Apollos afa so lo yeke na wâ na yâ ti salango tënë ti lo, na a fa lo tongana mbeni zo so ahinga ti mû diskur pendere mingi. Tongana a yeke yingo ti Nzapa si apusu mo, salango tënë ti mo na wâ ayeke pusu ande azo so amä mo ti sala ye.​—Kus. 18:24, 25; aRom. 12:11.

Salango tënë na wâ alingbi na atënë ni. Sala hange si wâ ti mo ni amû yâ ti devoir ti mo kue pëpe, si bê ti azo ni anze kue. Ala yeke kanga ande mê ti ala na wango kue so mo yeke mû ti tene ala sala ye alingbi na ye so mo yeke tene. Ye so agboto lê na ndo nene ti leke devoir so amû lege ti sala aye nde nde na yâ ni. Kpe ti tï na yâ mbeni kode so afa so mo sala nzara ti ye oko pëpe. Tongana mo soro atënë ti mo nzoni, mo yeke sala ande nzara ni mingi. Me ambeni ye ahunda gi ti sala tënë ni na wâ mingi ahon ambeni nde, na a lingbi mo yôro ni na kode na yâ ambage kue ti devoir ti mo.

A yeke mbilimbili angbongboro tënë si a lingbi mo fa ni na wâ. A lingbi devoir ti mo aduti na akota mbage so ague yeke yeke na peko ti tele ti si na mbeni kota ye. Teti ala yeke tongaso, mingi ni ala yeke duti aye so a leke ni ti pusu azo ni ti sala ye. So mo ga na azo ni awe ti yeda na tënë ni, a lingbi mo pusu ala ti sala ye, ti fa na ala anzoni ti salango ye alingbi na ye so mo fa. Salango tënë ti mo na wâ ayeke mû ande maboko na mo ti ndu bê ti azo so ayeke mä mo. A yeke gi ka na ngangu pëpe devoir so a sala ni na wâ. A lingbi mbeni nda ti sala tongaso ayeke dä, na atënë so mo leke teti devoir ti mo ayeke mû na mo ande nda ni so.