Salango maboko nga na lê

AZO ti ambeni kodoro ayeke sala maboko ti ala hio ahon azo ti ambeni kodoro nde. Ye oko, e lingbi ti tene so azo kue ayeke sala tënë na salango lê nga kamême na maboko ti ala. Ye so ayeke tâ tënë na yâ senge lisoro nga na yâ salango tënë na gbele azo mingi.

A yeke lani ye ti tele ti Jésus na ti akozo disciple ti lo ti sala maboko ti ala. Mbeni lâ, mbeni zo atene na Jésus so mama ti lo na aita ti lo aye ti sala tënë na lo. Jésus akiri tënë, lo tene: “Zo nyen ayeke mama ti Mbi? Azo nyen ayeke aita ti Mbi?” Na Bible akiri atene: ‘Lo yôro tïtî Lo na adisciple ti Lo, Lo tene, Bâ, mama ti Mbi na aita ti Mbi!’ (Mat. 12:48, 49). Ambeni versê ti Bible tongana Kusala 12:17 na 13:16 afa so salango maboko ti bazengele Pierre na Paul aga nga gi na bê ti lo mveni.

A yeke pëpe gi totongo ti go si ayeke fa na gigi atënë so ayeke na yâ ti li ti e nga atënë ti bê ti e. Salango maboko ti e nga na lê ti e ayeke fa ni nga. Tongana zo so ayeke sala tënë asala kusala na aye so nzoni pëpe, azo alingbi ti bâ so lo sala nzara ti ye oko pëpe. Me tongana lo zia akode so alingbi na ni na tele ti atënë ti lo, salango tënë ti lo ayeke ga nzoni mingi. Atâa tongana mo yeke sala tënë na téléphone, tongana mo sala maboko nga na lê ti mo alingbi na ni, totongo ti go ti mo ayeke fa ande hio nene ti ye so mo yeke tene nga atënë ti bê ti mo na ndo ni. Ni la, atâa tongana mo yeke sala kusala na atënë so aga gi na bê ti ala mveni wala mo yeke diko mbeti, atâa azo so ayeke mä mo ayeke bâ mo wala ayeke bâ yâ ti Bible ti ala mveni, salango maboko nga na lê ti mo ayeke kota ye mingi.

A lingbi mo manda salango maboko nga na lê mandango pëpe. Mo manda lâ oko pëpe ti he ngia wala ti tene bê ti mo aso. A lingbi salango maboko ti mo afa nga aye so ayeke na yâ ti bê ti mo. Tongana salango maboko ti mo aga na bê ti lo mveni, a yeke duti nzoni mingi.

Yâ ti akota mbage ti salango maboko ayeke use: so afa peko ti aye nga so amû ngangu na atënë. Salango maboko so afa peko ti aye ayeke fa ye so zo asala wala yongo ti aye nga ndo so aye ayeke dä. Na Ekole ti Kusala ti aChrétien, tongana mo yeke sala kusala na ndo salango maboko, gi pëpe ti sala ni gi oko wala use. Gi ti sala maboko ti mo tongana ti so mo yeke sala ka, na sala ni na yâ devoir ti mo kue. Tongana mo yeke na kpale ti sala tongaso, mo lingbi ti bâ so a yeke nzoni ti gi atënë so afa lege ti si na mbeni ndo, yongo ti aye nga konongo ti aye, ndo so aye ayeke dä wala tongana nyen ala luti. Ye oko, na yâ mingi ti aye, ye kue so mo lingbi ti sala ayeke ti yôro tele ti mo na yâ devoir ti mo kue. Gi bê ti mo pëpe ti hinga tongana nyen azo ayeke bâ mo, me tene atënë nga sala ye tongana ti so mo yeke sala ka lakue. Tongana mbeni zo ayeke gi bê ti lo pëpe, salango maboko ti lo ayeke ga gi na bê ti lo mveni.

Salango maboko so amû ngangu na atënë ayeke fa atënë ti bê. A yeke fa nga so zo ni ahinga ye ni biani na bê kue. A yeke sala si atënë so ayeke na yâ ti li ti zo asigigi polele na ayeke mû ngangu na ni. Mara ti salango maboko tongaso ayeke kota ye. Me hange! A lingbi hio ti ga sioni kode. Tongana mo yeke gi na oko salango maboko lakue lakue, ye so alingbi ti sala si azo ayeke bâ gi ni ahon ti tene a sala si devoir ti mo aga nzoni mingi. Tongana surveillant ti ekole afa so mo yeke na kpale so, gi ti ngbâ gi na salango maboko so afa peko ti aye teti mbeni ngoi. Na pekoni, kiri mo to nda ti sala maboko ti mû ngangu na atënë.

Na yâ gingo ti hinga tongana nyen a lingbi mo sala maboko ti mû ngangu na atënë nga mara ti so wa alingbi biani, bâ atënë ti bê ti azo so mo yeke sala tënë na ala. Ti yôro maboko na lê ti ala alingbi ti sala ala nzoni pëpe. Na yâ ti ambeni kodoro, tongana mbeni koli azia maboko na yanga ti lo ti fa so bê ti lo adö, a lingbi ti bâ ye so tongana salango ye ti awali. Na yâ ti ambeni kodoro nde, a yeke na lege ni pëpe teti awali ti sala maboko ti ala mingi. Ni la, na amara ti ndo tongaso, a lingbi mbilimbili aita-wali asala lê ti ala mingi. Nga na gbele kete bungbi ti azo, na ndo sese kue, tongana zo asala maboko ti lo kota ahon ndo ni, ye so ayeke sala azo ngia.

Tongana mo yeke wara kode na mo yeke gi bê ti mo pëpe na yâ salango tënë ti mo, salango maboko ti mo kue ti mû ngangu na atënë ayeke fa ande na bê ti lo mveni atënë so ayeke na gbe ti bê ti mo, nga so mo hinga ye biani na bê kue. A yeke sala ande si nda ti tënë ti mo akiri ane.

Ye so lê ti mo afa. Ahon atanga ti ambage ti tele kue, mingi ni lê ti mo ayeke fa ye so ayeke biani na yâ bê ti mo. Lê ti mo, yanga ti mo, li ti mo so mo dengi kete, aye so kue ayeke sala kota kusala. Atâa tongana mo zi yanga ti mo pëpe, lê ti mo alingbi ti fa so mo sala nzara ti ye oko pëpe, mo ke ye, mo hinga li ti mo na mbeni ye pëpe, bê ti mo adö wala tele ti mo anzere. Tongana mara ti salango lê tongaso ague oko na atënë ti yanga, a lingbi ti sala si azo abâ ye ni tâ na yâ ti li ti ala nga a lingbi ti ndu bê ti ala. Wasalango ye azia gbâ ti ami na lê ti mo; kue ahon 30. Tongana ngia ayeke na yanga ti mo, ndambo ni tongaso la ayeke sala kusala.

Atâa mo yeke na ndo ti estrade wala mo yeke na fango tënë, mo yeke sala ngangu ti fa na azo mbeni tokua so azia ngia na bê. Pendere ngia so ayeke na yanga ti mo ayeke fa ye so. Me tongana lê ti mo afa ye oko pëpe, azo ayeke dë kite so mo yeke sala ye na bê ti mo kue.

Ahon ye kue, ngia so ayeke na yanga ti mo ayeke tene na azo so mo yeke na anzoni tënë na bê na mbage ti ala. Ye so ayeke mbilimbili kota ye mingi laso, so mingi ni azo ayeke na mbito ti awande. Ngia so ayeke na yanga ti mo alingbi ti mû maboko na azo ti gi bê ti ala pëpe na ti yeda hio na ye so mo yeke tene.