Lekengo tere amû lege ti sara anzoni vizite
1. Na lege wa kusala ti akozo Chrétien ayeke ga kota?
1 Jésus aleke adisciple ti lo nzoni mingi si ala ga anzoni wafango “tene-nzoni ti royaume.” (Mt 4:23; 9:35). Lo to nda ti leke ala na ngoi so lo yeke na sese ti Palestine. Ye oko, kozoni si lo kiri na yayu, Jésus afa so fade kusala ti aChrétien ayeke mû lê ti sese kue tongaso si ala “fa tënë na amara kue si ala ga adisciple.”—Mat. 28:19, 20
2. Ti mä komandema ti Jésus ti sara si azo ‘aga adisciple’ ahunda ye wa?
2 Kusala so ahunda ti kiri ti bâ azo kue so nzo tënë ti Royaume ti Nzapa anzere na ala na ti fa na ala ti bata ye kue so Christ akomande. Ti sara anzoni vizite tongaso, a hunda ti tene e leke tere nzoni.
3. Atâa gi na kozo gango ti mo, tongana nyen mo lingbi ti zia gere ti fini vizite?
3 Leke tere kozoni: Na kozo gango ti ala, ambeni wafango tënë asara kue ti zia mbeni hundango tënë na nda ti lisoro ni na ala mû yanga ti kiri ti sara lisoro na ndo ni. Ala bâ so ti sara kusala na atënë so ayeke na yâ ti buku Bible afa na ngoi so ala kiri ti sara vizite azi lege na ala ti to nda ti manda Bible hio.
4. Ngbanga ti nyen a lingbi e ku pëpe ti wara afini périodique kozoni si e kiri ti bâ zo ni?
4 So e yeke wara apériodique nze na nze aye pëpe ti tene so a lingbi e ku juska e wara afini ni ti nze ti peko kue awe si e kiri e bâ zo ni. E lingbi ti zingo nzara ti zo ni na sarango lisoro na ndo ti atënë so a fa na yâ ti périodique so lo yeke na ni kozo awe.
5. Ti zia na gbele e ye ti sara tongana e yeke gue ti sara avizite amû maboko tongana nyen?
5 Zia na gbele mo aye ti si dä: Kozoni ti gue, mû mbeni kete ngoi ti bâ note ti mo, na ti hinga ye so mo ye ti sara. Na tapande, bâ tënë ti yâ ti mbeti so mo zia na zo ni kozoni. Wala zia na lo mbeni mbeti so aluti na ndo ti tënë so ala sara lisoro dä kozoni. Tongana mo zia lani mbeni hundango tënë na zo ni, kiringo tënë na hundango tënë so ayeke duti ande biani ye so mo zia na gbele mo. Na ngoi so mo yeke sara tënë ti mbeni versê so ague oko na tënë ni, sara kue ti diko ni tâ gi na yâ ti Bible.
6. Ye wa e zia na gbele e na sarango avizite?
6 Ye so e zia na gbele e: Biani, ye so e zia na gbele e ayeke ti to nda ti manda Bible na zo. Mbeni ita-koli ahunda ti manda Bible na mbeni koli, me koli ni ake. Ita-koli ni akiri aga ti bâ lo na afini périodique, na lo tënë: “Ti laso, na lege ti Bible, e yeke kiri tënë na ahundango tënë ti azo”. Na peko ti so lo mä tënë ti zo ni, ita-koli ni adiko mbeni versê na mbeni paragraphe so ague oko na versê ni na yâ ti mbeni mbeti so a yeke sara na kusala ti manda Bible na zo. Ye so amû lege na lo ti manda Bible na zo ni lakue.
7. Tongana nyen nzoni lekengo tere ayeke mû maboko na mo ti to nda ti manda Bible na zo?
7 Ti mû ngoi ti leke tere ti sara avizite ayeke ga na ye ti nzoni mingi. Ngia ti e ayeke ga kota na fade e yeke na matabisi ti mû maboko na azo so “Nzapa adiko ala” ti mû lege ti fini.—Kus. 13:48.