“Sara ye kue ndali ti nzoni tënë”
1. Nyen la awafango tënë ti Royaume ayeke nduru ti sara ndali ti azo? na ngbanga ti nyen?
1 Bazengele Paul abâ so a yeke ngbanga ti lo ti fa nzoni tënë na azo (1 aCor. 9:16, 19, 23). Legeoko nga, bingo bê so e yeke na ni ndali ti nzoni duti ti lakue lakue ti azo si apusu e ti gue ti fa nzoni tënë na ala.
2. Na ndo ti tënë ti fango tënë, agbiango ye wa e yeke nduru ti sara? na ngbanga ti nyen?
2 Fa tënë na ndo nga na ngoi so mo lingbi ti wara azo: Nzoni wagingo susu ayeke bi yango wala gbanda ti lo na ndo nga na ngoi so bê ti lo aye pëpe, me lo yeke bi ni na ndo so nga na ngoi so lo lingbi ti gbu asusu mingi. E nga, legeoko tongana “awagingo azo,” e lingbi ti gbian yâ ti kapa ti e ti tene e wara azo ti territoire ti e si e duti na ngia mingi na yâ ti kota kusala ti ‘gbungo mara ti asusu nde nde kue.’ (Mat. 4:19; 13:47). Ti mû angbonga ti lakui ti gue ti bâ azo na da ti ala wala ti fa tënë na lege na akozo ngbonga ti ndapre, e lingbi ti sara ni pëpe? Ye so lani Paul azia na gbele lo ayeke “ti fa nda ti tënë ni kue na ndo ti nzoni tënë,” na lo gbu alege kue so azi na lo ti sara ni.—Kus. 17:17; 20:20, 24.
3, 4. Na fango tënë, na lege wa e lingbi ti gbian yâ ti kode ti fango tënë ti e? na ye so aga na ye ti nzoni wa?
3 Gbian atënë ti mo alingbi na dutingo ti azo: Ngoi na ngoi, mbeni wagingo susu ayeke gbian akode ti lo ti tene lo gbu mbeni mara ti susu. Tongana nyen e lingbi ti fa nzoni tënë ti Royaume ti tene andu bê ti azo ti territoire ti e? A lingbi e duti na kode ti tene mbeni tënë so andu azo kue ti ndo ni nga ti dengi mê nzoni na bibe ti ala na ndo ti tënë ni (Jacq. 119). E lingbi ti hunda mbeni tënë ti hinga bibe ti ala (aProv. 20:5). Na sarango tongaso e yeke wara lege ti gbian akode ti e ti fango nzoni tënë si andu bê ti ala. Paul aga “ye kue ndali ti mara ti azo nde nde kue”. (1 aCor. 9:22). Ti duti na ndara ti gbian yâ ti atënë ti e ayeke kota ye ti tene e ndu bê ti azo.
4 So tâ ngia si e yeke na ni ti fa na azo “tene-nzoni ti nzoye”! (És. 52:7). Zia e “sara ye kue ndali ti nzoni tënë” ti ndu azo mingi tongana lege ayeke dä ti sara ni.—1 aCor. 9:23.