A lingbi awafango tënë asambela
1. Ye wa ayeke kota ye na yâ ti kusala ti e?
1 E lingbi pëpe ti sara kua ti fango tënë na ngangu ti e wani. Jéhovah ayeke mû na e ngangu ti sara na kua ni (aPhil. 4:13). Lo yeke sara kusala na a-ange ti mû maboko na e ti wara azo so ayeke tongana angasangbaga (Apoc. 14:6, 7). Jéhovah la ayeke sara si alê ti tâ tënë so e lu na e tuku ngu dä akono (1 aCor. 3:6, 9). A yeke kota ye ti tene na yâ ti sambela awafango tënë azia bê ti ala na ndo ti Babâ ti e ti yayu!
2. Ambeni ye so e yeke sambela ndali ni ayeke nyen?
2 Ndali ti e wani: A yeke nzoni e sambela na ngoi kue so lege azi na e ti fa tënë (aÉph. 6:18). Ambeni ye so e yeke sambela ndali ni ayeke nyen? E lingbi ti sambela ti tene e duti na nzoni bango ndo na ndo ti territoire ti e na ti fa tënë na mbeto pëpe (Kus. 4:29). E lingbi ti hunda na Jéhovah ti sara si e gue na mbage ti azo ti nzoni bê so e lingbi ti manda Bible na ala. Tongana zo so e yeke fa tënë na lo ahunda mbeni tënë na e, e lingbi ti tene nduru sambela na yâ ti bê ti e ti hunda na Jéhovah ti mû maboko na e ti kiri tënë na lege ni (Néh. 2:4). E lingbi nga ti hunda ndara si e ngbâ ti zia fango tënë na kozo ndo (Jacq. 1:5). Na ndo ni, a yeke nzere na Jéhovah mingi tongana, na yâ ti sambela ti e, e fa singila ti bê ti e teti pasa so e yeke na ni ti duti awakua ti lo.—aCol. 3:15.
3. Sambela so e tene ndali ti ambeni zo nde ayeke sara si fango tënë ague na li ni tongana nyen?
3 Ndali ti amba ti e: A yeke nga nzoni e “sambela ndali ti amba ti [e]”, même ti di iri ti amba ti e awafango tënë na yâ ti sambela ti e tongana lege ayeke dä ti sara ni (Jacq. 5:16; Kus. 12:5). Kpale ti seni asara si mo fa tënë mingi pëpe? Sambela ndali ti amba ti mo awafango tënë so ayeke na nzoni seni. Bâ tongana senge ye pëpe ngangu so sambela ti mo ayeke sara na ndo ti ala! A yeke nga nzoni ti sambela ndali ti akota zo ti kodoro ti zi lege na kusala ti fango tënë, tongaso si aita ti e “[a]ngbâ ti duti kpô nga na siriri”.—1 Tim. 2:1, 2.
4. Ngbanga ti nyen ayeke nzoni e ngbâ lakue ti sambela?
4 Ti fa nzoni tënë na ndo ti sese kue ayeke mbeni kota kua mingi. Tongana e “ngbâ lakue ti sambela”, fade e yeke sara kusala so na ngangu ti Jéhovah.—aRom. 12:12.