Chapitre 26

Kiringo na Capernaüm

IRI TI Jésus amu ndo fadeso kue na ya kodoro na azo mingi ague ti wara lo na ndo nde nde so lo lango da. Na peko ti mbeni lango lo hon na mbage ti kota ngu ti Galilée ti kiri na Capernaüm. Tene ti kiringo ti lo amu ndo hio na ya kodoro, na azo mingi aga na da so lo yeke da. A-Farizien na awafango ndia alondo na ayongoro ndo tongana Jérusalem ti ga ti baa lo.

Azo abungbi mingi na tele ti yanga da ni, na mbeni zo oko alingbi ti li pepee. A yeke tongaso si mbeni ye ti kpene ayeke si. Ye so asi na ngoi ni so ayeke mbeni kota ye, ngbanga ti so a sala si e hinga so Jésus ayeke na ngangu ti hunzi ye so aga na vundu na azo na ti kiri sava ti tele na ala kue so lo soro.

Tongana Jésus angba ti fa ye na azo mingi, akoli osio aga na da ni na mbeni wazin so alango na ndo gbogbo so ayo ni. Ala ye si Jésus asava kamarade ti ala, ye oko lege ti gue na lo na Jésus ayeke da pepee ngbanga ti so azo ayeke mingi. So nyen! Ala zia pepee. Ala ma na ndo li ti da so ayeke kpangbala, ala sala du, na ala yoro gbogbo so wazin alango na ndoni ndulu na tele ti Jésus.

Jésus asala ngonzo ngbanga ti so afa tene na yanga ti lo? Oko pepee! Nde na so, lo bi be ti lo mingi na ndo mabe ti akoli so. Lo tene na wazin: “A pardonné siokpari ti mo awe.” Me Jésus alingbi biani ti pardonné siokpari? Awafango ndia na aFarizien atene a yeke tongaso pepee. Ala bi be ti ala tongaso: “Ngbanga ti nyen lo sala tene tongaso? Lo zonga Nzapa. Zo wa alingbi mu pardon ti asiokpari, a yeke gi Nzapa oko pepee?”

Lo hinga bibe ti ala, tongaso Jésus atene na ala: “Ndani nyen, si ala yeke bi be ti ala na amara ti aye tongaso? Ye nyen a yeke ngangu pepee ti tene na wazin: ‘A pardonné siokpari ti mo awe’, wala ti tene: ‘Londo, mu gbogbo ti mo na mo tambela’?”

Na pekoni, Jésus azia lege na azo mingi so, nga awato ti lo, ti baa mbeni ye ti kpene so afa na gigi lo yeke na ngangu ti mu pardon na asiokpari na ndo sese na lo yeke biani koli so ahon tanga ti azo kue. Lo bi le ti lo na ndo wazin na lo tene na lo: “Londo, mu gbogbo ti mo, mo gue na ya da ti mo.” Na koli so asala tongaso fade fade. Lo sigigi na gbogbo ti lo na gbele azo kue! Tongaso be ti ala ado, ala gunda Nzapa na ala tene: “E baa ye so la oko pepee!”

Mo baa awe so Jésus azia mbeni kamba na popo ti asiokpari na kobela? Na pardon ti asiokpari abungbi oko na warango taa sava ti tele? Mbeti ti Nzapa afa so Adam, so ayeke kotara ti e kue, asala siokpari na e kue e wara aye so aga na lege ti siokpari so, a ye ti tene kobela na kui. Ni laa na gbe ti Royaume ti Nzapa, Jésus ayeke mu pardon ande ti asiokpari na ala kue so andoyee Nzapa na asala kusala ti Lo, na pekoni akobela kue ayeke hunzi. So ngia e yeke wara ande! Marc 2:1-12; Luc 5:17-26; Matthieu 9:1-8; aRomain 5:12, 17-19.

▪ Ndo so ye ti kpene so asi da ayeke so wa?

▪ Tongana nyen si wazin so asi na tele ti Jésus?

▪ Ngbanga ti nyen e kue e yeke awasiokpari? Tongana nyen si Jésus afa so e lingbi ti duti na beku so fade amu pardon na asiokpari ti e na e kiri e wara taa sava ti tele?