Chapitre 93

Tongana Molenge ti zo asi

JÉSUS ade na mbage ti banga ti kodoro ni (peut-être na kodoro ti Samarie wala Galilée) tongana aFarizien ahunda lo na ndo tene ti singo ti Royaume. Ala ma na be so fade Royaume asi na lege ti aye ti kota kpale mingi. Me Jésus atene: “Royaume ti Nzapa aga pepee na lege ti ye so zo alingbi baa. Na fade ala tene pepee: ‘Baa na ndo so!’ wala: ‘Baa na ndo ka!’ Teti baa, royaume ti Nzapa ayeke na popo ti i.”

Ambeni zo afa so tene ti Jésus so lo tene, “na popo ti i”, aye ti tene “na ya i”. Na ndo so, ambeni zo abi be ti ala so Jésus aye ti tene, Royaume ti Nzapa akomande na ya be ti awakua ti lo. Me, e baa so Royaume ti Nzapa ayeke pepee na ya be ti aFarizien so ake ti ma na be so Jésus asala tene na ala. Me, Royaume ni ayeke na popo ti ala na lege so Jésus Christ, zo so Nzapa ahiri lo ti ga Gbia ti Royaume ti lo, ayeke na popo ti ala na ngoi ni ka.

Peut-être a yeke na peko ti guengo ti aFarizien si Jésus angba ti sala lisoro na adisciple ti lo na ndo tene ti singo ti Royaume. Jésus abi be ti lo na ndo singo ti lo ande na ngangu ti Royaume tongana lo mu zendo so: “Fade ala tene na i: ‘Baa na ndo ka!’ wala: ‘Baa na ndo so!’ I londo pepee, i gue na peko ti ala pepee [aMessie ti wataka so]. Teti lege-oko tongana wa ti bekpa asu na mbage oko na gbe yayu na a su juska na mbeni mbage na gbe yayu, fade Molenge ti zo ayeke tongaso na la ti lo.” Jésus afa so lege-oko tongana wa ti bekpa asu amu ndo mingi, fade afa ti singo ti Jésus na ya ngangu ti Royaume ti lo amu ndo kue na azo so ayeke na nzala ti baa ni alingbi ti baa ni.

Na pekoni, Jésus afa kamba so ayeke na popo ti aye so asi giriri ti fa tambelango ti azo na la ti singo ti lo ande. Lo tene: “Lege-oko tongana azo asala na la ti Noé, fade azo asala tongaso na la ti Molenge ti zo nga (...). A yeke tongaso nga na la ti Lot; ala te, ala nyon, ala vo ye, ala ka ye, ala lu le kobe, na ala sala da; me na la ni so Lot asigigi na Sodome wa na soufre ti yayu ati afa ala kue. Fade a yeke tongaso na la ni so Molenge ti zo asi.”

Jésus aye ti tene pepee so afuti azo ti ngoi ti Noé na Lot gi teti so ala mu ngoi ti sala kusala ti la na la tongana ti te kobe, ti nyon, ti vo ye, ti ka ye, ti lu kobe, na ti sala da. Noé na Lot na sewa ti ala asala aye so nga. Kangbi so ayeke na popo ti ala ayeke so azo ti ngoi ti Noé na ti Lot azia tele ti ala kue gi na kusala ti ala ti la oko oko na ala bi be ti ala kete pepee na ye so Nzapa aye, na a yeke teti so si afuti ala. A yeke nga teti aye so si fade afuti azo tongana Christ asi na la ti kota ye ti vundu so ayeke ti ande na ndo aye ti fadeso.

Jésus asala tene so ti fa so a lingbi e sala hio tongana e baa afa ti la ti singo ti lo ande na ya ngangu ti Royaume ti lo. Lo tene: “Na la ni ka, zo so ayeke na ndo da, na ye ti lo ayeke na ya da, zia lo zu na sese ti lungula ye so pepee; zo so ayeke na yaka, zia lo kiri nga pepee. I dabe i na wali ti Lot.”

Tongana e baa afa ti singo ti Christ, a lingbi e zia nzala ti amosoro ti e akanga lege na e pepee ti sala ye hio. Biani, tongana lo londo ti zia kodoro ti Sodome, wali ti Lot agi le ti lo na vundu na be ti baa aye ti mosoro so lo zia na peko ti lo, na lo ga pilier ti ingo.

Tongana lo ngba ti fa na adisciple ti lo aye so alingbi si na la ni so lo yeke si ande, Jésus atene: “Mbi tene na i, na bi ka, fade azo use ayeke lango na ndo tange oko, a lungula zo oko, a zia mbeni. Fade awali use ayeke ne fuku na ndo oko; a lungula wali oko, a zia mbeni.”

Ti lungula mbeni zo ayeke lege-oko na lingo ti Noé na azo ti da ti lo na ya arche, wala na Lot na sewa ti lo so ange amu li ni na ala ti sigigi na ya ti Sodome. A ye ti tene ti so kua. Nde na so, ti zia zo, aye ti tene ti wara kua.

Na ndo so adisciple ahunda tene so: “Na ndo wa, Seigneur?”

Na Jésus akiri tene: “Ndo so kua ayeke, fade ngualo abungbi da nga.” Azo so “alungula ala” teti salut ayeke lege-oko tongana angualo so le ti ala abaa ndo yongoro mingi ngbanga ti so ala bungbi tele ti ala na ndo so “kua ni ayeke”. Kua ni ayeke taa Christ na la ti singo ti lo na ya ngangu ti Royaume na yayu nga na matanga ti kobe ti yingo so Jéhovah aleke ni. Luc 17:20-37; Genèse 19:26.

▪ Na lege wa Royaume ayeke na popo ti aFarizien giriri?

▪ Na lege ti nyen singo ti Christ ayeke lege-oko tongana wa ti bekpa?

▪ Ngbanga ti nyen fade afuti azo teti ye so ala sala na la ti singo ti Christ?

▪ Ti lungula wala ti zia mbeni zo aye ti tene nyen?