Chapitre 133

Jésus ahunzi ye kue so Nzapa ahunda na lo

NA LA NI so Gbia Jésus Christ so ayeke nga Walombe alungula ande Satan na sioni sese ti lo, fade a mu lege na azo ti duti na kota ngia biani! Na la ni ka Komandema ti Ngu Saki Oko ti siriri ti Jésus ayeke tondani!

Na gbe ti Jésus na agbia so akomande na tele ti lo, azo so aso kua na ya ti Harmaguédon ayeke zi aye so abuba na ya bira ti mbilimbili so. Ala so aso kua na ndo sese ayeke du amolenge teti mbeni ngoi, na amolenge so ayeke mu mbage ti ala nga na nzoni kusala ti leke sese na mbeni pendere parc wala yaka.

Na ngoi so alingbi Jésus ayeke sala si azo koto mingi so alango na du-kua asigigi si ala wara ngia na ya pendere Paradis so. Lo yeke sala tongaso ti tene zendo ti lo aga taa tene: “Ngoi ayeke ga so azo kue so ayeke na du-kua fade . . . ala sigigi.”

Na popo ti ala so fade Jésus ayeke kiri ala na fini ayeke ngbele zo ti sioni so akui na tele ti lo na ndo keke ti pasi. Mo dabe mo so Jésus aze na lo: “Biani mbi tene na mo laso: Fade mo yeke na mbi na ya Paradis.” Pepee, fade ague na koli so na yayu ti komande tongana gbia na tele ti Jésus pepee, wala fade Jésus akiri aga zo na aduti na ya Paradis na ndo sese na koli so pepee. Nde na so, fade Jésus ayeke na ngbele zo ti sioni na lege so fade Lo zingo lo na popo ti awakinda ti wara fini na ya Paradis na fade Lo bata si koli so awara ye kue so alingbi na lo, aye ti mitele na ti yingo, lege-oko tongana e baa na foto na lembeti ti peko.

Mo bi be ti mo da! Na gbe ti Jésus so fade abata azo kue na sese na lege ti ndoyee​—⁠azo so aso kua na ya ti Harmaguédon, amolenge ti ala, na azo mingi mingi so alondo na popo ti awakinda na so ama yanga ti lo⁠—​ayeke maï ti ga azo so ayeke mbilimbili kue. Jéhovah, na lege ti Molenge ti lo so ayeke nga gbia, Jésus Christ, ayeke duti na azo na lege ti yingo. Tongana yanga so alondo na yayu atene na Jean: “Na fade lo mbo ngule kue na le ti ala, na fade kui ayeke mbeni pepee. Fade vundu, wala toto, wala sana ayeke mbeni pepee.” Na ndo sese fade kobela wala pasi ayeke sala mbeni zo oko pepee.

Na la ni so Komandema ti Ngu Saki Oko ti Jésus ako ndani, sese na azo ayeke duti lege-oko tongana Nzapa aye ando giriri tongana lo tene na kozo koli na wali, Adam na Eve, ti wu na ti si singo na sese. Taa tene, sese ayeke si na azo so aye nzoni na ayeke mbilimbili kue. A yeke tongaso teti amu na azo kue anzoye so alondo na sadaka ti kota ngere ti Jésus. Azo ayeke kui ngbanga ti siokpari ti Adam mbeni pepee!

A yeke tongaso si Jésus ayeke sala ye kue so Jéhovah ahunda na lo. Ni laa, na ndani ti angu saki oko, fade lo mu na Baba ti lo Royaume na azo so aga mbilimbili kue awe. Na pekoni Nzapa ayeke zi Satan na ayingo sioni ti lo na bukulugbu ti bingo na ndo so ala ga tongana akua so asala ye oko pepee. Lo zi ala ngbanga ti nyen?

Tongana asi na nda ti angu saki oko, azo mingi mingi so aduti na ya Paradis ayeke azo so azingo ala na popo ti awakinda na atara mabe ti ala la oko pepee. Kozoni si ala kui, ala hinga azendo ti Nzapa pepee na tongaso ala lingbi ti fa na gigi mabe ti ala na azendo so pepee. Tongana akiri ala na fini na amanda na ala ataa tene so ayeke na ya Mbeti ti Nzapa, a yeke ngangu na ala pepee ti sala na Nzapa na ya Paradis, na ndo so awato ayeke pepee. Ye oko, tongana amu lege na Satan ti tara ti kanga lege na ala ti ngba ti sala na Nzapa, fade ala yeke duti be-taa-zo na ya ti tara? Ti leke tene so, fade azi Satan.

Suma so Jean abaa afa na gigi so na peko ti Komandema ti Ngu Saki Oko ti Jésus, Satan ayeke wara lege ti sala si ambeni zo azia ti sala na Nzapa, me afa wungo ti ala pepee. Na pekoni, tongana tara ti ndani ahunzi awe, fade afuti teti lakue lakue Satan, ayingo sioni ti lo, na azo kue so lo handa ala. Na mbeni mbage, azo so aso kua, ala so ayeke be-taa-zo na so atara ala biani awe, ayeke ngba na fini ti wara ngia na ya aye ti nzoni so fade Baba ti ala na yayu ayeke hiri na ndo ala teti lakue lakue.

Biani, Jésus asala kota kusala, na lo yeke ngba ti sala ni, ti tene ye so be ti Nzapa aye aga taa tene. E lingbi ti wara anzoye mingi na ngoi so ayeke ga ngbanga ti ye kue so lo sala tongana kota Gbia ti Nzapa na yayu. Ye oko, e lingbi pepee ti glisa ye kue so lo sala tongana lo yeke zo.

Jésus ayeda ti ga na sese na lo fa na e ye mingi na ndo Baba ti lo. Lo fa na e mbilimbili anzoni sengo ti Nzapa. Be ti e ado tongana e gbu li ti e na ndo lege so lo kiri na peko la oko pepee na lo duti taa koli, kota ndara ti lo, kode ti lo ti fango ye, lege so lo mu li ni na mbito oko pepee, na lo sala be-nzoni na lo baa mawa ti azo. Tongana e dabe e na lege so lo hu pono mingi tongana lo futa kota ngere ni, ye oko so amu lege na e ti wara fini, biani be ti e amu lo na nenee ni mingi!

Taa tene, tongana e manda ye na ndo fini ti Jésus e baa mbeni taa koli! E lingbi ti baa mbilimbili kota ni ti lo na a sala si be ti e ado. A pusu e ti tene lege-oko tongana mokonzi ti Rome, Ponce Pilate, atene la ni: “Baa! Zo ni laa!” Taa tene, biani, “Zo ni laa”, zo so ahon tanga ti azo kue!

Tongana e yeda na sadaka ti lo ti kota ngere, alingbi ti lungula na ndo ti e kungba ti siokpari na ti kui so e wara na lege ti Adam, na Jésus alingbi ti ga ‘Baba ti e ti lakue lakue’. Azo kue so ayeke wara fini ti lakue lakue a lingbi ala manda ti hinga gi Nzapa pepee me nga Molenge ti lo, Jésus Christ. Zia dikongo na mandango buku so amu maboko na mo ti wara hingango ye so amu fini! 1 Jean 2:17; 1:7; Jean 5:28, 29; 3:16; 17:3; 19:5; Luc 23:43; Genèse 1:28; 1 aCorinthien 15:24-28; Apocalypse 20:1-3, 6-10; 21:3, 4; Esaïe 9:6 [9:5 sango].

▪ Azo so aso kua na ya ti Harmaguédon nga na amolenge ti ala ayeke wara ngia ti sala nyen?

▪ Na tele ti azo so ayeke so kua na ya ti Harmaguédon na amolenge ti ala, fade azo wa ayeke duti na ngia na ya Paradis, na lege wa si fade Jésus ayeke duti na ala?

▪ Na ndani ti ngu saki oko fade sese na azo ayeke duti tongana nyen, na fade Jésus ayeke sala nyen na la ni ka?

▪ Fade azi Satan na bukulugbu ti bingo ngbanga ti nyen, na ndani fade ye nyen asi na lo na azo kue so amu peko ti lo?

▪ Na lege wa Jésus alingbi ti ga ‘Baba ti e ti lakue lakue’?