Siriri teti ngu saki oko nga teti lakue lakue!

“Si Nzapa aga aye kue teti zo oko oko kue.”—1 ACOR. 15:28.

KIRINGO TËNË TI MO AYEKE SO WA?

Tongana aprophétie so aga tâ tënë, a yeke sara nyen na ndo ti mo?

1. Anzoni ye wa “azo mingi mingi” ayeke wara ande?

TARA ti bâ na yâ ti li ti mo aye ti nzoni kue so azo alingbi ti wara na yâ ti ngu saki oko na gbe ti mbeni ngangu ngorogbia so gbia ni ayeke sara ye na lege ni nga ayeke bâ mawa ti azo. Anzoni ye ayeke ku “azo mingi mingi” so zo alingbi ti diko wungo ti ala ape. Ala yeke azo so ayeke sö ande kuâ na ngoi ti “kota ye ti vundu” so ayeke ga ti hunzi aye ti sioni dunia ti Satan.—Apoc. 7:9, 14.

2. Nyen la azo abâ na yâ ti angu 6000 so ahon?

² Na yâ ti angu 6 000 so azo agi ti komande tere ti ala wani, azo awara gi gbâ ti vundu na pasi. Bible atene ândö, a tene: “Zo akomande mbeni zo, na a sara sioni na lo.” (Zo-ti. 8:9). Nyen la e bâ laso nyen? Bira na kengo yanga. Aye tongana yere, kobela, bubango aye so angoro e, ngoi ti ngu-nzapa na buru aga kirikiri nga na ambeni ye tongaso. Angorogbia agboto mê ti e atene so tongana e sara akota changement ape nga e zia lege ti bubango sese ape, ye ni ayeke ga sioni mingi.

3. Ye wa Komandema ti Ngu Saki Oko ayeke ga ande na ni?

³ Na gbe ti komandema ti Jésus, Gbia Messie, nga na azo 144 000 so ayeke komande legeoko na lo, Royaume ti Nzapa ayeke zi ande yeke na yeke akpale kue so azo nga na sese awara. Na ngoi ti Komandema ti Ngu Saki Oko, pendere zendo ti Jéhovah Nzapa so ayeke ga tâ tënë: “Mbi créé ayayu ti fini na sese ti fini, na fade azo adabe ala na kozo ye pëpe, na ala bi bê ti ala dä mbeni pëpe.” (És. 65:17). Apendere ye wa so lê ayeke bâ pëpe e yeke wara ande? Aprophétie ti Bible alingbi ti mû maboko na e ti hinga apendere ye ni so atâa so “lê ayeke bâ pëpe”, wala ade ti si pëpe.—2 aCor. 4:18.

‘FADE AZO ASARA DA, NA ALA LU VIGNE NA YAKA’

4. Ada so azo mingi ayeke lango na yâ ni laso ayeke tongana nyen?

⁴ Zo kue aye ti wara da ti lo wani, mbeni ndo so lo na sewa ti lo alingbi ti duti dä nzoni nga na siriri. Me a yeke ngangu na yâ ti dunia ti laso ti tene zo awara mbeni nzoni da. Azo ayeke lango na yâ ti akota gbata so azo asi yâ ni. Azo mingi ayeke lango na yâ ti agbagbara da na yâ ti avaka so yâ ni asi. Na lê ti ala, tënë ti warango da ti ala wani akpa tënë ti bango li.

5, 6. (a) Ésaïe 65:21 nga na Michée 4:4 ayeke ga ande tâ tënë tongana nyen? (b) A lingbi e sara nyen ti wara aye ti nzoni so?

⁵ Na gbe ti Royaume ti Nzapa, zo oko oko ayeke wara da ti lo wani. Prophète Ésaïe atene: “Fade azo asara da, na ala duti na yâ ni; fade ala lu vigne na yaka, na ala te lê ni.” (És. 65:21). Ala yeke ku ti wara da nga na ambeni ye mingi. Laso, ambeni zo ayeke na da ti li ti ala, ambeni ayeke même na kota da. Me ala yeke gi bê ti ala so peut-être kpale ti nginza alingbi ti sara si a mû da ni na tïtî ala wala azo ti nzi aga anzi ye. Me na gbe ti Royaume ti Nzapa mara ti aye tongaso ayeke duti ande dä ape. Prophète Michée atene: “Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbeto na ala ayeke pëpe.”—Mi. 4:4.

⁶ A lingbi e sara nyen tongana e ye ti duti na fini na gbe ti Royaume ti Nzapa? Ti tâ tënë ni, e oko oko kue e ye ti wara nzoni da ti lango. Me a lingbi e tï pëpe na yâ ti sarango gbâ ti bon laso ti wara na da so bê ti e aye. A yeke na lege ti ndara ti tene e duti na fini na mbeni lege so afa so e zia bê ti e na ndo ti zendo ti Jéhovah. Jésus asara tënë ti lo wani, a tene: “Anyama ti mungo kondo ayeke na adû ti ala, na andeke ti nduzu ayeke na ando ti wu tere ti ala dä. Me Molenge ti zo ayeke na mbeni ndo ti zia li ti lo dä pëpe.” (Luc 9:58). Jésus alingbi lani ti leke wala ti vo mbeni pendere da tongana ti ambeni zo. Me ngbanga ti nyen lo sara ni ape? Jésus aye lani pëpe ti bi tere ti lo na yâ ti mbeni ye so alingbi ti kanga lege na lo ti zia Royaume na kozo ndo na yâ ti fini ti lo. E lingbi ti mû tapande ti lo na ziango pëpe si aye ti mitele so ayeke sara si e gi bê ti e ahon ndo ni aga aye so ayeke kota ye mingi na yâ ti fini ti e.—Mat. 6:33, 34.

SIRIRI AYEKE DUTI ANDE NA POPO TI AZO NA ANYAMA

7. Yanga wa Jéhovah amû so andu songo ti azo na anyama?

⁷ Na ngoi so Nzapa ato nda ti sara lani aye na ndo ti sese, zo la lo sara lo na ndangba ni. Lo tene na Wakode ti lo, Jésus, ndani so lo sara azo, lo tene: “Zia E sara zo na image ti E, tongana image ti E mveni; zia ala komande asusu ti kota ngu ti ingo, andeke ti nduzu, na anyama, ala komande na ndo sese kue, na anyama kue so ahara na ndo sese.” (Gen. 1:26). Nzapa amû yanga na Adam na Ève nga na azo kue so ayeke bâ gigi na pekoni ti komande na ndo ti anyama.

8. Sarango ye ti anyama laso ayeke tongana nyen?

⁸ Azo alingbi tâ biani ti komande na ndo ti anyama kue nga ti duti na siriri na ala? Azo mingi aye mingi tënë ti anyama ti ala so ala yeke bata ala, anyama tongana ambo nga na anyau. Me ka ti anyama ti ngonda ayeke tongana nyen? Azo ti senda-ye so aduti nduru mingi na anyama na amanda ye na ndo ti ala atene so anyama kue so ayeke mû mê na amolenge ti ala alingbi ti duti na ngia wala vundu. E hinga so mbeto wala ngonzo ayeke sara anyama tongana a sara sioni na ala, me ala lingbi ti ye zo? Azo ti senda-ye atene so na ngoi so anyama ayeke mû mê na amolenge ti ala, ala yeke na kota ndoye mingi.

9. Changement wa e lingbi ti ku ti bâ na mbage ti anyama?

⁹ Tongaso, a lingbi bê ti e adö pëpe so Bible atene so siriri ayeke duti ande na popo ti azo na anyama. (Diko Ésaïe 11:6-9; 65:25.) Ndali ti nyen? Girisa ape so na ngoi so Noé na sewa ti lo asigigi lani na yâ ti arche na peko ti kota ngu so apika, Jéhovah atene na ala: “Fade mbeto ti i, même kota mbeto ti i, agbu anyama kue ti sese.” Fadeso anyama mingi ayeke kpe azo ti tene ala bata tere ti ala (Gen. 9:2, 3). Me Jéhovah alingbi ti zi mbeni mbeto ni tongaso si songo ti azo na anyama aduti ande tâ gi tongana ti so lo tene lani na tongo nda ni (Os. 2:20). So tâ pendere ye si ayeke ku azo kue so ayeke duti ande na fini na ndo ti sese!

“FADE LO YEKE MBÔ NGU TI LÊ KUE”

10. Ngbanga ti nyen azo ayeke toto ka?

¹⁰ Tongana Salomon abâ “ye ti ngangu kue so zo asara na azo na gbe ti lâ”, lo dema, lo tene: “Bâ ngule ti ala so azo asara ngangu na ala, na zo ti lungula vundu ti ala ayeke pëpe.” (Zo-ti. 4:1). Aye ayeke nga laso tongaso, même ayeke sioni mingi. Zo wa la na popo ti e ade mbeni ye asara si lo toto ape, zo wa? Tâ tënë, na ambeni ngoi ngu ti lê ti e asigigi ndali ti so tere ti e anzere. Me mingi ni, e toto ndali ti so vundu ahon ndo ti e.

11. Mbaï wa na yâ ti Bible andu bê ti mo mingi?

¹¹ Gbu li na ndo ti gbâ ti ambaï so e diko na yâ ti Bible na ndo ti azo so atoto. Na ngoi so Sara akui tongana lo yeke na ngu 127, “Abraham aga ti toto kuâ ti Sara, na ti toto na vundu teti lo.” (Gen. 23:1, 2). Na ngoi so Naomi atene na akogara ti lo ala gue nzoni, “ala yä yanga ti ala, ala toto” na pekoni ala kiri “ala yä yanga ti ala, ala toto mbeni”. (Ruth 1:9, 14). Na ngoi so tere ti Gbia Ézéchias ason ngangu na lo bâ lo tene lo yeke kui, lo sambela Nzapa na lo ‘toto na ngule.’ Jéhovah abâ ngu ti lê ti lo na lo sava lo (2 aGbia 20:1-5). E kue ye so asi na bazengele Pierre na ngoi so lo tene so lo hinga Jésus ape andu bê ti e mingi. Na ngoi so Pierre amä kondo atoto, lo “sigigi, lo toto ngangu mingi.”—Mat. 26:75.

12. Na lege wa Royaume ti Nzapa ayeke ga ande na tâ dengo bê na azo?

¹² Ndali ti so aye ti vundu mingi asi na azo, ala yeke na bezoin ti tene a dë bê ti ala. Na ngoi ti Komandema ti Ngu Saki Oko ti Christ, Nzapa ‘ayeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.’ (Apoc. 21:4). A nzere mingi ti bâ so vundu na pasi ayeke duti ande dä mbeni pëpe. A nzere nga mingi so Nzapa amû même zendo ti zi kuâ. Ye so ayeke ga ande tâ tënë tongana nyen?

“ALA KUE SO AYEKE NA YÂ TI ASENDE TI KUÂ . . . ALA YEKE SIGIGI”

13. Na lege wa kuâ asara pasi na azo ngbene ye na ngoi so Adam asara siokpari?

¹³ Ngbene ye na ngoi so Adam asara siokpari, kuâ akomande tongana gbia na ndo ti azo. Lo yeke mbeni wato so zo oko alingbi ti hon lo na ngangu ape. Mbeni zo so siokpari ayeke na tere ti lo alingbi ti kpe ni ape, nga a ga na vundu mingi (aRom. 5:12, 14). “Ndali ti mbeto ti kuâ,” azo kutu mingi aga ‘angbâa na yâ ti gigi ti ala kue.’—aHéb. 2:15.

14. Nyen la ayeke si tongana kuâ ayeke dä mbeni pëpe?

¹⁴ Bible asara tënë ti ngoi so ande ‘a yeke futi kuâ so ayeke ndangba wato ni biaku biaku.’ (1 aCor. 15:26). Ye ti pekoni ayeke duti ande use. “Azo mingi mingi” so ayeke sara na Jéhovah na so ayeke na fini laso ayeke wara ande lege ti sö kuâ ti lï na yâ ti fini dunia. Na pekoni lege ayeke zi na ala ti wara fini ti lakue lakue. Azo ngbundangbu so akui alingbi nga ande ti kiri na fini. Tara ti bâ ngia nga na nzerengo tere ti azo kue na ngoi so “azo mingi mingi” ayeke yamba azo so azingo na kuâ! Tongana e gbu li nzoni na ndo ti ambaï ti Bible so asara tënë ti azo so a zingo ala na kuâ, e yeke hinga tongana nyen la ye ni ayeke duti ande na ngoi so a yeke zingo azo na kuâ.—Diko Marc 5:38-42; Luc 7:11-17.

15. Sarango ye ti mo ayeke duti ande tongana nyen na ngoi so a yeke zingo azo so mo ye ala mingi na kuâ?

¹⁵ Gbu li na ndo ti atënë tongana “li ti ala akpe kue si tere ti ala anzere ngangu mingi” nga “ala to nda ti mû gloire na Nzapa”. Tongana mo yeke lani dä na ngoi so a zingo azo ni so, peut-être mo nga kue mo yeke sara ye tongaso. Biani, tere ti e ayeke nzere ande mingi ti bâ azo ti e so e ye ala mingi so a zingo ala na kuâ. Jésus atene: “Ngbonga ni ayeke ga so ala kue so ayeke na yâ ti asende ti kuâ ayeke mä ande go ti lo na ala yeke sigigi.” (Jean 5:28, 29). Zo oko na popo ti e ade abâ mara ti ye tongaso ape; a yeke duti ande biani oko ti akota ‘ye so lê ayeke bâ pëpe’.

NZAPA AYEKE GA “AYE KUE TETI ZO OKO OKO KUE”

16. (a) Ngbanga ti nyen a lingbi tere ti e anzere nzerengo ti sara tënë ti aye ti nzoni so lê ade abâ pëpe? (b) Tënë ti nyen la Paul atene ti wa aChrétien ti Corinthe?

¹⁶ Azo so angbâ be-ta-zo na Jéhovah na yâ ti angoi ti ngangu so ayeke wara ande aye ti nzoni mingi! Atâa so ade e wara pëpe aye ti nzoni so ayeke ga ande, a lingbi e gbu li na ndo ni. Gbungo li na ndo ni ayeke mû maboko na e ti zia lê ti e gi na ndo ti aye so ayeke biani akota ye na e yeke ngbâ ti sara na Jéhovah na aye ti dunia so a yeke gboto lê ti e pëpe (Luc 21:34; 1 Tim. 6:17-19). Na ngoi ti vorongo Nzapa na yâ ti sewa, na yâ ti alisoro ti e na amba ti e aChrétien nga na azo so e yeke manda Bible na ala wala azo so asara nzara ti tâ tënë, zia tere ti e anzere nzerengo ti sara tënë na ndo ti pendere ye so e yeke wara ande. Ye so ayeke sara si beku ti e angbâ lakue tâ ye na lê ti e. A yeke ye so bazengele Paul awa lani amba ti lo aChrétien ti sara. Atënë ti lo amû maboko na ala ti gbu li na ndo ti aye so ayeke si ande na hunzingo ti Komandema ti Ngu Saki Oko ti Christ. Gi ti gbu nda ti atënë ti Paul so ayeke na 1 aCorinthien 15:24, 25, 28. (Diko ni.)

17, 18. (a) Na lege wa Jéhovah ayeke lani “aye kue teti zo oko oko kue” na tongo nda ti mbaï ti azo? (b) Na lege ti ye wa Jésus ayeke sara ande si siriri na beoko akiri?

¹⁷ Paul atene: “Nzapa aga aye kue teti zo oko oko kue.” Atënë so afa pendere mingi tongana nyen gigi ayeke duti ande na hunzingo ti Komandema ti Ngu Saki Oko ti Christ. Paul aye ti tene nyen la? Gbu li na ndo ti ngoi so lani na yaka ti Éden Adam na Ève ayeke mbeni mbage ti sewa ti Jéhovah so ayeke na siriri. Jéhovah, Kota Gbia ti Dunia Kue, la ayeke komande lani droit na ndo ti a-ange nga na azo. Ala lingbi lani ti sara lisoro na lo, ti voro lo, nga ti wara tënë nzoni ti lo. Lo yeke lani “aye kue teti zo oko oko kue.”

¹⁸ Yâ ti pendere songo so afâ na ngoi so Satan apusu azo ti ke komandema ti Jéhovah. Ye oko, ngbene ye na ngu 1914 Royaume ti Messie ato nda ni awe ti sara si yeke na yeke siriri nga na beoko so akiri (aÉph. 1:9, 10). Na ngoi ti Komandema ti Ngu Saki Oko, apendere ye so laso “lê ayeke bâ pëpe” ayeke ga ande tâ ye. Na pekoni “nda ni” ayeke ga, so ti tene Komandema ti Ngu Saki Oko ti Christ ayeke hunzi. Nyen la ayeke si na pekoni? Atâa so a mû na Jésus “komandema kue na yayu nga na sese”, lo ye pëpe ti mû place ti Jéhovah. Lo yeke sara tere ti lo kete na lo yeke “mû ande royaume ni na Lo so ayeke Nzapa nga Babâ ti lo.” Lo yeke sara kusala ande na kota ndo nga na komandema so lo yeke na ni “ndali ti gloire ti Nzapa”.—Mat. 28:18; aPhil. 2:9-11.

19, 20. (a) Tongana nyen azo kue so ayeke duti ande na gbe ti Royaume ayeke fa so ala yeda na komandema ti Jéhovah? (b) Apendere ye wa e yeke wara ande?

¹⁹ Na pekoni, azo kue so ayeke na fini na ndo ti sese na gbe ti komandema ti Royaume ni ayeke ga azo so alingbi kue. Ala yeke mû ande tapande ti Jésus nga ala yeke sara tere ti ala kete ti yeda so Jéhovah la ayeke na droit ti komande na ndo ti ala. Ala yeke hon ande na yâ ti tara ti nda ni tongana ala fa so ala ye si Jéhovah la akomande na ndo ti ala (Apoc. 20:7-10). Na pekoni, a yeke futi biaku biaku azo ti kengo yanga kue atâa a-ange wala azo. A yeke duti ande tâ mbeni pendere ngoi mingi! Sewa ti dunia kue ayeke duti ande na ngia ti sepela Jéhovah, lo so ayeke ga “aye kue teti zo oko oko kue.”—Diko Psaume 99:1-3.

²⁰ Apendere ye so, so Royaume aga nduru awe ti ga na ni so, apusu mo ti zia lê ti mo gi na ndo ti ye so bê ti Jéhovah aye nga ti sara kue ti sara ye so bê ti lo aye? Mo yeke sara kue si beku ti wataka nga na aye ti dunia ti Satan ahanda mo ape? Mo yeke sara kue ti tene desizion so mo mû ti mû mbage ti komandema ti Jéhovah achangé ape? Zia si aye so mo yeke sara afa so mo ye ti sara tongaso teti lakue lakue. Na pekoni mo yeke wara ande pasa ti duti na siriri nga ti wara aye ti nzoni teti ngu saki oko nga teti lakue lakue!

[Foto na lembeti 11]

Tongana Jésus ahunzi awe kusala so a mû na lo ti sara tongana Gbia, lo yeke sara tere ti lo kete ti mû Royaume ni na Babâ ti lo