POINT 4

Nzoni kode ti yôro aversê na yâ ti lisoro

Matthieu 22:41-45

NA NDURU TËNË: Leke bibe ti azo so ayeke mä mo kozo si mo diko mbeni versê.

Gi ti hinga ngbanga ti nyen la mo yeke diko versê ni so. Kozo si mo diko mbeni versê, gboto lê ti azo ni na ndö ti kota tënë so mo ye ti fa na yâ ti versê ni.

Bâ atënë so angoro versê ni. Tongana mo fa mbeni versê si mo ye ti fa iri ti zo so tënë ni asigi na yanga ti lo wala iri ti zo so asû mbeti ni, bâ si ye so mo fa ayeke na lege ni.
Sara si azo abâ so Bible la ayeke na gunda ti fango ye ti mo. Na ngoi so mo yeke fa ye na azo so amä na bê na Nzapa, gboto lê ti ala na ndö ti Bible so ayeke Mbeti ti Nzapa, ti fa so Bible ayeke mbeti so tâ ndara ayeke na yâ ni.
Zia nzara ti dikongo Bible na yâ ti azo. Hunda mbeni tënë so kiringo tënë ni ayeke na yâ ti Bible, fa mbeni kpale so Bible la afa lege ti lekengo ni, wala fa mbeni mama-ndia so mbeni tënë ti yâ ti Bible la ayeke aidé ala ti mä yâ ni.

Gbu li na ndö ti ye so azo so ayeke mä mo ahinga kozo awe na ndö ti tënë ti mo ni nga na ndö ti versê ni. Atâa a yeke mbeni versê so azo ahinga ni mingi, kozo si mo fa ni tene mbeni tënë so agboto lê ti azo so ayeke mä mo na ndö ni nga aidé ala ti kiri ti gbu li ti ala dä.