Ga nduru na Nzapa

Lo gi ti bâ gi aye so ayeke nzoni na mbage ti azo

1 AGBIA 14:13

“L’ÉTERNEL atara bê kue, na Lo hinga bibe kue.” (1 Chronique 28:9). A lingbi atënë so yingo ti Nzapa la apusu azo ti sû ni so apusu e ti kiri singila na Jéhovah ndali ti so lo yeke bi bê ti lo mingi na e. Jéhovah agi ti bâ gi aye ti nzoni so ayeke na yâ ti bê ti e atâa so e yeke azo so alingbi kue pëpe. A bâ ni polele na yâ ti tënë so lo tene na ndo ti Abija na 1 aGbia 14:13.

Abija ayeke lani na yâ ti mbeni sewa so ayeke sioni. Na yâ ti molongo ti azo so alë gbia na so aga a-apostat, babâ ti lo Jéroboam la ayeke kozo zo ni.a Jéhovah aleke ti futi azo ti da ti Jéroboam “legeoko tongana zo abalêe puru.” (1 aGbia 14:10). Me Jéhovah amû yanga ti tene gi mbeni zo oko ti da ti Jéroboam, Abija so tere ti lo ason ngangu, si ayeke lu lo na mbeni lege so ayeke nzoni.b Ngbanga ti nyen? Nzapa afa raison ni, lo tene: “Na popo ti azo ti da ti Jéroboam, a wara ye ti nzoni gi na yâ lo oko na gbele L’Éternel Nzapa ti Israël.” (1 aGbia 14:1, 12, 13). Atënë so afa nyen na e na ndo ti Abija?

Bible atene pëpe so Abija ayeke lani mbeni zo so avoro Nzapa na bê ti lo kue. Me kamême mbeni ye ti nzoni ayeke na yâ ti lo. Lo yeke na nzoni sarango ye na “gbele L’Éternel”. Peut-être a ndu tënë ti vorongo Jéhovah. Awasungo mbeti so ayeke aJuif atene so Abija ague lani ti voro Nzapa na temple na Jérusalem wala lo zi azo so babâ ti lo azia ala ti kanga lege na azo ti Israël ti tene ala gue na Jérusalem pëpe.

Atâa so e hinga pëpe tâ ye ti nzoni wa lo sara, nzoni ye so ayeke na yâ ti Abija ayeke tâ nde mingi. Kozoni kue, ye ti nzoni so ayeke ti handango lê ti zo pëpe na alondo na yâ ti bê ti lo. Use ni, a yeke lani mbeni ye so apika bê. Abija afa na gigi ye ti nzoni so ayeke na yâ ti bê ti lo atâa so lo yeke “na popo ti azo ti da ti Jéroboam”. Mbeni wandara atene: “Azo so angbâ ti sara ye ti nzoni atâa ala yeke na yâ ti asewa so ayeke sioni wala na ando so ayeke sioni, ala lingbi biani na gonda.” Mbeni wandara ni nde atene so nzoni ti Abija ayeke lani “polele na lê ti azo . . . , tâ gi tongana ti so na bï a yeke bâ zango ti atongoro nga tongana ti so a yeke bâ pendere ti keke ti cèdre na ngoi so kugbe ti ambeni keke so angoro ni atuku kue.”

Kota ye so ahon tanga ni kue ayeke so atënë so ayeke na 1 aGbia 14:13 afa na e mbeni pendere ye na ndo ti Jéhovah nga na ndo ti ye so lo yeke gi na mbage ti e. Girisa pëpe so a “wara” ye ti nzoni na “yâ” ti Abija. Ye ni ayeke mo bâ mo tene Jéhovah agi lani yâ ti bê ti Abija juska lo wara mbeni ye ti nzoni. Tongana ti so mbeni wandara atene, tongana a haka Abija na azo ti sewa ti lo, lo yeke gi oko perle “na yâ ti gbâ ti akete tênë so ayeke na yanga ti ngu.” Jéhovah abâ na nene ni ye ti nzoni so na lo futa ni na sarango nzoni bê na Abija so ayeke na yâ ti sewa so ayeke sioni.

Ti bâ so Jéhovah ayeke gi gi aye ti nzoni so ayeke na yâ ti e nga lo yeke bâ ni na nene ni atâa so e yeke awasiokpari, a dë bê ti e pëpe? (Psaume 130:3). A yeke nzoni e zia si ye so apusu e ti ga nduru mingi na Jéhovah, Nzapa so ayeke gi ye ti nzoni so ayeke na yâ ti bê ti e, atâa a yeke gi kete.

[Akete tënë na gbe ni]