E ye Babâ ti e Jéhovah mingi

1-2. Ngbanga ti nyen la Jéhovah asara si e lingbi ti ga na yâ ti sewa ti lo? Lo sara ni lani tongana nyen?

JÉHOVAH atisa e ti ga na yâ ti sewa ti awakua ti lo. A yeke tâ pendere tisango ndo mingi! Na yâ ti sewa so, a yeke wara azo so amû terê ti ala na Nzapa awe nga amä na bê na sandaga ti Molenge ti lo so lo mû tongana ye so a futa ti zi azo. E yeke mbeni sewa so ayeke na ngia. E yeke sara nzoni ye na fini ti e laso nga e yeke na ngia ndali ti so e yeke na beku ti duti na fini lakue lakue, na yayu wala na yâ ti Paradis na sese.

² Jéhovah asara si e lingbi ti ga na yâ ti sewa ti lo ndali ti so lo ye e mingi. Me ti sara ni, a lingbi Jéhovah asara mbeni kota sacrifice (Jean 3:16). “A vo [e] na mbeni ngere awe.” (1 aCor. 6:20). Na lege ti ye so a futa ti zi azo, Jéhovah asara si e lingbi ti duti na kpengba songo na lo. E yeke na kota pasa ti iri Lo so lo yeke kota mingi ahon azo kue na yâ ti dunia Babâ. Nga tongana ti so e bâ na yâ ti article so ahon, Jéhovah ayeke Babâ so ayeke tâ nzoni mingi.

3. Ahundango ndo wa la e lingbi ti hunda? (Bâ nga encadré “Eskê Jéhovah azia lê ti lo na ndö ti mbi?”)

³ Legeoko tongana ti mbeni zo ti sungo Bible, e lingbi ti hunda, e tene: “Nyen la mbi yeke mû na Jéhovah ndali ti anzoni ye kue so lo sara ndali ti mbi?” (Ps. 116:12). Kiringo tënë ni ayeke so e lingbi lâ oko ape ti mû mbeni ye na Babâ ti e ti yayu so alingbi na anzoni ye so lo sara ndali ti e. Me so lo ye e apusu e ti ye lo nga. Bazengele Jean atene: “E yeke na ndoye, ngbanga ti so lo ndoye e kozoni.” (1 Jean 4:19). Na alege wa la e lingbi ti fa na Babâ ti e ti yayu so e ye lo?

NGBÂ NDURU NA JÉHOVAH

4. Ti gue oko na Jacques 4:8, ngbanga ti nyen la a yeke nzoni e sara ngangu ti ga nduru na Jéhovah?

⁴ Jéhovah aye ti tene e ga nduru na lo nga e sara lisoro na lo. (Diko Jacques 4:8.) Lo wa e ti “ngbâ lakue ti sambela” nga lo yeke mä e lakue (aRom. 12:12). Atâa so lo yeke na aye mingi ti sara akanga lege lâ oko ape na lo ti mä e nga so lo fatigué ape lo yeke mä e lakue. Na ndö ni, e yeke mä lo na ngoi so e diko Bible nga na ambeti so amû maboko na e ti mä yâ ti Bible. E yeke mä nga lo na ngoi so e dengi mê nzoni na bungbi. Gï tongana ti so nzoni lisoro ayeke mû maboko na amolenge ti ngbâ nduru na ababâ na amama ti ala, tongana e sara lisoro lakue na Jéhovah ayeke mû maboko na e ti ngbâ nduru na lo.

5. Nyen la e lingbi ti sara ti tene asambela ti e anzere na Jéhovah mingi?

⁵ Gbu li na ndö ti atënë ti alisoro so mo yeke sara na Nzapa ti bâ wala ayeke tongana nyen. Jéhovah aye ti tene e zi bê ti e kue na lo na yâ ti sambela (Ps. 62:8). A yeke nzoni e hunda terê ti e: ‘Eskê atënë ti yâ ti asambela ti mbi ayeke mo bâ mo tene a sû atënë ni kozo awe na mbi kiri gï na ndö ni sân ti gbu li ti mbi? Wala a yeke tongana alettre so mbi sû atënë ti bê ti mbi na yâ ni?’ Kite ayeke dä ape so mo ye Jéhovah mingi nga mo ye ti tene songo ti mo na lo angbâ ti kpengba. Ti sara ni, a lingbi mo sara lisoro na lo lakue. Fa na lo atënë ti bê ti mo. Fa na lo aye so asara si mo yeke na ngia nga na aye so amû vundu na mo. Hinga so mo lingbi ti hunda lo ti mû maboko na mo.

6. Nyen la a lingbi e sara ti ngbâ nduru na Babâ ti e ti yayu?

⁶ Ti ngbâ nduru na Babâ ti e ti yayu, a lingbi e kiri singila na lo lakue. E yeda na tënë ti zo ti sungo psaume so atene: “Jéhovah, Nzapa ti mbi, aye so mo sara ayeke mingi, akusala ti mo so adö bê nga na abibe ti mo na mbage ti e ayeke mingi. Zo oko ti lingbi na mo ayeke dä pëpe; tongana mbi gi ti sara tënë ti akusala ti mo nga ti fa peko ni, mbi peut ti diko ni kue pëpe, ndali ti so a yeke mingi mingi.” (Ps. 40:5). E yeke kiri gï singila na yâ ti bê ti e ape; me e yeke fa ni na Jéhovah na lege ti atënë ti e nga na aye so e sara. Ye so afa so e yeke nde na azo mingi laso. E yeke na yâ ti dunia so mingi ti azo akiri singila na Nzapa ape ndali ti aye kue so lo sara ndali ti ala. Biani, Bible atene so na “lâ ti nda ni” azo ayeke kiri singila ape (2 Tim. 3:1, 2). Zia e duti na bango ndo ti ala so lâ oko ape.

7. Nyen la Jéhovah aye ti tene e sara? Ngbanga ti nyen la lo ye tongaso?

⁷ Ababâ na amama aye pëpe ti tene amolenge ti ala atiri na popo ti ala me ala ye ti tene ala duti akamarade. Legeoko nga, Jéhovah aye ti tene amolenge ti lo kue aduti akamarade. Ndoye so e yeke na ni na popo ti e afa so e yeke atâ Chrétien (Jean 13:35). Tënë ti bê ti e ague oko na ti zo ti sungo psaume so atene: “Ala bâ tongana nyen a yeke nzoni mingi nga a nzere mingi ti tene aita aduti ndo oko na yâ ti beoko!” (Ps. 133:1). Tongana e ye aita ti e, e yeke fa na Jéhovah so e ye lo (1 Jean 4:20). A nzere na e mingi ti duti na yâ ti sewa ti aita so ayeke “sara nzoni na mba [nga ayeke] bâ mawa ti zo mingi”.​—aÉph. 4:32.

FA SO MO YE NZAPA NA MANGO YANGA TI LO

8. Ti gue oko na 1 Jean 5:3, kozo raison so e mä yanga ti Jéhovah ayeke so wa?

⁸ Jéhovah aye ti tene amolenge amä yanga ti ababâ na amama ti ala, lo ye nga ti tene e mä yanga ti lo (aÉph. 6:1). Lo lingbi ti tene e mä yanga ti lo ndali ti so Lo la lo sara e, lo bata e na fini nga lo yeke na ndara mingi ahon ababâ kue. Ye oko, kozo raison so e mä yanga ti Jéhovah ndali ni ayeke so e ye lo. (Diko 1 Jean 5:3.) Atâa so e yeke na araison mingi so ayeke nzoni e mä yanga ti Jéhovah, lo forcé e ape ti sara ni. Jéhovah amû na e liberté ti soro ye, tongaso a yeke nzere na lo mingi tongana e soro ti mä yanga ti lo ndali ti so e ye lo.

9-10. Ngbanga ti nyen la a yeke kota ye ti hinga aye so Nzapa afa na e nga ti sara ye alingbi na ni?

⁹ Ababâ na amama aye ti tene sioni asi na amolenge ti ala ape. A yeke ndali ni la ala yeke lu andia ndali ti nzoni ti amolenge ti ala. Tongana amolenge ni asara ye alingbi na ni, ala yeke fa so ala yeke na confiance na ababâ na amama ti ala nga ala ne ala. Tongaso, a yeke kota ye mingi ti hinga aye so Babâ ti e ti yayu afa na e nga ti sara ye alingbi na ni. Tongana e sara tongaso, e yeke fa na Jéhovah so e ye lo nga e ne lo; na ndö ni e yeke bâ nzoni na pekoni (És. 48:17, 18). Me azo so ake Jéhovah nga na aye so lo fa na e ayeke sara sioni na terê ti ala wani.​—aGal. 6:7, 8.

¹⁰ Tongana fason so e yeke vivre na ni anzere na Jéhovah, a yeke bata e yongoro na aye so alingbi ti sara sioni na e, na aye so alingbi ti sara si e gi bê ti e ahon ndö ni wala na aye so alingbi ti buba songo ti e na lo. Jéhovah ahinga ye so ayeke nzoni mingi ndali ti e. Aurora, so ayeke na États-Unis, atene: “Mbi hinga so tongana e mä yanga ti Jéhovah, gigi ti e ayeke duti tâ nzoni mingi.” E kue so e mä yanga ti Jéhovah e hinga ni tongaso. So mo sara ye alingbi na afango lege so Jéhovah afa na e na ndoye, tongana nyen la mo bâ nzoni dä?

11. Nyen la sambela ayeke mû maboko na e ti sara?

¹¹ Sambela ayeke mû maboko na e ti mä yanga, même na ngoi so a yeke ngangu ti sara ni. Na ambeni ngoi, a yeke ngangu na e ti mä yanga ti Jéhovah ndali ti so e yeke mbilimbili-kue ape, me e doit lakue ti sara ngangu ti ke yanga ti lo ape. Mbeni zo ti sungo psaume avoro yanga na Nzapa, atene: “Zia na yâ ti mbi nzara ti duti nduru ti mä yanga ti mo.” (Ps. 51:12). Denise, so ayeke pionnier permanent, atene: “Tongana mbi bâ so a yeke ngangu na mbi ti sara ye alingbi na mbeni commandement ti Jéhovah, mbi yeke sambela ti wara ngangu ti sara ye so ayeke na lege ni.” E yeke na kite ape so Jéhovah ayeke kiri tënë lakue na asambela tongaso.​—Luc 11:9-13.

MÛ MABOKO NA AZO TI YE BABÂ TI E

12. Ti gue oko na aÉphésien 5:1, nyen la e doit ti sara?

¹² Diko aÉphésien 5:1. So e yeke ‘amolenge so Jéhovah andoye e mingi,’ e yeke sara kue ti sara ye tongana lo. E yeke mû tapande ti lo tongana e ye amba ti e, e sara nzoni bê na ala nga e pardonné ala. Tongana azo so ahinga Nzapa ape abâ nzoni sarango ye ti e, peut-être a yeke pusu ala ti manda ye mingi na ndö ti lo (1 Pi. 2:12). Ababâ na amama so ayeke aChrétien ayeke na nzoni raison ti sara ye na amolenge ti ala tongana ti so Jéhovah asara ye na e. Tongana ala sara tongaso, peut-être amolenge ti ala ayeke duti na nzara ti lë songo ti kamarade na Babâ ti e so aye e mingi.

13. Nyen la e bezoin ti sara ti tomba mbeto ti e?

¹³ Mingi ni akete molenge ayeke sara baba ti ababâ ti ala nga a nzere na ala ti sara tënë na ndö ti ababâ ti ala. Legeoko nga, e yeke sara baba ti Babâ ti e ti yayu, Jéhovah, nga e ye ti tene azo ahinga lo. E kue atënë ti bê ti e ague oko na ti Gbia David, so atene: “Mbi yeke pika kate ti mbi na ndö ti Jéhovah.” (Ps. 34:2). Me ka tongana e yeke zo ti kamene? Tongana nyen la e lingbi ti tomba mbeto ti e? E yeke tomba mbeto ti e tongana e pensé na ndö ti kota ngia so Jéhovah ayeke wara tongana e sara tënë ti lo nga na ndö ti gbâ ti anzoni ye so azo ayeke wara tongana ala manda ye na ndö ti lo. Jéhovah ayeke mû na e courage so e bezoin ni. Lo mû lani maboko na aita ti e akozo Chrétien ti tomba mbeto ti ala, lo yeke mû nga maboko na e.​—1 aThes. 2:2.

14. Ndali ti ambeni raison wa la a yeke kota ye ti sara kua ti sarango adisciple?

¹⁴ Jéhovah ayeke sara kangbi na popo ti azo ape nga lo yeke na ngia tongana lo bâ so e ye amba ti e, atâa ala londo na ndo wa (Kus. 10:34, 35). Mbeni lege so e lingbi ti fa so e ye azo ayeke ti fa nzoni tënë na ala (Mat. 28:19, 20). Kua so alingbi ti ga na anzoni ye wa? Azo so amä e alingbi ti sara si gigi ti ala aga nzoni ahon ti kozo laso nga ala lingbi ti duti na beku ti wara fini ti lakue lakue na yâ ti Paradis.​—1 Tim. 4:16.

YE BABÂ TI E NA MO YEKE DUTI NA NGIA

15-16. Araison wa la e yeke na ni ti duti na ngia?

¹⁵ Jéhovah ayeke Babâ so aye amolenge ti lo, tongaso lo ye ti tene sewa ti lo aduti na ngia (És. 65:14). E yeke na araison mingi ti duti na ngia laso, atâa so e lingbi ti wara akpale. Na tapande, e hinga biani so Babâ ti e ti yayu aye e mingi. E yeke na nzoni hingango ye ti Bible (Jér. 15:16). E yeke nga na yâ ti mbeni sewa so mara ni ayeke dä ape so azo ni aye Jéhovah, aye andia ti lo nga aye terê.​—Ps. 106:4, 5.

¹⁶ E lingbi ti duti na ngia lakue ndali ti so e hinga so na yâ ti ngoi so ayeke ga gigi ayeke duti ande tâ nzoni mingi. E hinga so fafadeso Jéhovah ayeke zi azo ti sioni kue nga lo yeke sara kua na Royaume ti lo ti sara si sese kue aga ande mbeni paradis. E yeke nga na pendere beku so a yeke zingo ande azo so akui nga e na ala e yeke kiri ti wara terê (Jean 5:28, 29). A yeke duti ande tâ pendere mingi! Nga ye so ayeke kota mingi ayeke so e yeke na kite ape so azo kue na yayu nga na sese ayeke gonda ande Babâ ti e so aye e mingi, ala yeke sepela lo nga ala yeke voro lo ndali ti so lo lingbi na ni.