HUNDA TI AMASEKA
Tongana nyen la mbi peut ti luti na lê ti tara?
Bazengele Paul asû lani na mbeti atene: “Tongana mbi ye ti sara ye so ayeke mbilimbili, ye so ayeke sioni la si ayeke na yâ ti mbi.” (aRomain 7:21). A si na mo awe ti pensé nga tongaso? Tongana a si na mo awe, article so ayeke aidé mo ti luti na lê ti atara so ayeke gue na mo ti sara ye ti sioni.
Ye so a lingbi mo hinga
Mingi ni, amba ti mo la apeut ti pusu mo ti sara ye ti sioni. A yeke ndali ni la Bible atene so “ti sara songo na asioni zo ayeke buba anzoni sarango ye ti zo.” (1 aCorinthien 15:33). Aye so amba ti mo ayeke sara wala aye so mo sara ti passé na temps apeut ti pusu mo ti sara ye ti sioni wala apeut même ti gue na mo ti mû “peko ti azo mingi mingi ti sara ye ti sioni.”—Exode 23:2.
“Nzara so mo yeke na ni ti tene azo aye mo nga ala ye aye so mo sara apeut ti gue na mo ti sara ye kue so amba ti mo asara, gï ti tene mo nzere na lê ti ala.”—Jeremy, mbeni maseka-koli ti ngu 17.
Gbu li na ndö ti tënë so: Ngbanga ti nyen la a peut ti duti ngangu mingi na mo ti kpe ti sara ye ti sioni, tongana lakue mo yeke gi bê ti mo mingi na ndö ti ye so amba ti mo apensé na ndö ti mo?—aProverbe 29:25.
Bata tënë so: Zia lâ oko ape si aye so amba ti mo asara apusu mo ti sara mbeni ye so mo wani mo hinga so ayeke sioni.
Ye so mo peut ti sara
Duti sûr na aye so na lê ti mo mo hinga so ayeke vrai. Tongana mo hinga pëpe aye so mo croire na ni biani, mo peut ti ga tongana mbeni poupée na maboko ti amba ti mo. A yeke nzoni mingi ti sara ye alingbi na wango ti Bible so: “Ala gi ti bâ wala aye kue ayeke tâ tënë; ala gbu ngangu ye so ayeke nzoni mingi.” (1 aThessalonicien 5:21). Tongana mo hinga aye so mo croire na ni biani, a yeke duti ande facile na mo ti sara ye ague oko na ni, nga ti luti na lê ti atara so aye ti pusu mo ti sara ye nde na ni.
Gbu li na ndö ti tënë so: Ngbanga ti nyen la mo mä na bê so andia ti Nzapa ayeke ndali ti nzoni ti mo?
“Mbi bâ so tongana mbi duti be-ta-zo na aye so mbi mä na bê na ni biani nga mbi zia si asioni nzara ti bê ti mbi ahon ndö ti mbi ape, amba ti mbi ayeke ne mbi mingi.”—Kimberly, mbeni maseka-wali ti ngu 21.
Gbu li na ndö ti tapande ti zo so: Daniel. Na temps so lo de lani maseka, lo ‘mû desizion na yâ ti bê ti lo’ ti sara ye alingbi na andia ti Nzapa.—Daniel 1:8.
Tongana mo hinga pëpe aye so mo croire na ni biani, mo peut ti ga tongana mbeni poupée na maboko ti amba ti mo
Hinga ando so mo woko dä. Bible asara tënë ti “anzara ti bê so ayeke gbu ka amaseka.” Anzara ti bê ni so ayeke ngangu mingi tongana zo ade maseka (2 Timothée 2:22). Na popo ti anzara ti bê ni so a yeke wara nzara ti bungbingo koli na wali, nzara ti tene amba ti mo aye mo nga na nzara ti tene mo vivre nga mo mû adesizion sân babâ na mama ti mo.
Gbu li na ndö ti tënë so: Bible atene so “zo oko oko ayeke wara tara tongana nzara ti bê ti lo agboto lo na ahanda lo.” (Jacques 1:14). Nzara ti bê ti mo wa la ayeke ngangu ka na mo mingi ti hon ndö ni?
“Hinga biani sioni nzara ti bê wa la a yeke ka ngangu na mo ti hon ndö ni. Sara recherche ti hinga tongana nyen la mo peut ti hon ndö ti nzara ti bê ni so. Tongana mo wara mbeni wango, sû ni na mbeti ti fa tongana nyen la mo yeke sara ande kua na ni. Tongana mo sara tongaso, ti peko tongana sioni nzara ti bê ni agbu mo, mo yeke hinga ande tongana nyen ti hon ndö ni.”—Sylvia, mbeni maseka-wali ti ngu 19.
Gbu li na ndö ti tapande ti zo so: David. A si ka lani so azo wala anzara ti bê ti lo apusu lo ti sara ye so ayeke na lege ni ape. Me David amanda ye na ndö ni na lo sara effort lo changé. Lo sambela lani Jéhovah lo tene: “Sara si mbi wara mbeni bê so avuru, nga mbeni fini bibe so ayeke sara si mbi luti ngangu.”—Psaume 51:10.
Mû nzoni desizion. Bible atene: “Zia si sioni ahon mo na ngangu pëpe.” (aRomain 12:21). Ye so aye ti fa so tongana mo ye si mo peut ti tï na yâ ti tara. Mo peut ti soro ti sara ye ti nzoni.
Gbu li na ndö ti tënë so: Nyen la mo peut ti sara ti mû nzoni desizion tongana nzara ti sarango mbeni ye ti sioni asara mo?
“Mbi yeke gbu ka li ti mbi ti bâ tongana nyen la mbi yeke sentir ande terê ti mbi tongana mbi sara ye ni so ayeke na lege ni ape so. Eskê mbi yeke sentir ande terê ti mbi bien? Peut-être na début ni, mbi yeke sentir terê ti mbi bien. Me ka tongana temps ahon? Ên-ën, a yeke sara ande mbi nzoni ape. Donc, eskê a yeke bien ti sara ye ni so? Ên-ën!”—Sophia, mbeni maseka wali ti ngu 20.
Gbu li na ndö ti tapande ti zo so: Paul. Atâa so lo hinga so lo yeke na ambeni wokongo, lo mû nzoni desizion. Lo tene: “Mbi punir terê ti mbi na mbi sara lo tongana ngbâa.”—1 aCorinthien 9:27, kete tënë na gbe ni.
Bata tënë so: Tongana bê ti mo apusu mo ti sara mbeni ye so ayeke na lege ni ape, a yeke mo la mo yeke décidé wala mo yeke hon ndö ni wala pëpe.
Grisa ape, asioni nzara ti bê ayeke mbeni ye so ayeke hon hongo. Melissa, mbeni maseka-wali ti ngu 20 atene: “Mingi ti asioni ye so lani na temps so mbi de na lycée si nzara ti sarango ni agbu mbi mingi so, fadeso nzara ni ayeke dä encore ape. Tongana mbi pensé na ni, bê ti mbi adë ndali ti so asioni ye so nzara ti sarango ni asara mbi laso, kekereke nzara ni ayeke sara mbi encore ape, na mbeni lâ tongana mbi pensé na ni terê ti mbi ayeke nzere so mbi sara ye ni so ape so.”