Sara ye na mbeto ape tongana Zadoc

1-2. Zadoc ayeke lani zo wa? (1 Chronique 12:​22, 26-28).

IMAGINÉ gbâ ti akoli so wungo ti ala ahon 340000. Ala bungbi ti zia David gbia na ndö ti azo ti Israël kue. Teti lango ota, a yeke mä go ti azo so ayeke sara lisoro, go ti azo so ayeke he bia na ngia nga go ti azo so ayeke he ngia na li ti akete hoto so ayeke nduru na Hébron (1 Chron. 12:39). Na popo ti gbâ ti azo so, mbeni maseka-koli ayeke dä so iri ti lo Zadoc. Azo mingi ahinga lo ape. Me Jéhovah asara kue ti tene e hinga so Zadoc ayeke lani dä. (Diko 1 Chronique 12:​22, 26-28.) Zadoc ayeke lani zo wa?

² Zadoc ayeke lani mbeni prêtre so asara kua na terê ti Kota prêtre Abiathar. Zadoc ayeke nga lani zo ti bango ye so apeut ti hinga ye so bê ti Nzapa aye nga so ndara ti lo apika bê mingi (2 Sam. 15:27). Azo ayeke hunda lani Zadoc ti mû na ala nzoni wango na ngoi so ala bezoin mungo maboko. Lo yeke nga lani zo so asara ye na mbeto ape. Na yâ ti article so, e yeke bâ tongana nyen la Zadoc asara ye na mbeto ape.

3. (a) Ngbanga ti nyen la awakua ti Jéhovah abezoin ti sara ye na mbeto ape? (b) Nyen la e yeke bâ na yâ ti article so?

³ Na lâ ti nda ni so, Satan ayeke sara ngangu mingi ahon ti kozo ti woko mabe so e yeke na ni na Jéhovah (1 Pi. 5:8). E bezoin ti sara ye na mbeto ape na ngoi so e yeke ku ti tene Jéhovah afuti Satan nga na sioni dunia ti lo (Ps. 31:24). Zia e bâ aye ota so e peut ti sara ti mû tapande ti Zadoc so asara ye na mbeto ape.

MÛ MABOKO NA ROYAUME TI NZAPA

4. Ngbanga ti nyen la awakua ti Jéhovah abezoin ti sara ye na mbeto ape si ala mû maboko na Royaume ti Nzapa? (Bâ nga foto.)

⁴ So e yeke awakua ti Jéhovah, e yeke mû maboko na Royaume ti Nzapa na bê ti e kue, me fani mingi e bezoin ti sara ye na mbeto ape si e sara ni (Mat. 6:33). Na tapande, na yâ ti sioni dunia so, e bezoin ti sara ye na mbeto ape si e sara ye alingbi na aye so Jéhovah ahunda na e ti sara nga ti fa nzoni tënë ti Royaume (1 aThes. 2:2). Fani mingi, e bezoin nga ti sara ye na mbeto ape si e yôro terê ti e pëpe na yâ ti aye ti poroso ti dunia so tënë ti kangbi ayeke mingi dä so (Jean 18:36). Awakua ti Jéhovah mingi ayeke wara kpale ti nginza, a pika ala wala a kanga ala ndali ti so ala ke ti yôro terê ti ala na yâ ti aye ti poroso wala ala ke ti sara kua ti turugu.

5. Ngbanga ti nyen la Zadoc abezoin lani ti sara ye na mbeto ape si lo mû maboko na David?

⁵ Zadoc ague lani na Hébron gï ti sara matanga ti ziango David gbia ape. Lo mû lani aye ti bira ti lo nga lo yeke nduru ti tiri bira (1 Chron. 12:38). Lo yeda lani na bê ti lo wani ti mû peko ti David na yâ ti bira nga ti tiri na awato ti azo ti Israël. Peut-être ade Zadoc amû mbage na yâ ti abira mingi ape. Me maseka-koli so asara ye lani na mbeto oko ape.

6. Tongana nyen la David azia lani na Zadoc nzoni tapande ti sarango ye na mbeto ape? (Psaume 138:3).

⁶ Prêtre Zadoc amanda ti sara ye na mbeto ape na ndo wa? Lo yeke lani na terê ti akoli so ayeke ngangu nga so asara ye na mbeto ape. Kite ayeke dä ape so lo manda ye lani na lege ti tapande ti ala. Na tapande, so David asara ye lani na mbeto ape na ngoi so lo ‘mû li ni na ngoi so azo ti Israël ayeke gue ti sara bira’ apusu azo ti Israël kue ti mû maboko na lo na bê ti ala kue. (1 Chron. 11:​1, 2). David azia lani bê ti lo lakue na Jéhovah ti aidé lo na ngoi so lo yeke tiri na awato ti lo (Ps. 28:7; diko Psaume 138:3.) Zadoc amanda nga ye lani na lege ti tapande ti akoli ti ngoi ti lo so asara ye na mbeto ape, na tapande Jéhoïada na molenge ti lo Bénaïah so ayeke lani ngangu zo ti bira nga na akoli 22, so ayeke amokonzi ti ahale ti akotara ti ala, so amû lani maboko na David (1 Chron. 11:​22-25; 12:​26-28). Akoli so kue aleke lani na bê ti ala ti zia David gbia ti ala nga ti bata lo.

7. (a) Laso, ambeni ita asara ye na mbeto ape; nyen la e peut ti manda na lege ti tapande ti ala? (b) Nyen la mo manda na lege ti tapande ti Ita Nsilu, so a sara tënë ti lo na yâ ti vidéo so?

⁷ E yeke wara ngangu nga e yeke sara ye na mbeto ape tongana e gbu li na ndö ti tapande ti azo so sân mbeto amû mbage ti komandema ti Jéhovah. Gbia ti e Christ Jésus ake lani na kuru go ti yôro terê ti lo na yâ ti aye ti poroso ti dunia ti Satan (Mat. 4:​8-11; Jean 6:​14, 15). Lo zia bê ti lo lakue na Jéhovah ti wara ngangu. Laso, e yeke nga na gbâ ti atapande ti amaseka-koli so ake ti sara kua ti turugu wala so ake ti yôro terê ti ala na yâ ti aye ti poroso. Peut-être mo peut ti diko ye na ndö ti aye so asi na ala na ndö ti jw.org.a

MÛ MABOKO NA AITA TI MO

8. Na ngoi wa la peut-être a-ancien abezoin ti sara ye na mbeto ape si ala aidé aita ti ala?

⁸ Awakua ti Jéhovah aye mingi ti aidé amba ti ala (2 aCor. 8:4). Me na ambeni ngoi, ala bezoin ti sara ye na mbeto ape si ala sara ni. Na tapande, tongana bira atï na mbeni ndo, a-ancien ti ndo ni ayeke bâ so aita ti ala abezoin ti tene a kpengba ala, a mû maboko na ala nga peut-être a aidé ala ti wara Bible nga na ambeti ti e wala aye so ala bezoin ni na lege ti mitele. So a-ancien andoye aita ti ala, ala yeke zia fini ti ala na lê ti kpale ti mû na ala aye so ala bezoin ni (Jean 15:​12, 13). Na sarango tongaso, ala mû tapande ti Zadoc so asara ye na mbeto ape.

9. Tongana ti so a fa na 2 Samuel 15:​27-29, nyen la David atene na Zadoc ti sara? (Bâ nga foto.)

⁹ Fini ti David ayeke lani na yâ ti kpale. Molenge ti lo Absalom aleke lani na bê ti lo ti mû mbata ti gbia na maboko ti lo (2 Sam. 15:​12, 13). David adoit lani ti quitté Jérusalem hio. Lo iri awakua ti lo, lo tene na ala: “Ala londo e kpe! Tongaso pëpe, zo oko ayeke sö kuâ na maboko ti Absalom pëpe.” (2 Sam. 15:14). Na ngoi so awakua ti David ayeke hon, lo bâ so mbeni zo adoit ti ngbâ tongaso si lo fa na lo asango na ndö ti ye so Absalom aleke ti sara. Tongaso, lo tokua Zadoc nga na ambeni prêtre na yâ ti gbata ni ti bembe ndo. (Diko 2 Samuel 15:​27-29.) Ala doit lani ti sara ye na hange mingi. Ye so David atene na aprêtre so ti sara apeut ti sara si ala wara même kuâ. Absalom ayeke mbeni zo so ayeke sara ye na zo na ngangu nga lo yeke zo ti kion, lo kä babâ ti lo wani. Imaginé ye so lo yeke sara na Zadoc nga na tanga ti aprêtre ni tongana lo hinga so ala yeke bembe ndo na ndö ti lo ti bata David.

10. Zadoc nga na azo so ayeke na terê ti lo abata lani David tongana nyen?

¹⁰ David ahunda na Zadoc nga na Hushaï, mbeni kamarade ti lo so ayeke be-ta-zo, ti aidé lo na yâ ti mbeni ye so lo leke (2 Sam. 15:​32-37). Hushaï asara ye alingbi na ye so David afa, lo sara si Absalom asara confiance na lo nga lo hunda na aturugu ti lo ti sara mbeni ye so ayeke mû lege na David ti leke terê ti lo ti ga ti sara bira na ala. Na pekoni, Hushaï afa na Zadoc nga na Abiathar ye so Absalom aleke ti sara (2 Sam. 17:​8-16). Akoli use so awara lege ti tokua ndo na David (2 Sam. 17:17). Grâce na mungo maboko ti Jéhovah, ye so Zadoc na amba ti lo asara abata fini ti David.—2 Sam. 17:​21, 22.

11. Tongana nyen la e peut ti mû tapande ti Zadoc so asara ye na mbeto ape na ngoi so e yeke aidé aita ti e?

¹¹ Tongana a hunda na e ti aidé aita ti e na angoi ti kpale, tongana nyen la e peut ti sara ye na mbeto ape tongana Zadoc? (1) Sara ye alingbi na aye so a fa. Na angoi tongaso, a yeke kota ye ti tene e ngbâ beoko. Sara ye alingbi na fango lege so alondo na filiale ti ndo so mo yeke dä (aHéb. 13:17). A yeke nzoni lakue a-ancien akiri abâ aye so a fa na ndö ti lekengo terê ndali ti akota kpale nga aye so a doit ti sara tongana mbeni kota kpale asi (1 aCor. 14:​33, 40). (2) Sara ye na mbeto ape me sara hange (aProv. 22:3). Sara ye na ndara. Zia fini ti mo na lê ti kpale senge senge ape. (3) Zia bê ti mo na Jéhovah. Girisa ape so Jéhovah aye si mo na aita ti mo aduti nzoni. Lo peut ti aidé mo ti mû maboko na aita ti mo sân ti tene kpale asi.

12-13. Nyen la mo manda na lege ti aye so asi na Viktor nga na Vitalii? (Bâ nga foto.)

¹² Gbu li na ndö ti ye so asi na Viktor nga na Vitalii, aita-koli use so ayeke gue lani na kobe nga na ngu na amba ti ala aChrétien na Ukraine. Viktor atene: “E gi lani kobe na ndo kue. Fani mingi, e mä go ti ngombe nduru na e. Mbeni ita-koli amû lani na e akobe so lo bata. Ye so lo mû so asara si gbâ ti awafango tënë awara ye so ala bezoin ni ti ngbâ na fini teti mbeni ngoi. Na ngoi so e yeke zia akobe ni na yâ ti oto, mbeni nene lê ti ngombe atï mètre 20 tongaso na terê ti e. Na yâ ti lango ni kue, mbi voro yanga na Jéhovah ti aidé mbi ti sara ye na mbeto ape ti ngbâ ti aidé aita.”

¹³ Vitalii atene: “E bezoin lani ti sara ye na mbeto oko ape. Kozo voyage ti mbi asara ngbonga 12. Na ngoi ti voyage ni kue, mbi sambela Jéhovah.” Vitalii asara ye lani na mbeto ape, me lo sara nga ye na hange. Lo kiri lo tene: “Mbi ngbâ ti hunda Jéhovah ti mû na mbi ndara nga ti aidé mbi ti bâ terê ti mbi kete. Mbi mû gï alege so akota zo ti kodro ayeda ti tene azo amû. So mbi bâ so aita asara kua maboko na maboko akpengba mabe ti mbi. Ala zi aye so ayeke na ndö ti lege, ala bungbi kobe, bongo nga na ambeni ye so aita abezoin ni, ala zia ni na yâ ti oto nga ala mû na mbi na Viktor ndo ti lango.”

NGBÂ BE-TA-ZO NA JÉHOVAH

14. Tongana mbeni zo so e ye lo ayeke be-ta-zo na Jéhovah encore ape apeut ti sara e tongana nyen?

¹⁴ Mbeni kota kpale so e peut ti wara ayeke na ngoi so mbeni zo ti sewa ti e wala mbeni kota kamarade ti e azia Jéhovah (Ps. 78:40; aProv. 24:10). Tongana e ye zo ni mingi, a peut ti duti ngangu mingi na e ti yeda na ye so asi. Tongana mara ti ye ti vundu tongaso asi na mo, tapande ti Zadoc so lo yeke be-ta-zo apeut ti kpengba mo.

15. Ngbanga ti nyen la Zadoc abezoin lani ti sara ye na mbeto ape si lo ngbâ be-ta-zo na Jéhovah? (1 aGbia 1:​5-8).

¹⁵ Zadoc angbâ lani be-ta-zo na Jéhovah na ngoi so kota kamarade ti lo Abiathar angbâ be-ta-zo ape. Ye so asi lani na hunzingo ti komandema ti David. Na ngoi so David aga mbakoro na lo yeke gue ti kui, molenge ti lo Adonijah agi ti ga gbia atâa so Jéhovah aye lani ti tene Salomon la aga gbia (1 Chron. 22:​9, 10). Abiathar asoro lani ti mû maboko na Adonijah. (Diko 1 aGbia 1:​5-8.) So Abiathar asara tongaso, lo duti be-ta-zo ape na David nga na Jéhovah. Imaginé tongana nyen la ye so asara lani Zadoc vundu mingi. Lo na Abiathar asara lani kua maboko na maboko tongana aprêtre ahon ngu 40 (2 Sam. 8:17). Ala yeke bâ lani lege ti “Sanduku ti tâ Nzapa”. (2 Sam. 15:29). Ala use kue amû lani maboko na David so ayeke gbia ti ala nga ala sara aye mingi na yâ ti kua ti Jéhovah.—2 Sam. 19:​11-14.

16. Nyen la peut-être a-aidé lani Zadoc ti ngbâ be-ta-zo?

¹⁶ Zadoc angbâ lani be-ta-zo na Jéhovah atâa ye so Abiathar asara. David ahinga lani so lo peut ti zia bê ti lo lakue na Zadoc. Na ngoi so nda ti Adonijah asigi, David asoro Zadoc, Nathan nga na Bénaïah ti zia Salomon gbia (1 aGbia 1:​32-34). Tapande ti ambeni wakua ti Jéhovah, tongana Nathan so ayeke lani be-ta-zo na Jéhovah nga na ambeni zo so amû maboko na Gbia David, adoit lani ti kpengba Zadoc mingi (1 aGbia 1:​38, 39). Na ngoi so Salomon aga gbia, lo “zia prêtre Zadoc na place ti Abiathar.”—1 aGbia 2:35.

17. Tongana nyen la mo peut ti mû tapande ti Zadoc tongana mbeni fami wala kamarade ti mo azia Jéhovah?

¹⁷ Mo peut ti mû tapande ti Zadoc tongana nyen? Tongana mbeni fami wala kamarade ti mo asoro ti zia Jéhovah, fa na Jéhovah so mo soro ti ngbâ be-ta-zo na lo (Jos. 24:15). Jéhovah ayeke mû na mo ngangu nga na courage so mo bezoin ni. Sambela Jéhovah nga ngbâ nduru na akamarade ti mo so ayeke be-ta-zo na lo. So mo yeke be-ta-zo na Jéhovah, lo bâ ni na nene ni mingi nga lo yeke futa ande mo ndali ni.—2 Sam. 22:26.

18. Nyen la mo manda na lege ti ye so asi na Marco na Sidse?

¹⁸ Gbu li na ndö ti ye so asi na Marco na wali ti lo Sidse, so amolenge ti ala ti wali use so akono awe azia tâ tënë. Marco atene: “Ti londo na lango so mo dü amolenge ti mo, mo ye ala mingi. Mo yeke sara ye kue ti bata ala si mbeni sioni ye asi na ala ape. Tongaso, na ngoi so ala soro ti zia Jéhovah, a yeke zia vundu mingi na bê ti mo.” Lo kiri lo tene: “Me Jéhovah ayeke lani na terê ti e. Lo sara kue ti tene na ngoi so vundu ahon ndö ti mbi, wali ti mbi akpengba mbi nga na ngoi so vundu ahon ndö ti lo, mbi kpengba lo.” Sidse atene: “Tongana fade Jéhovah amû na e ngangu so e bezoin ni ape, e peut ti gbu ngangu ape. Vundu asara lani mbi mingi nga mbi bâ so, so amolenge ti e ti wali azia ti sara na Jéhovah, faute ni ayeke ti mbi. Tongaso, mbi fa na Jéhovah vundu so asara mbi. Ngoi kete na pekoni, mbeni ita-wali, so a sara angu mingi mbi bâ lo ape, aga na terê ti mbi. Lo zia maboko ti lo na ndö ti go ti mbi, lo bâ yâ ti lê ti mbi na lo tene: ‘Sidse, girisa ape so faute ni ayeke ti mo ape.’ Grâce na mungo maboko ti Jéhovah, mbi wara lege ti ngbâ ti sara na lo na ngia.”

19. Nyen la mo leke na bê ti mo ti ngbâ ti sara?

¹⁹ Jéhovah aye ti tene awakua ti lo kue asara ye na mbeto ape tongana Zadoc (2 Tim. 1:7). Me lo ye ti tene e zia bê ti e na ngangu ti e wani ape. Lo ye ti tene e zia bê ti e na lo. Tongaso, tongana mo wara mbeni kpale so ahunda ti tene mo sara ye na mbeto ape, bâ ndo na mbage ti Jéhovah. Mo peut ti duti sûr so lo yeke sara si mo sara ye na mbeto ape tongana Zadoc.—1 Pi. 5:10.