BIBLIOTHÈQUE NA NDÖ TI INTERNET Watchtower
Watchtower
BIBLIOTHÈQUE NA NDÖ TI INTERNET
Sango
  • BIBLE
  • AMBETI
  • ABUNGBI
  • w03 1/9 l. 19-22
  • Sepela Jéhovah “na popo ti bungbi ti azo”

Vidéo ayeke na yâ ti mbage ni so ape.

Pardon, mbeni kpale asi na ngoi ti zingo vidéo ni.

  • Sepela Jéhovah “na popo ti bungbi ti azo”
  • Tour ti Ba Ndo Afa Tene ti Royaume ti Jéhovah: 2003
  • Akete li ti tënë ni
  • Ambeni mbeti nde na ndö ti oko tënë ni
  • Fa atënë ti bê ti mo na gbele azo
  • Awango ti leke yâ ni nzoni
  • Kungba ti aita so ayeke mû li ni na yâ abungbi
  • Kiringo tënë ayeke mbeni matabisi
  • E wa terê na popo ti e na ngoi ti abungbi ti congrégation
    Tour ti Ba Ndo Afa Tene ti Royaume ti Jéhovah (Ti mandango ni): 2023
  • Sepela Jéhovah na yâ ti congrégation
    Tour ti Ba Ndo Afa Tene ti Royaume ti Jéhovah (Ti mandango ni): 2019
  • Lege ti mû anzoni commentaire
    Mbeti ti bungbi: Kusala ti e nga na gigi ti e ti Chrétien: 2016
  • Sara si abungbi ti congrégation akpengba zo
    Tour ti Ba Ndo Afa Tene ti Royaume ti Jéhovah: 2010
Bâ ambeni ye ni
Tour ti Ba Ndo Afa Tene ti Royaume ti Jéhovah: 2003
w03 1/9 l. 19-22

Sepela Jéhovah “na popo ti bungbi ti azo”

ABUNGBI ti aChrétien ayeke mbeni lekengo ye ti Jéhovah ti sala si azo ti lo akpengba na lege ti yingo. Na gango lakue na abungbi, e yeke fa na gigi so e bâ na nene ni aye so Jéhovah aleke. Na ndo ni, e lingbi ti “wa [aita] si ala ndoye azo, na ala sala kusala nzoni”, ye so ayeke mbeni kpengba lege ti fa na gigi ndoye teti amba ti e (aHébreu 10:24; Jean 13:35). Ye oko, tongana nyen e lingbi ti wa aita ti e na ngoi ti abungbi?

Fa atënë ti bê ti mo na gbele azo

Gbia David asû ândö mbeti na ndo lo mveni: “Fade mbi fa iri ti Mo na aita ti mbi; na mbi sepela Mo na popo ti bungbi ti azo. Sepelango ti mbi na yâ kota bungbi ti azo alondo na Mo.” “Fade mbi mû merci na Mo na yâ kota bungbi ti azo, fade mbi sepela Mo na popo ti azo mingi.” “Mbi fa tënë nzoni ti mbilimbili na yâ kota bungbi ti azo; bâ, mbi kanga yanga ti mbi pëpe.”​—Psaume 22:23, 26; 35:18; 40:10.

Na ngoi ti bazengele Paul, tongana aChrétien aga lani ti bungbi oko ti voro Nzapa, ala yeke fa nga na gigi atënë ti mabe ti ala na ndo Jéhovah nga na ndo gloire ti lo. Na lege so, ala yeke wa amba ti ala na ayeke pusu ala na ndoye nga na anzo kusala. Na ngoi ti e, asiècle mingi na peko ti David na Paul, e “bâ so lâ [ti Jéhovah] aga ndulu” biani (aHébreu 10:24, 25). Aye ti sese ti Satan ayeke gue na futingo ni, na akpale angbâ lakue ti gue na li ni. A hon tanga ti angoi kue, a lingbi laso e “duti na bê so azia pëpe”. (aHébreu 10:36). Tongana aita ti e ayeke dä pëpe, zo wa alingbi ti wa e ti gbu ngangu?

Laso, legeoko tongana ti kozo siècle, a yeke mû lege na awamabe oko oko ti fa tënë ti mabe ti ala “na popo ti bungbi ti azo.” Mbeni lege so azi na azo kue ayeke ti kiri tënë na ngoi ti alisoro ti abungbi ti kongregation. A lingbi e bâ tongana senge ye pëpe ye ti nzoni so akiringo tënë na ngoi ti abungbi alingbi ti sala. Na tapande, acommentaire so afa tongana nyen ti hon ndo ti akpale wala ti kpe ni ayeke kpengba lekengo na bê ti aita ti e ti mû peko ti akpengba-ndia ti Bible. Akiringo tënë so azi nda ti aversê so afa tënë ti yâ ni pëpe, wala so ayôro atënë so zo ni awara na ngoi ti gingo nda ti aye ti lo mveni, alingbi ti wa ambeni ti maï nzoni mingi kode ti mandango ye ti ala.

Tongana e kiri tënë na ngoi ti abungbi, e na ambeni zo e yeke wara ye ti nzoni ande. A yeke nzoni tënë so apusu aTémoin ti Jéhovah kue ti hon ndo ti kamene. A yeke mbilimbili kota ye mingi ti tene a-ancien na aserviteur ti mungo maboko akiri tënë na ngoi ti abungbi, teti so a ku na mbage ti ala ti mû li ni na kiringo na atënë nga na gango lakue na abungbi. Ye oko, tongana nyen mbeni zo alingbi ti leke tele ti lo nzoni tongana lo bâ so a yeke ngangu na lo ti kiri atënë na abungbi?

Awango ti leke yâ ni nzoni

Dabe mo so ye ni andu nga Jéhovah. Mbeni ita-wali so alango na kodoro ti Zamani afa tongana nyen lo yeke bâ akiringo tënë ti lo: “Ala yeke kiringo tënë ti mbi mveni na angangu so Satan asala ti kanga lege na awakua ti Nzapa ti sala tënë ti mabe ti ala.” Mbeni ita-koli so amû batême fini fini, so ayeke na yâ oko kongregation ni atene: “Mbi yeke sambela mingi na ndo kiringo tënë na abungbi.”

Leke tele nzoni. Tongana mo leke kozoni pëpe aye so e yeke manda ni, fade mo yeke bâ so a yeke ngangu na mo ti kiri tënë, nga akiringo tënë ti mo ayeke sala ande ngangu pëpe na ndo ti azo. A lingbi ti wara, na yâ buku Wara nzoni na lege ti Ekole ti Kusala ti aChrétien, na lembeti 70, awango na ndo kiringo tënë na ngoi ti abungbi ti kongregation.a

Zia na gbele mo ti kiri tënë kamême oko na ngoi ti abungbi. Ye so aye ti tene ti leke akiringo tënë mingi, na tongaso, fani mingi so mo yôro tïtî mo, pasa ayeke dä ti tene ita so amû li ni alingbi ande ti mû mo. Mo lingbi même ti tene kozoni na ita ni ahundango tënë wa mo leke tele ti mo ti kiri tënë na ni. Ye so alingbi ti mû maboko na mo tongana mo yeke fini zo. Teti so mo lingbi peut-être ti duti na kamene ti yôro maboko ti mo na nduzu ti kiri tënë “na yâ kota bungbi ti azo”, hingango so a yeke paragraphe so mo leke tele ti mo nzoni ti kiri tënë na ni, nga so ita so amû li ni ayeke bâ ande tïtî mo, ayeke mû maboko na mo ti kiri tënë.

Kiri tënë hio. Ti pusu lango ti salango mbeni ngangu kua na peko alingbi pëpe ti sala si kua ni ayapu. Ti kiri tënë na kozo mbage ti bungbi alingbi ti mû maboko. Fade bê ti mo ayeke dö ti bâ tongana nyen a yeke ngangu pëpe ti kiri ti sala tënë fani use wala fani ota, na peko ti so mo hon ndo ti kpale ti kiringo na kozo tënë.

Soro mbeni ndo ti duti so alingbi. Azo mingi abâ so ala yeke wara lege hio ti kiri tënë tongana ala duti na akozo banc na yâ Da ti Royaume. Ye alingbi gboto lê ti ala mingi pëpe, nga zo so amû li ni alingbi peut-être ti bâ maboko ti ala. Tongana mo tara ti sala ni, dabe mo ti sala tënë na kota go ti tene azo kue amä ni, mbilimbili tongana kongregation ni ayeke na amicro ti tambelango na ni pëpe.

Mä ndo nzoni. Ye so ayeke mû ande maboko na mo ti kpe ti kiri ti tene tënë so mbeni zo nde atene ni awe. Nga, akiringo tënë so ambeni zo amû alingbi ti dabe mo na mbeni versê ti Bible wala mbeni tënë so alingbi ti mû ngangu na tënë so ala fa. Ngoi na ngoi, mbeni ndulu tënë na ndo ye so asi alingbi ti zi nda ti tënë so a yeke sala lisoro na ndo ni. Mara ti akiringo tënë tongaso ayeke mû maboko na zo mingi.

Manda ti kiri tënë na lege ti atënë ti mo mveni. Kiringo tënë so mo diko dikongo na yâ mbeti so a yeke manda ni afa so mo wara tâ nzoni kiringo tënë ni, na a yeke mbeni nzoni lege ti tene mo to nda ti kiri na atënë. Ye oko, guengo na li ni ti kiri tënë na lege ti atënë ti mo mveni afa na gigi so mo gbu nda ti tënë ni. A hunda pëpe ti diko tâ gi atënë so ayeke na yâ ti ambeti ti e. A-Témoin ti Jéhovah ayeke mû gi pëpe peko ti ambeti ti ala si ala tene.

Hon na tele ni pëpe. Atënë so ague nde na li ti tënë ni, wala so agboto lê ti azo kirikiri na ndo angbongboro tënë so a yeke sala lisoro na ndo ni, ayeke na lege ni pëpe. A ye ti tene so a yeke nzoni atënë ti mo ague legeoko na li ti tënë so a yeke sala lisoro na ndo ni. Tongaso, fade akiringo tënë ti mo asala si lisoro na ndo tënë ni akpengba zo na lege ti yingo.

Nda ni ayeke ti wa zo. Teti so nda ti akiringo tënë ti e ayeke ti wa amba ti e, a lingbi e tara ti kpe ti tene atënë so alingbi ti sala si bê ti ala anze. Nga, a lingbi e sala tënë na ndo paragraphe ni kue pëpe si a ngbâ gi kete tënë wala a sala si ambeni awara lege pëpe ti kiri tënë. Ayongoro tënë, wala akiringo tënë so zo agi li ti lo na ni gbä, alingbi ti sala si zo ahinga nda ti tënë ni nzoni pëpe. Akete ndulu tënë alingbi ti duti nzoni mingi, na a yeke wa ande afini zo ti kiri na andulu tënë so ala leke ni.

Kungba ti aita so ayeke mû li ni na yâ abungbi

Na ngoi kue so andu tënë ti wango zo, ita so ayeke mû li ni na yâ bungbi ayeke na mbeni nene kungba ti yô. Lo yeke fa na gigi so lo bi bê ti lo biani na ndo tënë oko oko kue so azo ayeke mû ni, na mango ala nzoni nga, na yekiango ndo, na bango yâ ti lê ti ala ahon ti sala mbeni ye nde. A yeke tâ na lege ni pëpe tongana lo dengi mê ti lo ti mä ndo nzoni pëpe, na tongaso lo kiri ti sala tënë ti ye so azo atene ni awe, wala ti hunda mbeni tënë so a kiri tënë na ndo ni fade awe!

A lingbi nga ti sala si bê ti zo anze tongana lakue ita so amû li ni akiri atene, na mbeni lege nde, peko ti tënë so aita amû, mo bâ mo tene akiringo tënë ni ayeke na lege ni pëpe. Na mbeni mbage nde, tongana atënë ti zo so amû li ni asala si azo akiri tënë na ndo mbeni ngbongboro tënë, ye so ayeke mû ngangu na zo. Amara ti ahundango tënë tongaso: ‘Tongana nyen e lingbi ti sala kusala na ni na yâ kongregation ti e?’ wala ‘Versê wa na yâ paragraphe ni ague legeoko na tënë so a londo ti tene?’, ayeke mû lege na zo ti mû anzoni kiringo tënë so asala si mungo mbage na lisoro ni anzere.

Biani, a yeke nzoni a gonda mbilimbili afini zo wala azo so ayeke na kamene mingi tongana ala kiri na mbeni tënë. A lingbi peut-être ti sala ni na ala oko na oko na peko ti mandango ye ni, tongaso ti kpe ti zia kamene na lê ti zo ni nga ti mû lege na ita so amû li ni ti mû awango tongana a hunda ti sala ni.

Na yâ lisoro ti e ti lâ oko oko, mbeni zo so aye gi ti tene azo amä lo ayeke sala si azo ayeke na nzara ti sala lisoro mbeni pëpe. Azo so ayeke mä lo abâ so mbeni tënë ti tene dä ayeke pëpe. Tongana ala mä tënë ni biani, a yeke duti ande na bê kue pëpe. Mara ti ye tongaso alingbi ti si tongana na ngoi ti lisoro ni gi ita so amû li ni si ayeke diko atënë fani mingi. Ye oko, ngoi na ngoi, ita so amû li ni alingbi ti hunda ambeni tënë nde ti mû maboko na azo so aga nga ti pusu ala ti gbu li na ndo tënë ni. A yeke nzoni a sala kusala na mara ti ahundango tënë tongaso fani mingi pëpe.

Ita so amû li ni ayeke mû ande lakue pëpe kozo zo so ayôro maboko ti lo na nduzu. Ye so alingbi ti sala si nzara ti kiringo na tënë ni agbu mbeni pëpe ala so aye ti wara kete ngoi kozoni ti leke tënë so ala ye ti tene. Na kungo kete, ita so amû li ni ayeke mû ande lege na zo so ade ti kiri tënë pëpe ti sala ni. Fade lo yeke sala nga hange na mungo pëpe akete molenge ti kiri tënë na akpengba hundango tënë so ahon ndo ti ngangu ti gbungo nda ti ye ti ala.

Ka tongana a mû mbeni kiringo tënë so ayeke na lege ni pëpe? A yeke nzoni ita so amû li ni akpe ti zia kamene na lê ti zo so amû kiringo tënë ni. Fani mingi, a yeke wara na yâ akiringo tënë, même atâa a yeke na lege ni kue pëpe, ambeni mbage ti tâ tënë. Na sorongo, na lege ti ndara, mbeni tënë so alingbi ti duti na lege ni na yâ kiringo tënë ti zo ni, na lekengo yâ ti hundango tënë ni nzoni, wala na hundango mbeni tënë nde, ita so amû li ni alingbi ti leke yâ ti kiringo tënë ni na tongaso ti zia kamene na lê ti zo ni senge senge pëpe.

Ti wa azo kue ti kiri tënë, a yeke nzoni ita so amû li ti mbeni bungbi ayeke sala ande nzoni mingi ti kpe ahundango tënë tongana: ‘Mbeni zo nde ayeke na tënë ti tene?’ Atâa so a sala ni na sioni bibe pëpe, ahundango tënë tongana ‘Zo wa ade akiri tënë pëpe? So ayeke tanga ti pasa ni la!’, ayeke wa ande mbeni zo oko pëpe ti fa tënë ti bê ti lo na gigi. A yeke nzoni aita abâ pëpe so a yeke faute ti ala tongana ala kiri tënë hio pëpe na ngoi ti bungbi. Nde na so, a yeke wa ala ti kangbi ye so ala hinga ngbanga ti so salango tongaso ayeke fango na gigi ndoye. Na ndo ni, na peko ti so ita so amû li ni ahunda na mbeni zo ti kiri tënë, a yeke nzoni pëpe ti tene, “Na peko ti lo, fade e yeke mä kiringo tënë ti Ita-koli tongaso, na pekoni, kiringo tënë ti Ita-wali tongaso.” A yeke nzoni ita so amû li ni amä kozoni kiringo tënë ni nga na pekoni, lo lingbi ti bâ wala a yeke nzoni ti zia mbeni kiringo tënë na ndo ni.

Kiringo tënë ayeke mbeni matabisi

Gango na abungbi ti aChrétien ayeke kota ye mingi na lege ti yingo; kiringo tënë na ngoi ni ayeke mbeni matabisi. Tongana e mû mbage ti e fani mingi na pendere lege so ti sepela Jéhovah “na popo ti bungbi ti azo”, fade e yeke mû mingi peko ti tapande ti David na e yeke bâ na nene ni wango ti Paul. Kiringo tënë na ngoi ti abungbi afa na gigi so e ndoye aita ti e, na afa nga na gigi so e yeke mbage ti kota bungbi ti Jéhovah. Na mbeni ndo nde wa mo ye ti duti dä tongana “mo bâ so lâ ni aga ndulu”?​—aHébreu 10:25.

[Kete tënë na gbe ni]

a So aTémoin ti Jéhovah asigigi na ni.

[Afoto na lembeti 20]

Ti mä ndo na ti kiri tënë ayeke kota ye mingi na ngoi ti abungbi ti aChrétien

[Foto na lembeti 21]

Ita so ayeke mû li ni ayeke bi bê na ndo kiringo tënë oko oko

    Ambeti na Sango (1997-2025)
    Sigi
    Linda
    • Sango
    • Kangbi ni na mbeni zo
    • Aye so mo ye
    • Copyright © 2025 Watch Tower Bible and Tract Society of Pennsylvania
    • Lege ti sara kua na ni
    • Ye so a yeke sara na asango so mo mû
    • Paramètres de confidentialité
    • JW.ORG
    • Linda
    Kangbi ni na mbeni zo