LEGE TI HON NDÖ TI AGINGO BÊ TI MO
Mo lingbi ti duti na fini sân ti gi bê ti mo
Awango ti ndara so ayeke na yâ ti Bible apeut ti aidé e ti kpe ti gi bê senge senge. E wani e peut ti hunzi agingo bê ti e kue ape. Me Wasarango e apeut ti hunzi ni. Lo soro même mbeni zo ti aidé e. Zo ni so ayeke Jésus Christ. Lo ga nduru awe ti sara apendere ye mingi na ndö ti sese kue tongana ti so lo sara na temps so lo yeke lani na ndö ti sese. Na tapande:
JÉSUS AYEKE SAVA ANDE AZO TI KOBELA, TONGANA TI SO LO SARA LANI.
“Ala ga na lo azo kue so ayeke bâ pasi ndali ti akobela nde nde . . . , na lo sava ala.”—MATTHIEU 4:24.
JÉSUS AYEKE SARA ANDE SI AZO AWARA NDO TI LANGO NGA NA KOBE.
“Azo [so Jésus akomande na ndö ti ala] ayeke leke ada, na ala yeke lango na yâ ni, nga ala yeke fâ ayaka ti vigne, na ala yeke te lengo ni. Ala yeke leke da si mbeni zo nde alango dä pëpe; nga ala yeke lu ye si mbeni zo nde ate ni pëpe.”—ÉSAÏE 65:21, 22.
KOMANDEMA TI JÉSUS AYEKE GA NA SIRIRI NA NZONI DUTI NA NDÖ TI SESE KUE.
“Na ngoi ti lo, azo ti mbilimbili ayeke maï, nga siriri ayeke duti dä mingi juska nze ayeke dä encore ape. Ti londo na mbeni ngu-ingo juska na mbeni ngu-ingo, a yeke wara azo ti gbe ti lo nga ti londo na ngu ti Euphrate juska na nda ti sese. . . . Awato ti lo ayeke su fuku ti sese.”—PSAUME 72:7-9.
JÉSUS AYEKE ZI ANDE SARANGO YE SO AYEKE NA LEGE NI APE.
“Lo yeke bâ mawa ti azo ti mawa nga na ti awayere; lo yeke sö fini ti awayere. Lo yeke zi ala na yâ ti pasi nga na yâ ti ye ti ngangu so a yeke sara na ala.”—PSAUME 72:13, 14.
JÉSUS AYEKE ZI ANDE MÊME PASI NGA NA KUÂ.
“Kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.”—APOCALYPSE 21:4.