Mbage 7
Aye wa asi ngbanga ti kengo yanga?
1-3. Tongana nyen ngoi afa so Jéhovah afa taa tene?
NA NDO tene ti ngangu ti Nzapa ti komande, aye wa asi na peko ti angu ngbangbo mingi ti yanga ti komande ti azo so abi be ti ala na ndo Nzapa pepee? Azo aduti anzoni wamungo li ni mingi ahon Nzapa? Oko pepee, tongana e bi be ti e na ndo aye ti sioni mingi so zo asala na mba ti lo zo na ngoi so kue.
2 So akozo baba na mama ti e ake yanga ti komande ti Nzapa a ga na kota kpale mingi. Ye so aga na ala pasi nga na sewa kue ti azo so aga na lege ti ala. Ala lingbi ti bi tene gi na ndo ala mveni. E diko na ya Tene ti Nzapa: “Ala futi lege ti ala mveni; ala yeke amolenge ti lo pepee, sioni ayeke na ya tele ti ala mveni.” — Deutéronome 32:5.
3 Nzapa afa kozoni giriri na Adam na Eve so tongana ala sigigi na ya akatikati so Lo lu ni, fade ala yeke ga mbakoro na ndani ala yeke kui. Mbaï afa taa tene ti gbotongo me so (Genèse 2:17; 3:19). Ala londo na gbe ti yanga ti komande ti Nzapa, na ndani ala ga mbakoro biani na ala kui.
4. Ngbanga ti nyen adu e kue azo ti siokpari, ngbaa ti kobela na kui?
4 A-Romain 5:12 afa ye so asi na pekoni na hale ti ala: “Na lege ti zo oko [Adam, baba ti sewa ti azo] siokpari aga na sese so, na kui aga na lege ti siokpari, tongaso kui asi na azo kue.” Ni laa, na kengo fango lege ti Nzapa, akozo baba na mama ti e aga awasiokpari so aye nde nde atia ala. A lingbi na andia ti senda-gi, ala lingbi mu na hale ti ala mbeni ye nde pepee gi siokpari. Ni laa si adu e kue na ye ti sioni na tele ti e, ngbaa ti kobela na kui.
5, 6. Mbaï afa nyen na ndo ngangu ti azo ti leke taa siriri na nzoni dutingo?
5 Angu ngbangbo mingi ahon awe atondani na ngoi ni so. Akodoro togbia abaa gigi na ahon. Atara amara nde nde ti ngorogbia so azo aleke ni. Ye oko, sewa ti azo angba lakue ti wara aye ti sioni mingi. Na nda ti ngu saki omene, e lingbi ti ku ti baa so azo ague na li ni ti leke siriri, fango ngbanga ti mbilimbili nga na nzoni dutingo na ndo le sese kue na so ala sala ye laso na lege ti nzobe, ti be-nzoni nga na mungo maboko na popo ti ala.
6 Ye oko, ye ni ayeke nde mingi. Mbeni mara ti ngorobia ti azo awara la oko lege pepee ti ga na azo kue taa siriri na nzoni dutingo. Gi na ngoi ti e oko so, e baa fango azo kutu mingi na ngoi ti anazi, nga na fango azo kutu ngbangbo oko na ya abira nde nde. Na ngoi ti e, asala sana na azo mingi, afa ala na abi ala na kanga ngbanga ti ye so ala ma na be na ni wala ngbanga ti atene nde nde na lege ti poroso.
Ye na ngoi ti e laso
7. Sala tene ti aye so asi na azo laso.
7 Zia e baa nga dutingo ti asewa ti azo na ngoi ti e. Fango zo, nzi na salango ngangu amu ndo kue. Nyongo mbangi ague na li ni mingi. Akobela ti koli na wali amu ndo le sese kue. Azo kutu mingi awara sioni kobela ti SIDA. Azo kutu bale mingi akui na nzala wala na kobela na ya ngu oko oko, na ngoi so mbeni kete mbage ti azo ayeke na mosoro mingi. Azo abuba sese. Na ndo kue, dutingo ti asewa na nzoni salango ye ati na sese. Taa tene, fini ti laso afa sioni yanga ti komande ti ‘nzapa ti sese so’, Satan. Sese so lo mu li ni da ayeke na ndoyee pepee, abaa mawa ti zo pepee na a yeke sioni mingi. — 2 aCorinthien 4:4.
8. Ngbanga ti nyen e lingbi ti sala tene ti guengo na li ni pepee na ya aye so azo aleke?
8 Nzapa azia ngoi na azo ti gue na li ni mingi na lege ti ndara nga na lege ti mosoro. Ye oko, e lingbi ti tene biani so azo ague na li ni tongana azia ngindi na kondoro teti ngombe, kutukutu ti bira, lapara ti bira na anenee ngombe mingi? A yeke guengo na li ni tongana azo alingbi ti tambela na le ti nduzu, me ala hinga pepee ti duti na siriri na popo ti ala na ndo le sese? Guengo na li ni ayeke na ndo wa tongana azo ayeke na mbito ti tambela na ndo lege na bi, nga na ya ambeni ndo, na kota la?
Ye so ngoi afa
9, 10. a) Angu ngbangbo mingi so ahon afa nyen polele? b) Ngbanga ti nyen fade Nzapa alungula pepee ngangu ti sala ye ti be ti zo mveni?
9 Angu so ague na peko ti tele afa so azo alingbi ti fa lege na gere ti ala nzoni pepee tongana ala bi be ti ala pepee na ndo yanga ti komande ti Nzapa. Ala lingbi ti fa lege na ala pepee, lege-oko tongana ala lingbi ti duti na fini pepee tongana ala te ye, ala nyon ye wala ala wo pupu pepee. Tene ni ayeke polele: Aleke e ti duti na gbe ti Wasalango e, lege-oko tongana aleke e si e ngba na fini na lege ti tengo kobe, ti ngu na ti pupu.
10 Na ziango lege na sioni, Nzapa afa na gigi biani asioni ye so ayeke si ngbanga ti sioni salango kusala na ngangu ti sala ye ti be ti zo. Ye oko, ngangu ti sala ye ti be ti zo ayeke mbeni matabisi ti ngele ngangu mingi so, ahon ti gbanzi ni na azo, Nzapa azia ngoi na ala ti baa aye so ayeke si tongana asala na kusala na lege ni pepee. Mbeti ti Nzapa atene taa tene: “A yeke ti zo so atambela ti fa lege na gere ti lo pepee.” Lo sala tene na lege ni biani tongana lo tene: “Zo akomande zo teti sioni ti lo.” — Jérémie 10:23; Zo-ti-fa-tene 8:9.
11. Mbeni yanga ti komande ti azo awara la oko lege ti lungula pasi?
11 So Nzapa azia lege na azo ti komande teti ngu saki omene, a fa na ngangu so zo alingbi pepee ti kanga lege na pasi. Lo lingbi la oko ti sala ni pepee. Ti mu mbeni tapande, ataa kota ndara ti lo, mosoro ti lo na ngangu ti lo, Salomon, gbia ti Israël, aduti na ngangu pepee ti lungula vundu na ngoi ti lo so aga na lege ti yanga ti komande ti zo (Zo-ti-fa-tene 4:1-3). Lege-oko nga laso, ataa guengo na li ti senda-gi, amokonzi ti sese alingbi pepee ti lungula apasi. Ye ti sioni ahon, Mbaï afa so azo so alondo na gbe ti komandema ti Nzapa akiri azia pasi na ndo pasi so azo ayeke na ni ahon ti lungula ni.
Nzapa abaa ndo yongoro
12-14. Aye ti nzoni wa so ayeke ga na pekoni asi ngbanga ti so Nzapa azia lege na pasi?
12 So Nzapa azia lege na pasi, a ga na e ye ti vundu. Ye oko, Nzapa abaa ndo yongoro, teti lo hinga anzoni lengo so ayeke ga na lege ni. Fade bango ndo ti Nzapa ayeke ga na aye ti nzoni na azo ti lo, gi teti ambeni kete ngu wala teti angu saki mingi pepee, me teti ngu kutu mingi, biani, teti lakue lakue.
13 Tongana mbeni la, mbeni zo asala ye na lege ni pepee na ngangu ti sala ye so be ti zo aye ti ke alege ti salango ye ti Nzapa, fade ayeke hunda pepee ti mu na lo ngoi mingi si lo tara ti fa nda ti tene ti lo. Na ziango lege na azo ti kengo yanga teti ngu saki mingi, Nzapa alu mbeni ndia so ayeke ngba ande teti lakue lakue, na ndo kue na nda-gigi.
14 Teti so Jéhovah azia lege na sioni na pasi asi na ngoi ti e, a fa polele so ye kue so ague lege-oko na lo pepee alingbi ti ga nzoni pepee. A fa nga na lege ti ngangu so, dutingo nde ti azo wala ti azo ti yingo alingbi ti ga na aye ti nzoni pepee so aninga. Tongaso, fade Nzapa asala ye na lege ni tongana lo fa fade fade azo kue so ake yanga. “Fade lo fa azo ti sioni kue.” — Psaume 145:20; aRomain 3:4.
[Foto na lembeti 15]
Tongana akozo baba na mama ti e asoro ti duti nde na Nzapa, ala tonda ti ga mbakoro na ndani ala kui.
[Foto na lembeti 16]
Yanga ti komande ti azo so abi be na ndo Nzapa pepee aduti ye ti sioni.
[Lingu ti foto]
Foto ti U.S. Coast Guard