A-Témoin ti Jéhovah oke la mo hinga ala? Ambeni na popo ti e ayeke peut-être avoizin ti mo, akamarade ti mo ti place ti kua wala so mo na ala asara klase oko. Wala peut-être a si awe so e sara lisoro na mo na ndö ti Bible. Ti tâ tënë ni, e yeke azo wa? Nga ngbanga ti nyen si e yeke fa tënë ti mabe ti e na azo?

E yeke tongana tanga ti azo kue. E yeke ti akodro nde nde nga dutingo ti e ayeke nde nde. Ambeni na popo ti e ândö asara ambeni nzapa nde, nga ambeni amä na bê lani na Nzapa pëpe. Ye oko, kozoni si e ga Témoin ti Jéhovah, e kue lani e mû ngoi ti gi yâ ti Bible tâ nzoni (Kusala 17:11). E yeda na aye so e manda so, nga na pekoni e wani e soro ti voro Jéhovah Nzapa.

Mandango Bible aga na e aye ti nzoni. Tongana tanga ti azo kue, e nga kue e yeke tingbi na akpale nga e yeke na awokongo. Me teti so e yeke gi ti zia si Bible afa lege na e na yâ ti fini ti e ti lâ oko oko, dutingo ti e aga tâ nzoni mingi (Psaume 128:1, 2). Ndani la si e yeke fa na azo anzoni ye so e manda na yâ ti Bible.

Andia ti Nzapa la ayeke fa lege na e. Andia so, so alondo na yâ ti Bible, asara si e duti nzoni nga e ne amba ti e azo. A sara nga si e yeke sara ye ti likisi pëpe nga e sara nzoni na azo. Andia so asara si azo so abata ni ayeke na nzoni seni nga ala ga anzoni zo ti kodro. A yeke pusu nga asewa ti duti beoko na ti duti na anzoni sarango ye. Ndali ti so e hinga so “Nzapa ayeke sara kangbi na popo ti azo pëpe,” e bâ so e yeke ti mbeni kota sewa na lege ti yingo so mara ti azo nde nde kue ayeke na yâ ni na so azo ni ahinga tënë ti poroso wala ti mara pëpe. Atâa so e yeke asenge zo, e aTémoin ti Jéhovah e yeke tâ nde mingi.​—Kusala 4:13; 10:34, 35.

• Nyen la afa so aTémoin ti Jéhovah ayeke tongana tanga ti azo kue?

• Andia wa la aTémoin ti Jéhovah amanda na yâ ti Bible?

Azo mingi apensé so iri Témoin ti Jéhovah ayeke iri ti mbeni fini bungbi ti vorongo Nzapa. Me a ninga ngu 2 700 tongaso awe, Bible atene so awakua ti oko tâ Nzapa ayeke “atémoin” ti lo (Ésaïe 43:10-12). Juska na ngu 1931, a hinga lani e na iri ti aWamandango Bible. Me ngbanga ti nyen e mû iri “Témoin ti Jéhovah” e zia na ndö ti e?

Iri so afa Nzapa so e voro lo. Na yâ ti ambeni ngbene mbeti ti Nzapa so a sû ândö na maboko, a yeke wara dä iri ti Nzapa, Jéhovah, fani saki mingi. Me na yâ ti ambeni Bible na ambeni yanga ti kodro nde, a zi iri so na a zia na place ni atënë tongana Seigneur wala Nzapa. Ti bâ ni nzoni, lani tâ Nzapa afa terê ti lo na Moïse na lege ti iri ti lo so ayeke Jéhovah, lo tene: “So ayeke iri ti mbi, a yeke ngbâ lakue lakue.” (Exode 3:15). A yeke tongaso si lo zia kangbi na popo ti lo na anzapa ti wataka kue. A nzere na e mingi ti tene iri ti Nzapa, iri so ayeke nzoni-kue, aduti na ndö ti e.

A fa kusala so e yeke sara. Giriri, a to nda ni na Abel, zo ti mbilimbili, ti si na ambeni mingi, azo so kue afa na lege ti tënë ti yanga ti ala so ala mä na bê na Jéhovah. Nga tongana angu ayeke hon, azo tongana Noé, Abraham, Sara, Moïse, David na ambeni mingi nga alï na yâ ti kota molongo ti “atémoin mingi mingi” so (aHébreu 11:4–12:1). Legeoko tongana ti so mbeni zo alingbi ti gue na gbele ngbanga ti duti témoin ti mbeni zo so a bi tënë senge senge na li ti lo, e nga kue e ye ti fa na azo tâ tënë na ndö ti Nzapa.

E mû tapande ti Jésus. Bible atene so lo yeke “témoin so ayeke be-ta-zo si ayeke tene gï tâ tënë”. (Apocalypse 3:14). Jésus wani atene so ni ‘sara si azo ahinga iri ti Nzapa’ nga lo ngbâ lani ti ‘fa tâ tënë’ na ndö ti Nzapa tongana tënë ti témoin (Jean 17:26; 18:37). Tongaso, ti azo so aye biani ti mû peko ti Christ, a lingbi iri ti Jéhovah aduti na ndö ti ala na ala fa ni na azo nga. A yeke ye so aTémoin ti Jéhovah ayeke sara kue ti sara la.

• Ngbanga ti nyen aWamandango Bible amû iri “Témoin ti Jéhovah” azia na ndo ti ala?

• Depuis lawa la si Jéhovah ayeke na atémoin ti lo na ndö ti sese ge?

• Témoin so ayeke kota na popo ti aTémoin ti Jéhovah kue ayeke zo wa?

Bible atene ândö so na peko ti kuâ ti Christ, ambeni zo ayeke londo na popo ti akozo Chrétien na ala yeke fa ye ti wataka na azo nga ala yeke ba yâ ti atâ tënë ti Bible (Kusala 20:29, 30). A yeke tâ gï ye so asi na pekoni la. Ala bungbi afango ye ti Jésus na ti apaïen oko, na ye so asara si aChrétien ti wataka abâ gigi (2 Timothée 4:3, 4). Nyen la apusu e ti tene na kite oko pëpe so laso e hinga tâ mbilimbili ye so Bible alingbi ti fa?

Ngoi ni asi lani awe ti tene Jéhovah asigi na tâ tënë. Nzapa atene lani so ‘na ngoi ti nda ni, tâ hingango ye ayeke ga mingi.’ (Daniel 12:4). Na ngu 1870, mbeni kete wungo ti azo so ayeke gi lani tâ tënë aga ti bâ so mingi ti aye so a-eglize afa ague nde na ye so Bible afa ti lo. Tongaso, ala to nda ti gi ti hinga tâ nda ti ye so Bible afa, na Jéhovah amû maboko na ala na yâ ni.

Ambeni zo so aye lani ti hinga tâ tënë agi yâ ti Bible nzoni. A-Wamandango Bible so, so aga kozo na e, asigi na mbeni kode ti gingo nda ti ye so e ngbâ ti mû pekoni laso. Ala yeke mû mbeni tënë ti yâ ti Bible na ala yeke pika patara na ndö ni. Tongana a si so ala mä yâ ti mbeni tënë ti yâ ti Bible ni ape, ala yeke gi ambeni versê nde so afa ndani. Tongana ye so ala wara ague oko na tanga ti aversê ti Bible, ala sara ni na mbeti. So ala zia si Bible wani la ayeke fa nda ti ye na ala, lê ti ala akiri azi na ndö ti iri ti Nzapa na Royaume ti lo, na ndö ti ye so lo leke ti sara ndali ti azo nga ndali ti sese, na ndö ti dutingo ti azo so akui awe nga na ndö ti beku ti zingongo ti akuâ. Gingo nda ti ye ti ala ni azi ala na gbe ti gbâ ti afango ye ti wataka nga na asarango ye so ayeke na lege ni pëpe.​—Jean 8:31, 32.

Ti si na ngu 1879 aWamandango Bible so abâ so ngoi ni asi awe ti fa tâ tënë na ndö ti sese mobimba. Tongaso, na ngu ni so, ala to nda ti sigi na mbeti so e ngbâ lakue ti sigi na ni laso, so ayeke Tour ti Ba Ndo Afa Tene ti Royaume ti Jéhovah. Ti fadeso e yeke fa tâ tënë ti Bible na azo na yâ ti akodro 240 nga na ayanga ti kodro ahon 750. Tâ tënë, laso tâ hingango ye aga mingi!

• Nyen la asi na tâ tënë na peko ti kuâ ti Christ?

• Nyen la asara si lê ti e akiri azi na ndö ti tâ tënë so ayeke na yâ ti Bible?

Teti angu mingi, aTémoin ti Jéhovah asara kusala na aBible nde nde, ala pete ni nga ala kangbi ni. Me na pekoni, e bâ so e yeke na bezoin ti mbeni fini Bible so ayeke mû lege na azo nzoni ti wara “tâ hingango ye na ndö ti tâ tënë”, teti a yeke ye so Nzapa aye ndali ti azo kue la (1 Timothée 2:3, 4). Ni la, na ngu 1950 e to nda ti sigi na akete mbage ti Mbeti ti Nzapa ti fini dunia. Juska laso, a sara ni na ayanga ti kodro ahon 130 so azo ayeke tene ni lâ na lâ, même na Sango, nga a kiri peko ti atënë ni tâ na lege ni.

E bezoin lani mbeni Bible so zo alingbi ti mä yâ ni hio. Tongana angoi ayeke hon, ayanga ti kodro ayeke changé. Ye so asara si atënë ti mingi ti angbene Bible aga angbene tënë wala a yeke ngangu na zo ti mä yâ ni. Nga, a kiri a wara ambeni ngbene mbeti ti Bible so a sû ândö giriri na maboko na so angu so a sû na ni ayeke nduru mingi na ati kozo ni. Atënë ti yâ ni ague oko mingi na ati kozo ni, na a sara si laso azo amä yâ ti Hébreu, ti Araméen na ti Grec ti giriri tâ nzoni mingi.

E bezoin lani ti tene a kiri peko ti Bible tâ na lege ni. Ahon ti tene azo so akiri peko ti Bible na ayanga ti kodro nde nde achangé yâ ti atënë so ayeke na yâ ni tongana ti so bê ti ala aye, a yeke ti ala ti kiri peko ni tâ gï tongana ti so a sû na yâ ti Bible kozo. Ye oko, a zi iri ti Nzapa, so ayeke Jéhovah, na yâ ti mingi ti aBible.

E bezoin lani mbeni Bible so afa so Jéhovah la ayeke Wa ti Bible ni (2 Samuel 23:2). Azo so akiri peko ti Bible ti Fini dunia akiri na iri ti Jéhovah na yâ ni na ando so ândö a sigi dä fani 7 000 tongaso na yâ ti angbene mbeti ti Nzapa, tongana ti so a fa na gbe ni ge (Psaume 83:18). Teti so azo amû angu mingi ti gi nda ti ye si ala sigi na Bible ti Fini dunia, dikongo ni anzere na zo nga atënë ti yâ ni afa bibe ti Nzapa tâ mbilimbili. Atâa mo yeke na Bible ti Fini dunia na yanga ti kodro ti mo wala pëpe, e wa mo ti duti na nzoni kapa ti dikongo Bible lâ oko oko.​—Josué 1:8; Psaume 1:2, 3.

• Ngbanga ti nyen e bâ lani so e yeke na bezoin ti mbeni fini Bible?

• Zo kue so aye ti hinga ye so Nzapa aye, a yeke nzoni lo sara nyen lâ oko oko?