Na yâ ti bungbi ti e, e yeke pëpe na akota zo ti nzapa so a yeke futa ala futango ndali ti kua ti ala ni. Me, tongana ti so a sara ândö na ngoi so congrégation ti aChrétien abâ gigi, a soro ambeni ita-koli so asara ye ague oko na tënë ti yâ ti Bible ti ga a-ancien tongaso si ala “bata congrégation ti Nzapa”. (Kusala 20:28). Akoli so akpengba na lege ti yingo nga ala yeke mû li ni na yâ ti congrégation na ala yeke bata ni. ‘A gbu ala gbungo na ngangu pëpe ti sara ni, me ala sara ni na bê ti ala wani; ala bata ataba ni na bibe ti warango ye na lege ti likisi pëpe, me na bê ti ala kue’. (1 Pierre 5:1-3). Kusala wa ala yeke sara ndali ti e?

Ala yeke bâ ndo na ndö ti e. A-ancien ayeke fa tënë ti Nzapa na congrégation nga ala yeke mû maboko na e ti duti na nzoni songo na Nzapa. So ala hinga atene Nzapa asara confiance na ala la si lo mû na ala kota kua ni so, ala yeke son songo na ndö ti e ape, nde na so ala yeke gi ti tene e duti nzoni nga na ngia (2 aCorinthien 1:24). Legeoko tongana ti mbeni berger so ayeke mû ngoi ti lo ti bâ lege ti ataba ti lo oko na oko kue, a-ancien ayeke sara kue ti hinga azo ti yâ ti congrégation ti ala oko na oko.​—aProverbe 27:23.

Ala yeke fa na e lege ti sara ye so Nzapa aye. Yenga oko oko, a-ancien ayeke mû li ni na abungbi ti congrégation ti kpengba mabe ti e (Kusala 15:32). Akoli so, so azia bê ti ala kue na kua ti ala ni, ayeke mû nga li ni na fango tënë, ala yeke fa tënë na terê ti e nga ala yeke mû maboko na e ti fa tënë na alege nde nde.

Ala yeke gi ti kpengba e oko oko kue. Ti sara si zo oko oko na popo ti e akpengba songo ti lo na Nzapa, a-ancien ayeke bâ e na yanga-da ti e wala na Da ti Royaume ti mû maboko na e na ti dë bê ti e na lege ti atënë ti Bible.​—Jacques 5:14, 15.

Nde na akua so a-ancien ayeke na ni na congrégation, mingi ti ala ayeke sara nga kua ti nginza nga ala yeke na asewa so a lingbi ala bâ lege ti ala. Tongaso, a lingbi e ne aita so ndali ti ngangu kua so ala yeke sara.​—1 aThessalonicien 5:12, 13.

• Kusala wa a-ancien ayeke sara na yâ ti congrégation?

• Na alege wa a-ancien ayeke fa so ala bi bê ti ala na e?

Bible asara tënë ti aita-koli so ayeke bâ lege ti akua ti yâ ti congrégation. Ambeni ayeke “azo ti bango ndo na ndö ti congrégation” nga ambeni ayeke “awakua ti mungo maboko”. (aPhilippien 1:1). A yeke wara ka aita ni so mingi na yâ ti congrégation oko oko. Kusala wa awakua ti mungo maboko ayeke sara ndali ti nzoni ti e?

Ala yeke mû maboko na a-ancien. Awakua ti mungo maboko (so ambeni ayeke amaseka nga ambeni ayeke ambakoro) ayeke azo so aye tënë ti Nzapa mingi. Zo alingbi ti sara confiance na ala nga ala yeke sara kua ti ala na lege ni. Ala yeke sara ka ambeni kua so a lingbi a sara ni lakue si aye atambela nzoni na yâ ti congrégation wala si aye na yâ ti Da ti Royaume angbâ nzoni. Ye so amû lege na a-ancien ti zia lê ti ala na ndö ti kua ti ala ti fango ye nga na ti bango lege ti congrégation.

Ala yeke sara ambeni kua so amû maboko. Ambeni wakua ti mungo maboko ayeke sara kua ti yambango azo kue so aga na bungbi. Ambeni ayeke bâ peut-être lege ti masini ti mango na bia wala micro. Ambeni ayeke bâ lege ti kangbingo ambeti, ti acompte, ti mungo aterritoire na azo ti yâ ti congrégation. Ala yeke bâ nga lege ti ambeni kua so a hunda ti sara si Da ti Royaume angbâ nzoni. A-ancien alingbi ti hunda na ala ti mû maboko na ambakoro. Atâa kua wa si a hunda na awakua ti mungo maboko ti sara, ala yeke nduru ti sara ni, na ye so apusu e ti ne ala.​—1 Timothée 3:13.

Ala zia nzoni tapande na aita. Aita so si ayeke na anzoni sarango ye la si a-ancien asoro ala ti ga awakua ti mungo maboko. Ni la, tongana ala yeke mû diskur wala ala yeke mû li ni na yâ ti ambeni bungbi, atënë ti ala ni ayeke kpengba mabe ti e. So ala yeke mû ka li ni ti fa tënë, e nga kue e ye ti sara tongana ala. Ndali ti so ala yeke sara kua maboko na maboko na a-ancien, aita kue ayeke na siriri nga na ngia. (aÉphésien 4:16) Ande ala nga kue alingbi ti ga ancien.

• Awakua ti mungo maboko ayeke azo so sarango ye ti ala ayeke tongana nyen?

• Awakua ni so ayeke mû maboko na congrégation tongana nyen si aye atambela dä nzoni?

Na mbage ti Mbeti ti Nzapa so aChrétien asû ândö na yanga ti Grec, a sara tënë ti Barnabas nga na ti bazengele Paul mingi. Ala yeke lani asurveillant so ague na ando nde nde, so ti tene ala yeke sara vizite na acongrégation oko oko ti ngoi ni kâ. Ala sara ni ngbanga ti so ala ye si aita ti ala aduti nzoni na lege ti yingo. Paul atene lani so lo ye ti ‘kiri ti bâ aita’ ti bâ wala ala yeke tongana nyen. Tongaso lo yeke lani nduru ti sara akilomètre mingi ti gue ti kpengba ala (Kusala 15:36). Asurveillant ti e laso nga ayeke na oko bibe so.

Ala ga ti kpengba e. Ita oko oko kue so ayeke surveillant ti circonscription ayeke sara vizite ti acongrégation 20 tongaso, lo yeke mû yenga oko ti duti na congrégation oko oko, na so fani use na yâ ti ngu oko. Aita-koli so nga na awali ti ala (tongana ala yeke na ni) asara nzoni mingi na e, teti ala hinga ye mingi. Ala yeke sara kue ti hinga aita kue, atâa a yeke ambakoro wala amaseka, na a nzere ka na ala mingi ti fa tënë na terê ti e nga ti tene e na ala e gue na a-étude ti e. Ala na a-ancien ayeke gue ka abâ aita na da ti ala ti kpengba ala. Ala yeke mû ka adiskur na abungbi ti e wala na akota bungbi ti e ti kpengba nga e.​—Kusala 15:35.

Ala bi bê ti ala na azo kue. Asurveillant ti circonscription aye si acongrégation aduti nzoni na lege ti yingo. Ala yeke sara ka bungbi na a-ancien nga na awakua ti mungo maboko ti bâ ye so congrégation asara nga ala yeke mû wango na ala na ndö ti kusala ti ala ni. Ala yeke mû maboko na apionnier si ala sara nzoni kua na fango tënë, nga a nzere ka na ala ti hinga afini zo so aga na bungbi nga ti mä effort so ala sara ti maï na lege ti yingo. Asurveillant, so ayeke ‘amba ti e wakua’, ayeke sara kua ngangu ‘ndali ti nzoni ti e’. (2 aCorinthien 8:23). Zia si e kue e mû pendere tapande ti mabe ti ala.​—aHébreu 13:7.

• Ngbanga ti nyen asurveillant ti circonscription ayeke sara ka vizite na acongrégation?

• Mo lingbi ti sara nyen ti bâ nzoni na lege ti vizite ti ala ni?

Tongana mbeni ye ti ngangu asi, na tapande ngu asuku na abuba aye, aTémoin ti Jéhovah ayeke leke aye hio ti tokua ni na aita ti ala so ye ni asi na ala. A fa biani so e ye terê na popo ti e (Jean 13:34, 35; 1 Jean 3:17, 18). Me e yeke mû maboko na ala ni tongana nyen?

E yeke tokua nginza na ala. Lani tongana kota nzara atï na kodro ti Judée, aChrétien ti kodro ti Antioche atokua lani nginza na aita ti ala ti bungbi (Kusala 11:27-30). E nga kue tongana e mä so ye ti ngangu asi na aita ti e na mbeni kodro, e yeke tokua nginza na ala na lege ti congrégation ti e si amû maboko na ala.​—2 aCorinthien 8:13-15.

E yeke mû nga na ala ambeni ye so atia ala. A-ancien ti ndo so ye ti ngangu ni asi dä ayeke gi peko ti aita ni oko na oko ti bâ wala ala kue awara sioni ape. A yeke zia na sese mbeni komite so ayeke bâ lege ti kusala ti mungo nzoni ngu, kobe, bongo, ndo ti lango nga na yorö na aita ni. A-Témoin mingi so ahinga ti sara mbeni kua so bezoin ni ayeke dä ayeke mû terê ti ala wani ti gue na ando ni so ti mû maboko, na tapande ti leke ada ti aita so abuba wala aDa ti Royaume. Teti so azo ti yâ ti bungbi ti e ayeke mä terê nzoni, nga teti so sarango kusala maboko na maboko amû lege na e ti manda ye mingi a sara si tongana mbeni kpale asi, hio e leke terê ti e awe. E yeke mû maboko na “ala so ayeke aita ti e na yâ ti mabe”, me nga na ambeni zo nde, atâa ala yeke ti nzapa wa.​—aGalate 6:10.

E yeke dë nga bê ti ala na ambeni tënë ti Nzapa. Ala so ye ti ngangu asi na ala, a lingbi a dë bê ti ala. Ni la, na mara ti ngoi tongaso, Jéhovah, “Nzapa ti dengo bê kue,” ayeke dë bê ti e si e wara ngangu (2 aCorinthien 1:3, 4). E yeke kangbi apendere tënë ti yâ ti Bible na azo ni, e tene na ala so Royaume ti Nzapa aga nduru ti hunzi aye ti ngangu kue so asara si zo ayeke na vundu wala na yâ ti pasi.​—Apocalypse 21:4.

• Nyen la asara si aTémoin ayeke mû maboko hio na aita ti ala tongana mbeni ye ti ngangu asi na ala?

• E lingbi ti dë bê ti azo ni tongana nyen?

Ngoi kete kozoni si lo kui, Jésus asara lisoro na adisciple ti lo, Pierre, Jacques, Jean na André, gï lo na ala osio. Lo fa na ala fä ti singo ti lo na alango ti nda ni. Na pekoni lo hunda na ala: “Zo wa mbilimbili si ayeke ngbâa be-ta-zo so ayeke sara ye na ndara? Lo so wa ti lo azia lo na ndö ti azo ti kua ti lo ti mû na ala kobe ti ala na ngoi ni so alingbi?” (Matthieu 24:3, 45, Marc 13:3, 4). Na yâ ti atënë ti lo, Jésus afa so teti so lo yeke “wa” ti ala, lo yeke mû ande kua na ala ti mû lakue kobe ti yingo na adisciple ti lo na alango ti nda ni. Azo ni so, so tongana a bungbi ala kue ala ga ngbâa ni, ayeke azo wa?

Ala yeke atâ disciple ti Jésus so Nzapa asoro ala ti gue na yayu. A bâ polele so “ngbâa” ni so ayeke Bebungbi ti aTémoin ti Jéhovah. A yeke lo la lo yeke mû kobe ti yingo na amba ti lo awakua ti Jéhovah na tâ ngoi ni. Gï na mbage ti ngbâa be-ta-zo so la si e lingbi ti wara lakue “kobe so alingbi na [e] na ngoi ni so alingbi”.​—Luc 12:42.

Ala yeke bâ ndo na ndö ti azo ti da ti Nzapa (1 Timothée 3:15). Jésus amû kota kua na ngbâa ni ti bâ ndo na ndö ti kusala so mbage ti bungbi ti Jéhovah so ayeke na sese ge ayeke sara na ndö ti dunia mobimba. Kua ni ayeke ti bâ lege ti aye tongana nginza, ada ti bungbi nde nde, afiliale, ambeti na ambeni ye nde. Ala yeke bâ ndo na ndö ti kua ti fango tënë nga ala yeke fa ye na e na lege ti acongrégation ti e. Ni la, ti tene e wara ye so e bezoin ni na tâ ngoi ni, “ngbâa be-ta-zo so ayeke sara ye na ndara” ayeke kangbi kobe ti yingo na lege ti ambeti nga na lege ti aye so e yeke manda na ngoi ti abungbi nga na akota bungbi.

Ngbâa ni ayeke be-ta-zo na lege so lo yeke fa gï atënë so ayeke na yâ ti Bible nga na lege so lo yeke sara kua ti lo ti fango nzoni tënë. Lo sara ye na ndara ndali ti so lo yeke sara kusala nzoni mingi na aye so Christ azia na tïtî lo na ndö ti sese ge (Kusala 10:42). Jéhovah airi tënë nzoni na ndö ti kua ti ngbâa ni na sarango si aye ti lo awu, atâa na lege ti mitele wala na lege ti yingo.​—Ésaïe 60:22; 65:13.

• Jésus azia kua ti mungo kobe ti yingo na adisciple ti lo na tïtî zo wa?

• Ngbanga ti nyen a tene ngbâa ni ayeke be-ta-zo nga lo sara ye na ndara?

Na ngoi ti abazengele, mbeni kete groupe ti azo asara kua tongana bebungbi. A yeke “abazengele nga na a-ancien so ayeke na Jérusalem” si asara kua so (Kusala 15:2). Ala yeke mû lani akota desizion so andu aChrétien kue ti ngoi ni kâ, so beku ti ala kue ayeke ti gue na yayu. Kozo ti tene ala mû mbeni desizion, ala yeke gï ndani na yâ ti Mbeti ti Nzapa nga ala hunda fango lege ti yingo ti Nzapa. Na pekoni awe, ala kue yanga oko amû desizion ni. (Kusala 15:25). Bebungbi ti laso ayeke sara tongaso nga.

Nzapa asara kua na Bebungbi ti sara ye so lo ye. Aita-koli so ayeke na yâ ti Bebungbi ti laso ayeke azo so ayeke na beku ti gue na yayu. Ala yeke gï nda ti Bible mingi nga ala hinga tongana nyen ti leke ambeni tënë so andu aye ti yingo wala asenge ye. Yenga oko oko, ala yeke wara terê ti bâ ambeni tënë so andu aita kue, na ala mû desizion alingbi na ye so Bible afa. Nga, tongana ti ngoi ti abazengele, ala yeke fa adesizion ti ala ni na acongrégation kue na lege ti alettre wala na lege ti asurveillant so ague na ndo nde nde wala ambeni zo nde. Ye so asara si awakua ti Nzapa aduti beoko na lege ti bibe nga na yâ ti sarango ye ti ala (Kusala 16:4, 5). Bebungbi ayeke bâ lege ti kobe ti yingo, lo yeke wa aita ti bi terê mingi na yâ ti kua ti fango tënë ti Royaume, nga lê ti lo ayeke na ndo ti kua ti mungo ambeni kusala na ambeni ita-koli na yâ ti acongrégation.

Bebungbi azia si yingo ti Nzapa la afa lege na lo. Aita ti Bebungbi ayeke zia si Jéhovah, Gbia ti Dunia Kue, nga na Jésus, Li ti congrégation, afa lege na ala (1 aCorinthien 11:3; aÉphésien 5:23). Aita ti yâ ti Bebungbi wani abâ terê ti ala kota pëpe na popo ti awakua ti Nzapa. Me legeoko na tanga ti aita so ayeke na beku ti gue na yayu, ala ngbâ “gï ti mû peko ti Molenge ti taba ni [Jésus] atâa lo gue na ndo wa.” (Apocalypse 14:4) A nzere ka mingi na Bebungbi ti hinga so e yeke sambela ndali ti ala.

• Na ngoi ti abazengele, azo wa la lani ayeke na yâ ti bebungbi?

• Laso Bebungbi ayeke gï fango lege ti Nzapa tongana nyen?

Béthel ayeke mbeni iri na yanga ti Hébreu, na a ye ti tene “Da ti Nzapa”. (Genèse 28:17, 19, kete tënë na gbe ni). Iri ni so alingbi na ada nde nde so aTémoin ti Jéhovah aleke ni na akodro nde nde so na yâ ni a yeke bâ lege ti kua ti fango tënë. Bebungbi ayeke sara kua na Kota ndokua ni so ayeke na gbata ti New York, na Amerika. Kâ lo yeke bâ ndo na ndö ti akua so a yeke sara na yâ ti aBéthel ni so. Azo kue so asara kua na yâ ti aBéthel, a iri ala “sewa ti Béthel,” teti so ala yeke lango ndo oko, ala yeke sara kua ndo oko, ala yeke te kobe ndo oko nga ala yeke manda Bible ndo oko.​—Psaume 133:1.

Mbeni pendere ndo so azo ti yâ ti sewa ni amû bê ti ala kue na kua ti ala. Na yâ ti aBéthel oko oko, a yeke wara aita-koli na aita-wali so amû terê ti ala kue ti sara ye so Nzapa aye nga ti sara kua ti Royaume na ngoi kue (Matthieu 6:33). A yeke futa ala pëpe, me a mû na ala ndo ti lango nga na kobe, nga a mû na ala mbeni kete nginza ti vo na aye so ala yeke na bezoin ni. Zo oko oko ayeke na kua ti sarango ni. Ambeni ayeke sara kua ti bureau, ambeni ayeke sara kua na cuisine wala na ndo ti tengo ye, na ndo ti petengo ambeti, na ndo ti sukulango abongo na ti répassengo ni. Ambeni ayeke bâ lege ti lekengo yâ ti ada ti Béthel ni wala ayeke sara ambeni kua nde.

Mbeni ndo so aita asara kua ngangu dä ndali ti fango tënë ti Royaume. Kota ndani so a leke na aBéthel ayeke ti tene gbâ ti azo awara lege ti hinga tâ tënë so ayeke na yâ ti Bible. Brochure so ayeke mbeni tapande ni. Na ngoi so a sû ni, Bebungbi abâ ndo na ndö ni. Na pekoni a tokua ni na lege ti ordinateur na aita ti traduction gbani gbani na ndo ti sese mobimba si ala kiri pekoni na ayanga ti kodro nde nde. Tongana a hunzi awe, a tokua ni na aBéthel so ayeke na angangu masini ti petengo ni si a pete ni na a kangbi ni na yâ ti acongrégation ahon saki 110. Akusala so kue so asewa ti Béthel asara amû maboko mingi na kusala so ayeke kota ahon akusala kue, so ayeke ti fango nzoni tënë ti Royaume.​—Marc 13:10.

• Azo wa asara kua na Béthel, na a yeke bâ lege ti ala tongana nyen?

• A-Béthel oko oko ayeke sara kua ndali ti kota kusala wa?

Azo ti yâ ti sewa ti Béthel ayeke sara kua na yâ ti andokua nde nde so ayeke bâ lege ti kua ti fango tënë na yâ ti kodro oko wala mingi. Ambeni ayeke sara kua na traduction, ambeni na ndo ti petengo ambeti, ti tokuango ni, ti sigingo na avidéo wala ala yeke sara kua na ando so abâ lege ti ambeni tënë nde ti kodro ni.

Komite ti filiale ayeke bâ lege ti kusala ni. Bebungbi ayeke soro ka ambeni ita-koli ota wala ahon ni so ayeke a-ancien na so akpengba na lege ti yingo ti bâ ndo na ndö ti bureau ti filiale oko oko. Aita ni so ayeke na yâ ti ye so a iri ni Komite ti filiale. Komite ni ayeke tokua ka asango na Bebungbi ti fa na lo tongana nyen la kusala ni ayeke tambela na yâ ti akodro so ala yeke bâ ndo na ndö ni, wala ti fa na lo akpale so alingbi ti bâ gigi. Asango so ayeke mû ka maboko na Bebungbi ti hinga atënë so a lingbi a yôro ni na yâ ti ambeti ti e, wala so a lingbi a fa ni na ngoi ti abungbi nga na akota bungbi. Bebungbi ayeke tokua nga ka ambeni ita-koli, so ayeke ga na iri ti kota ndokua ti aTémoin ti Jéhovah, na yâ ti afiliale oko oko ti fa ambeni ye na Komite ti filiale ti mû maboko na ala na yâ ti kua ti ala ni. (aProverbe 11:14) A yeke leke nga mbeni kapa so na yâ ni aita-koli ni so ayeke mû nga mbeni diskur ndali ti aita so ayeke na yâ ti akodro so filiale ni ayeke bâ ndo na ndö ni.

Ala yeke bâ nga lege ti acongrégation. Aita-koli so ayeke mû li ni na yâ ti filiale la ayeke yeda ti tene afini congrégation abâ gigi. Aita ni so ayeke bâ nga lege ti kua so apionnier, amissionnaire nga na asurveillant ti circonscription ayeke sara na yâ ti territoire ni. Ala yeke leke ka akota bungbi na ala yeke bâ ndo na ndö ti kua ti lekengo afini Da ti Royaume. Ala yeke bâ nga si a tokua ambeti na acongrégation. Kua kue so a sara na yâ ti mbeni filiale asara si kusala ti fango tënë atambela nzoni.​—1 aCorinthien 14:33, 40.

• Komite ti filiale ayeke sara kua maboko na maboko na Bebungbi tongana nyen?

• Kusala wa a yeke sara ka na yâ ti mbeni bureau ti filiale?

Ti mû lege na e nzoni ti fa “nzoni tënë” na “amara kue, akete mara kue, azo ti ayanga ti kodro kue nga na azo ti kodro kue,” e yeke sigi na ambeti na ayanga ti kodro 750 tongaso (Apocalypse 14:6). E sara tongana nyen ti sigi na ambeti mingi tongaso? A yeke azo ti akodro nde nde si asû atënë ni nga na atraducteur so amû terê ti ala kue na kua ni si ayeke kiri peko ni na ayanga ti kodro ni. Ala kue ayeke aTémoin ti Jéhovah.

A sû atënë ni kozo na yanga ti Anglais. Bebungbi ayeke bâ ndo na ndö ti ndokua ti sungo ambeti ti e so ayeke na kota ndokua ti e na Amerika. Ndokua ni so ayeke bâ lege ti kua ti aita so ayeke sû ambeti ni, so ambeni ayeke na kota ndokua ni kâ nga ambeni ayeke na yâ ti ambeni filiale. Teti so awasungo mbeti ni ayeke na ando nde nde, ambeti ti e ni nga ayeke sara tënë na ndö ti aye nde nde si andu azo kue.

A tokua atënë ni na atraducteur. Tongana a sû atënë ni si Bebungbi ayeda na ni awe, a yeke tokua ni na lege ti ordinateur na a-équipe ti atraducteur so ayeke na akodro nde nde, si ala kiri peko ti atënë ni na yanga ti kodro ti ala. Azo ni ayeke sara kue ti soro “atënë so ayeke na lege ni nga ayeke tâ tënë” na yanga ti kodro ti ala si alingbi tâ na ye so Anglais ni aye ti tene.​—Zo-ti-fa-tene 12:10.

A-ordinateur amû maboko ti sara kua ni hio. Ordinateur alingbi ti sara kua na place ti azo ti sungo mbeti wala ti atraducteur ape. Me, akua ti ala ni alingbi ti gue hio hio tongana ala sara kua na aye tongana adictionnaire, aye ti sarango na recherche nga na ambeni ye nde so a zia na ndö ti ordinateur. A-Témoin ti Jéhovah asigi na mbeni gbakuru ti kua so a iri ni MEPS na ndö ti ordinateur so amû lege na ala ti yôro na yâ ni atënë na ayanga ti kodro ngbangbo mingi, ti leke atënë ni nzoni na tere ti afoto ni si mbeti ni aga pendere tongaso si a pete ni.

Ngbanga ti nyen e sara effort tongaso, atâa a yeke ayanga ti kodro so gi azo saki kete si ayeke tene ni? Ngbanga ti so Jéhovah aye si “mara ti azo nde nde kue asö fini ti ala na ala wara tâ hingango ye na ndö ti tâ tënë.”​—1 Timothée 2:3, 4.

• Akode wa e yeke sara kua na ni ti sû na ambeti ti e?

• Ngbanga ti nyen e yeke kiri peko ti ambeti ti e na gbâ ti ayanga ti kodro?

Ngu oko oko, bungbi ti e ayeke sigi na aBible nga na ambeni mbeti kutu mingi, lo yeke kangbi ni na azo me lo yeke kä ni kango pëpe. E yeke leke aDa ti Royaume nga na aBéthel, nga e yeke bata ni pendere. E yeke bâ lege ti aBéthelite na amissionnaire saki mingi, nga e yeke mû maboko na aita so aye ti ngangu asi na ala. Tongaso, peut-être mo hunda terê ti mo, mo tene: ‘A wara nginza ni na ndo wa ti sara na aye ni so kue?’

E yeke hunda dîme wala e mû enveloppe na azo pëpe. Atâa so kua ti fango tënë ahunda nginza mingi, e yeke iri nginza na tïtî azo ape. A sara ngu 100 tongaso awe, use numero ti Tour ti Ba Ndo ti e atene so e hinga so Jéhovah ayeke mû maboko na e na so e yeke iri ande nginza lâ oko na tïtî azo ape teti kua ti e. E yeke sara ni lâ oko pëpe!​—Matthieu 10:8.

Azo na bê ti ala wani la amû nginza ndali ti kua ti e. Kua ti e ti fango tënë ti Nzapa na azo anzere na ala mingi na ala yeke mû ka mbeni ye ndali ni. Na ngia na bê aTémoin ayeke mû ngoi ti ala, ngangu ti ala, nginza ti ala nga na ambeni ye ti ala ti sara na ye so Nzapa aye na ndö ti sese kue (1 Chronique 29:9). Na yâ ti aDa ti Royaume nga na angoi ti akota bungbi ti e, a zia ambeni boîte ti offrande so azo alingbi ti zia nginza na yâ ni na bê ti ala wani. Wala azo alingbi ti mû a-offrande ni na lege ti site ti e jw.org. Mingi ni, azo so ayeke na nginza mingi pëpe si ayeke mû a-offrande, tongana ti wali-mua so Jésus agonda lo lani ndali ti so, atâa so ye ti lo ayeke dä pëpe, lo zia kete lê ti nginza use na yâ ti sanduku ti nginza ti temple ni (Luc 21:1-4). Tongaso, zo oko oko alingbi lakue ti ‘zi mbeni ye abata’ si lo mû ni “tongana ti so lo leke na bê ti lo ti sara”.​—1 aCorinthien 16:2; 2 aCorinthien 9:7.

E hinga so Jéhovah ayeke pusu lakue azo so aye ti ‘gonda lo na anzoni ye ti ala’ ti mû maboko na kusala ti Royaume, tongaso si ye so lo ye aga tâ tënë.​—aProverbe 3:9.

• Nyen la asara si bungbi ti e ayeke nde na tanga ti abungbi ti nzapa kue?

• A yeke sara ka nyen na a-offrande so azo amû na bê ti ala wani?

Tongana ti so iri “Da ti Royaume” afa ni, aye so e yeke manda kâ aluti na ndö ti Royaume ti Nzapa, kota tënë so ayeke na yâ ti fango tënë ti Jésus lani.​—Luc 8:1.

A yeke ando so e yeke voro Jéhovah dä. Na yâ ti aDa ti Royaume la aTémoin ti Jéhovah ayeke leke kua ti fango tënë ti Royaume dä (Matthieu 24:14). A leke ada ni mara ni nde nde nga konongo ni ayeke nde nde. Ada ni kue akono ngbii ape nga a zia gbâ ti aye na terê ni ape. Na yâ ti Da ti Royaume oko, a lingbi ti wara congrégation oko wala ahon so, na mingi ti ala ayeke tongaso. Na yâ ti angu so ahon, e leke aDa ti Royaume saki mingi (so ti tene oku lango oko oko) ti lingbi na wungo ti acongrégation so ayeke gue gï na li ni. Me nyen la amû maboko na e ti leke ada ni so?​—Matthieu 19:26.

A leke ni grâce na a-offrande so a zia ni nde ndali ni. A yeke tokua a-offrande ni so na filiale si lo tokua ni nga na acongrégation so ayeke na bezoin ni ti leke na afini Da ti Royaume wala angbene ni.

Avolontaire so dutingo ti ala ayeke nde nde la aleke ada ni. Na akodro mingi, a zia na sese Équipe ti lekengo aDa ti Royaume. A yeke ambeni ita so amû tere ti ala na kua ni, na ala yeke gue congrégation na congrégation ti yâ ti kodro ni, même na yâ ti akete kodro, ti mû maboko na acongrégation so ayeke leke aDa ti Royaume ti ala. Ti ambeni kodro, a zia ambeni ita ti bâ lege ti lekengo aDa ti Royaume na yâ ti akodro mingi wala ti leke pekoni. Atâa so ambeni ita so alondo na ambeni ndo nde, na so ayeke na akode, ayeke mû nga maboko na akua ti lekengo ada ni, mingi ti azo so ayeke sara kua ni ayeke amembre ti congrégation ni. Biani, yingo ti Jéhovah nga na akota effort ti azo ti lo amû lege ti leke na aDa ti Royaume.​—Psaume 127:1; aColossien 3:23.

• Ngbanga ti nyen ndo so e yeke voro Jéhovah dä a iri ni Da ti Royaume?

• Na lege ti nyen la e yeke leke aDa ti Royaume na ndö ti sese kue?

Iri ti Nzapa ayeke na ndö ti aDa ti Royaume kue ti aTémoin ti Jéhovah. Ni la, e bâ so a yeke mbeni kota pasa ti bata ni si a ngbâ nzoni nga pendere, teti sarango tongaso afa so e bâ tënë ti vorongo Jéhovah na nene ni mingi. Azo kue alingbi ti mû mbage dä.

Na peko ti bungbi, mû mbage na kua ti nettoyage. Lakue na peko ti bungbi, na ngia na bê aita ayeke sara mbeni kete nettoyage ti tene Da ti Royaume ni aduti propre. Nga lakue na ambeni ngoi a yeke sara kota nettoyage. Mbeni ancien wala mbeni wakua ti mungo maboko si ayeke bâ ndo na ndö ti kua ni. Lo sara ni mingi ni na mungo peko ti aye so a fa na ndö ti mbeni mbeti. Ambeni kua ni ahunda ti tene a balê yâ ti da ni, a sukula yâ ni, a zi poussière na terê ti aye kue, a sukula yâ ti kabinë, a dë yâ ti gbagba ni, a zi ambeni saleté so ayeke na yâ ni wala a zö asaleté. Ngu oko oko, a yeke soro mbeni lango ti sara mbeni kota nettoyage ni nde. E yeke mû ambeni kua ni na amolenge ti e, tongaso si e fa na ala ti ne ndo so e yeke voro Jéhovah dä.​—Zo-ti-fa-tene 5:1.

Yeda ti mû mbage na kua ti lekengo ambeni ye so abuba. Ngu oko oko, aita ayeke gi nzoni ti bâ na yâ ti Da ti Royaume nga na gigi ni aye wa la a yeke nzoni a leke ni. Na pekoni awe, ala leke aye ni so abuba si da ni angbâ nzoni, tongaso si a buba nginza senge senge pëpe (2 Chronique 24:13; 34:10). Da ti Royaume so a bata ni nzoni nga propre ayeke mbeni ndo so a lingbi ti tene zo avoro Nzapa dä. Ni la, tongana e mû mbage ti e na kua ni, e yeke fa so e ye Jéhovah nga so e bâ na nene ni ndo so e yeke voro lo dä (Psaume 122:1). A yeke sara nga si azo so ayeke nduru na ni agonda ndo ni.​—2 aCorinthien 6:3.

• A yeke nzoni e bâ ndo so e yeke voro Jéhovah dä na nene ni. Ngbanga ti nyen?

• Nyen la ahunda ti sara ti tene Da ti Royaume angbâ propre?

Mo ye ti kono hingango ye ti mo na ndö ti Bible? Mo ye ti hinga ambeni ye na ndö ti mbeni versê wala na ndö ti mbeni zo, na ndö ti mbeni place wala mbeni ye so Bible asara tënë ni? Wala mo hunda terê ti mo mo tene Bible alingbi ti mû maboko na mo na ndö ti mbeni ye so agbu bê ti mo? Tongana a yeke tongaso, gue na bibliothèque ti Da ti Royaume.

A yeke mû maboko na mo ti sara recherche. Peut-être mo yeke pëpe na ambeti kue ti aTémoin ti Jéhovah na yanga ti kodro ti mo. Me na bibliothèque ti Da ti Royaume mo yeke wara mingi ti afini mbeti ni. Mo lingbi ti wara nga na yâ ni amara ti Bible nde nde, mbeni nzoni dictionnaire, nga na ambeni bakari so alingbi ti mû maboko na mo. Kozo ti tene bungbi ato nda ni wala na pekoni, mo lingbi ti gue ti sara kua na aye so ayeke na yâ ti bibliothèque ni. Tongana congrégation ni ayeke na ordinateur, peut-être Watchtower Library kue ayeke na ndö ni. A yeke mbeni gbakuru ti kua na ndö ti ordinateur so a zia mara ti ambeti ti e nde nde na yâ ni nga ayeke mû maboko na mo ti sara recherche hio na ndö ti mbeni tënë wala mbeni versê.

A yeke mû maboko na a-élève ti bungbi ti Kusala ti e nga na gigi ti e ti Chrétien. Bibliothèque ti Da ti Royaume alingbi ti mû maboko na mo mingi ti leke na adevoir ti mo. Surveillant ti bungbi ti Kusala ti e nga na gigi ti e ti Chrétien la ayeke bâ lege ti bibliothèque ni. A yeke ti lo ti bâ wala a zia andangba mbeti ti e na yâ ni awe nga ti bâ wala a leke ambeti ni nzoni. Lo wala ita so ayeke manda Bible na mo alingbi ti fa na mo lege ti wara asango so mo yeke na bezoin ni. Me, ambeti ti yâ ti bibliothèque ni angbâ gï na yâ ti Da ti Royaume ni me a sigi na ni ape. Nga, e ye ti sara kua na ambeti ni na hange si a suru ape nga ti sû mbeti na yâ ni ape.

Bible afa so ti “wara lege ti hinga ye na ndö ti Nzapa”, a lingbi e duti na nzara ti gi lo “tongana mosoro so ahonde”. (aProverbe 2:1-5). Bibliothèque ti Da ti Royaume alingbi ti mû maboko na mo ti to nda ti recherche ti mo ni.

• Aye wa la mo lingbi ti wara na yâ ti bibliothèque ti Da ti Royaume?

• Azo wa la alingbi ti fa na mo nzoni lege ti sarango kua na bibliothèque ni?

Jésus Christ atene lani na adisciple ti lo, lo tene: “Zia lumière ti ala aza na gbele azo, si azo ni alingbi ti bâ apendere kusala ti ala na ala mû gloire na Babâ ti ala so ayeke na yayu.” (Matthieu 5:16). Ti gue oko na tënë so, e yeke sara kusala na aye so senda-kode asigi na ni, ye tongana Internet. Site ti e, jw.org, ayeke ndo so zo alingbi ti gue dä ti wara asango na ndö ti aye so aTémoin ti Jéhovah amä na bê na ni nga na ndö ti akusala ti ala. A yeke wara nyen kâ?

Akiringo tënë ti Bible na atënë so azo ayeke hunda ka mingi. Mo lingbi ti wara akiringo tënë na ambeni kota tënë so azo ayeke hunda ka na terê ti ala. Na tapande, mo yeke wara tract Pasi ayeke hunzi ande la? nga na Ayeke zingo ande biani azo so akui awe? na ndö ti site ni na ayanga ti kodro ahon 600. Mo lingbi nga ti wara Mbeti ti Nzapa ti fini dunia na ayanga ti kodro ahon 130 nga na ambeni mbeti so alingbi ti mû maboko na mo ti manda Bible, na tapande buku Bible alingbi ti fa nyen na e? nga na afini Tour ti Ba Ndo na Réveillez-vous ! Zo alingbi ti diko mingi ti ambeti ni, ti mä ni, wala ti téléchargé ni na format audio, MP3, PDF wala EPUB. Mo lingbi même ti imprimé ambeni kete wungo ti alembeti ni ti mû ni na mbeni zo so aye ni na yanga ti kodro ti lo. A zia nga avidéo ndali ti awambongi dä na ayanga ti kodro mingi. Mo lingbi ti téléchargé dikongo Bible so a mä go ti azo ni dä, ascénette so andu ambeni mbaï ti yâ ti Bible, nga na apendere mozoko so mo lingbi ti mä ni.

Ambeni sango na ndö ti aTémoin ti Jéhovah. Mo yeke wara nga afini sango nga na anduru vidéo na ndö ti kua so e yeke sara na ndö ti sese kue. Asango na ndö ti aye so asi na aTémoin ti Jéhovah nga na aye so e sara na ngoi so aye ti ngangu asi na aita ti e. Mo lingbi nga ti wara anduru tënë na ndö ti akota bungbi ti lango ota ti peko nga na ndö ti afiliale ti e.

Aye so kue amû lege na e ti za lumière ti tâ tënë na ambage ti sese yongoro kâ. Azo na ndo kue, même na ando so ayo ngangu tongana sese ti Antarctique, ayeke bâ nzoni dä. E sambela ti tene “tënë ti Jéhovah angbâ ti gue na li ni hio hio” na ndö ti sese kue si a mû gloire na Nzapa.​—2 aThessalonicien 3:1.

• Aye wa na ndö ti site jw.org amû lege na azo mingi ti hinga tâ tënë?

• Nyen la mo ye ti bâ na ndö ti site ti e?